2ஜ ஸ்பெக்ட்ரம் விவகாரம்

சிக்கினார் சிதம்பரம்

2ஜி விவகாரம் தொடர்பாக, மத்திய நிதி அமைச்சகம், பிரதமர் அலுவலகத்திற்கு எழுதிய கடிதம் பெரும் சர்ச்சையை ஏற்படுத்தி, சிதம்பரத்தின் பதவிக்கு பாதிப்பை ஏற்படுத்தும் சூழ்நிலையை உருவாக்கியுள்ள நிலையில் ஸ்பெக்ட்ரம் விலை நிர்ணயம் தொடர்பாக, பிரதமருக்கு, முன்னாள் மத்திய அமைச்சர் தயாநிதி எழுதிய கடிதம், புதிய பூதத்தை கிளப்பியுள்ளது. இது தொடர்பாக, மன்மோகன் சிங், நாட்டு மக்களுக்கு விளக்கம் அளிக்க வேண்டும் என்று பா.ஜ. வலியுறுத்தியுள்ளது. 2ஜி ஸ்பெக்ட்ரத்துக்கான விலை நிர்ணயம் தொடர்பாக, 2006ல், அப்போதைய தொலைத் தொடர்புத் துறை அமைச்சர் தயாநிதி, பிரதமருக்கு எழுதியதாக வெளியாகியுள்ள கடிதம், புதிய சர்ச்சையை எழுப்பியுள்ளது.

கடந்த 2006 ஜனவரியில், இராணுவத்திடம் இருந்து கூடுதல் ஸ்பெக்ட்ரத்தை பெற்று தனியார் தொலைத் தொடர்பு நிறுவனங்களுக்கு விற்பனை செய்வது குறித்து ஆய்வு செய்யவும், ஸ்பெக்ட்ரம் விலை நிர்ணயம் செய்யவும், மத்திய அமைச்சரவை குழுவுக்கு, பிரதமர் மன்மோகன் சிங், கொள்கை அளவில் ஒப்புதல் அளித்தார்.

இதனடிப்படையில் அமைச்சரவை குழு, 2006 ஜுனில் தன் பரிந்துரைகளை சமர்ப்பிப்பதாக இருந்தது. ஆனால், ஸ்பெக்ட்ரம் விலை நிர்ணய அதிகாரம் அமைச்சரவைக் குழுவுக்கு இருப்பதை விரும்பாத, அப்போதைய தொலைத் தொடர்புத்துறை அமைச்சர் தயாநிதி, 2006 பெப்ரவரி 1 இல், இந்த விவகாரம் தொடர்பாக, பிரதமர் மன்மோகன் சிங்கை சந்தித்துப் பேசினார். ஸ்பெக்ட்ரம் விலை நிர்ணயம் செய்யும் அதிகாரம் தனது துறைக்கே வேண்டும் என, அப்போது வலியுறுத்தினார். இதற்கு பிரதமர் மன்மோகன் சிங்கும் சம்மதம் தெரிவித்ததாக கூறப்படுகிறது.

இதனடிப்படையில், அமைச்சரவை குழுவுக்கான அதிகார வரம்பை குறைக்க வலியுறுத்தியும், ஸ்பெக்ட்ரம் விலை நிர்ணய அதிகாரத்தை தங்கள் அமைச்சகத்திற்கு வழங்குவதை உறுதி செய்யக்கோரியும், 2006 பெப்ரவரி 28ம் திகதி பிரதமர் மன்மோகன் சிங்கிற்கு, தயாநிதி கடிதம் ஒன்றை அனுப்பினார்.

அந்தக் கடிதத்தில் கூறப்பட்டுள்ளதாவது? உங்களை சந்தித்தபோது, இராணுவ அமைச்சகத்திடம் இருந்து ஸ்பெக்ட்ரத்தை விடுவித்து, தனியார் நிறுவனங்களுக்கு, வழங்கும் விவகாரத்தில், மத்திய அமைச்சரவைக் குழுவின் செயல்பாடுகள் பற்றி பேசினோம். அப்போது, இந்த விடயத்தில் அமைச்சரவை குழுவின் செயல்பாடு, நாங்கள் விரும்பியபடி இருக்கும் என, நீங்கள் உறுதி அளித்தீர்கள்.

அமைச்சரவை குழுவின் செயல்பாடு, ஸ்பெக்ட்ரத்தை எடுத்துக்கொள்ளும் அளவில் மட்டுமே இருக்கும் என, தெரிவிக்கப்பட்டது. இருந்தாலும், அதற்கு மாறாக அமைச்சரவை குழுவுக்கு அதிக அதிகாரம் கொடுக்கப்பட்டு இருப்பது ஆச்சரியம் அளிக்கிறது. இது தொலைத் தொடர்பு அமைச்சகத்தின் வழக்கமான பணிகள் பாதிக்கும் என, நினைக்கிறேன். எனவே, தயவுகூர்ந்து, இந்த விடயத்தில் அமைச்சரவை குழுவின் செயல்பாடுகள் விடயத்தில் மாற்றம் கொண்டுவர வேண்டுகிறேன். இவ்வாறு கடிதத்தில் தெரிவித்துள்ளார்.

இந்த கடிதத்தை தொடர்ந்து, அமைச்சரவை குழுவின் செயல்பாடுகளில், 2006 டிசம்பர் 7 இல் மாற்றம் கொண்டுவரப்பட்டது. இராணுவத்திடம் இருந்து ஸ்பெக்ட்ரத்தை பெறும் விவகாரத்தை மட்டும், அமைச்சரவை குழு கவனிக்கும் என, அமைச்சரவை செயலகம் அறிவிப்பு வெளியிட்டது.

இந்த விவகாரத்தை தான், தற்போது பா.ஜ.கட்சியினர் கையில் எடுத்துள்னர். ஸ்பெக்ட்ரம் விலையை நிர்ணயம் செய்யும் பொறுப்பு, தொலைத் தொடர்புத் துறை அமைச்சகத்திடமே தொடர்ந்து இருக்க வேண்டும் என்ற அடிப்படையில், கூட்டணி தர்மம் கருதி இந்த முடிவை பிரதமர் எடுத்ததாக பா.ஜ கட்சியினர் கூறுகின்றனர்.

பிரதமரின் இந்த முடிவு தான், பின்னாளில் ஸ்பெக்ட்ரம் ஊழல் நடப்பதற்கு காரணமாக அமைந்து விட்டதாகவும், எதிர்க் கட்சியினர் கூறுகின்றனர். எதிர்க் கட்சியினர் குற்றம் சாட்டியுள்ளனர். இதனால், பிரதமர் மன்மோகன் சிங்கிற்கு கடும் நெருக்கடி ஏற்பட்டுள்ளது. இது குறித்து பா.ஜ. செய்தி தொடர்பாளர் பிரகாஷ் ஜாவேத்கர் கூறுகையில், பிரதமருக்கு தயாநிதி எழுதிய கடிதம் தொடர்பாக பிரதமர் மன்மோன் சிங் விளக்கம் அளிக்க வேண்டும். இது, வாய்மூடி மெளனமாக இருக்க வேண்டிய விடயம் இல்லை. குற்றச் செயலுக்கு உடந்தையாக இருக்கும் செயல் என கூறியுள்ளார்.