இறுதித் தீர்வு எட்டும் வரை தமிழ்க் கட்சிகளுடன் பேச்சு

இனப்பிரச்சினைக்கான இறுதித் தீர்வு பெறும் வரை தமிழ்த் தேசிய கூட்டமைப்பு உள்ளிட்ட தமிழ்க் கட்சிகளுடன் அரசு தொடர்ந்தும் பேச்சுவார்த்தைகளை நடத்தும் என அமைச்சரவையின் பேச்சாளர் அமைச்சர் லக்ஷ்மன் யாப்பா அபேவர்த்தனா தெரிவித்தார். யுத்தத்தை முடிவுக்கு கொண்டு வந்தது போன்று திடுதிப்பென சகலரும் ஏற்றுக்கொள்ளக்கூடிய ஒரு நிரந்தர தீர்வை வழங்கிவிட முடியாது என்றும் அமைச்சர் சுட்டிக்காட்டினார். அமைச்சரவை முடிவுகள் அறிவிக்கும் செய்தியாளர் மாநாடு நேற்று தகவல் திணைக்களத்தின் கேட்போர் கூடத்தில் நடைபெற்றது. இச் செய்தியாளர் மாநாட்டிலேயே அமைச்சர் யாப்பா மேற்கண்டவாறு தெரிவித்தார். தமிழ்க் கட்சிகளுடன் பேச்சு நடத்தும் அதேவேளை இனப்பிரச்சினைக்கான தீர்வை எட்டுவதற்காக ஏற்படுத்தப்பட்டுள்ள பாராளுமன்ற தெரிவுக்குழுவுக்கு பிரதிநிதிகளை நியமிப்பதற்காக தமிழ்க் கட்சிகளிடம் கோரிக்கையும் விடுக்கப்பட்டுள்ளது. தமிழ்த் தேசியக் கூட்டமைப்பு மற்றும் தமிழ்க் கட்சிகளுடன் பேச்சு நடத்தும் அதேவேளை இறுதித் தீர்வை எட்டும் விதத்தில் பாராளுமன்ற தெரிவுக் குழுவும் அதன் பங்களிப்பை வழங்கும்.

30 வருட கால யுத்தம் முடிவுக்கு கொண்டுவரப்பட்ட பின்னர் பல தசாப்தங்களாக புரையோடிப் போயுள்ள இனப்பிரச்சினைக்கான நிரந்தர தீர்வு எட்டும் போது மீண்டும் ஒரு முரண்பாட்டை பிரச்சினையை ஏற்படுத்தாத ஏற்படுத்த முடியாத தீர்வாக இருக்க வேண்டும் என்பதில் அரசு அக்கறை செலுத்துகிறது. இனப்பிரச்சினைக்கான ஒரு தீர்வை வழங்க வேண்டும் என்ற நோக்குடன் 1987 இல் 13ஆவது திருத்தச் சட்டத்தின் ஊடாக மாகாண சபைகள் முறைமை கொண்டுவரப்பட்டது. இதன் மூலம், இனப்பிரச்சினைக்கான தீர்வுக்கு வழிகோலவில்லை. மாறாக இரண்டாவது வரிசை அரசியல் தலைமைகளேயே உருவாக்கியது எனவும் அமைச்சர் யாப்பா சுட்டிக்காட்டினார்.

பாராளுமன்ற தெரிவுக் குழு என அறிவிக்கப்பட்டாலும் இதுவரை இக்குழு நியமிக்கப்படவில்லையே என செய்தியாளர் ஒருவர் கேட்டபோது :- மேற்படி தெரிவுக் குழுவுக்கு தமது பிரதிநிதிகளை சிபாரிசு செய்யுமாறு சபாநாயகர் தமிழ்க் கட்சிகளிடம் கோரிக்கை விடுத்துள்ளார் என்றார். இலங்கை வந்திருந்த அமெரிக்க பிரதி ராஜாங்க செயலாளர் ரொபர்ட் ஓ பிளேக் இலங்கை தொடர்பாக தெரிவித்துள்ள கருத்து பற்றி அரசின் நிலைப்பாடு என்ன? என செய்தியாளர் ஒருவர் கேட்ட போது :- ரொபர்ட் ஓ. பிளேக் இலங்கைக்கு முன்னர் விஜயம் செய்த போது தெரிவித்திருந்த கருத்துக்கும், தற்போது தெரிவித்துள்ள கருத்துக்கும் பாரிய வேறுபாடுகள் உள்ளன. மீள்குடியேற்றம், மிதிவெடிகள், கண்ணி வெடிகள் அகற்றல் தொடர்பாக முன்னேற்றம் கண்டுள்ளமை தொடர்பாக இலங்கைக்கு பாராட்டுக்களை அவர் தெரிவித்திருக்கிறார். மெனிக்பாம் உள்ளிட்ட நிவாரணக் கிராமங்களில் உள்ளவர்கள் மீளக் குடியமர்த்தப்பட்டுள்ளமை குறித்தும் அவர் தமது திருப்தியை வெளிப்படுத்தியுள்ளார்.

பிரதி ராஜாங்க செயலர் ரொபர்ட் ஓ பிளேக்கின் நோக்கு குரோத மனப்பான்மையுடனாக இருப்பதாக ஈ. பி. டி. பி. செயலாளர் நாயகம் தெரிவித்திருக்கிறாரே? என கேட்டபோது, அது அவரது ஜனநாயக உரிமை. ஒவ்வொருவருக்கும் ஒவ்வொரு கருத்து இருக்கலாம். அவை அரசின் கருத்தாகிவிட முடியாது என்றும் அமைச்சர் லக்ஷ்மன் யாப்பா அபேவர்த்தன தெரிவித்தார்.