இலங்கையர்கள் தாக்கப்பட்டமைக்கு அஸ்வர் எம்.பி. கண்டனம்

இலங்கையிலி ருந்து தமிழ் நாட் டுக்கு யாத்திரை சென்றிருந்த யாதிரிகர்கள் தாக்கப்பட்ட சம்பவ த்தை வன்மையாகக் கண்டிப்பதாக பாராளுமன்ற உறுப்பினர் ஏ.எச்.எம். அஸ்வர் தெரிவித்தார். கிண்ணியாவில் நடைபெற்ற ஐக்கிய மக்கள் சுதந்திர முன்னணியின் தேர்தல் பிரசாரக் கூட்டமொன்றில் நேற்று கலந்துகொண்டு உரையாற்றும்போதே அவர் இவ்வாறு கூறினார். அங்கு தொடர்ந்தும் உரையாற்றிய அவர், ஜனாதிபதி மஹிந்த ராஜபக்ஷ அவர்களின் ஆட்சியில் இலங்கைத் தமிழ் மக்களுக்கு சகல உரிமைகளும் வழங்கப்பட்டுள்ளன. யாழ்ப்பாணம், முல்லைத்தீவு, கிளிநொச்சி, மட்டக்களப்பு, அம்பாறை, திருகோணமலை மாவட்டங்களிலிருந்து கதிர்காமக் கந்தன் ஆலயத்துக்கு பாதயாத்திரை செல்லும் தமிழ் யாத்திரிகர்களை பெரும்பான்மையின சிங்கள மக்கள் மிகுந்த இன்முகத்துடனும், சந்தோசத்துடனும் மலர்மாலைகளை அணிவித்து அவ்வப்பிரதேசங்களில் வரவேற்கின்றார்கள்.

கொழும்பு தலைநகரில் கம்பன்விழா வெகு விமரிசையாகக் நடத்தப்படுகிறது. இவ்விழாவில் தமிழ் நாட்டைச் சேர்ந்த பேராசிரியர்கள், கல்விமான்கள், புத்திஜீவிகள் எதுவிதமான இடையூறுகளுமின்றி பங்குபற்றுகின்றார்கள். கொழும்பு தமிழ் சங்கத்தில் வாராவாரம் தமிழ் புத்தகங்கள் வெளியிடப்படுகின்றன. தமிழ்நாட்டிலுள்ள மணிமேகலை பிரசுரத்தின் புத்தகங்கள் கூட இங்கே வெளியிட்டு வைக்கப்படுகின்றன. எனது நண்பர் ஒருவரின் இருபது புத்தகங்கள் இங்கு வெளியிடப்பட்டு சாதனை படைக்கப்பட்டிருக்கிறது.

இந்த நாட்டில் தமிழ் இலக்கண, இலக்கிய செயற்பாட்டுக்கு ஜனாதிபதி மஹிந்த ராஜபக்ஷ அவர்கள் தலைமையிலான அரசாங்கம் பாரிய ஊக்குவிப்பை வழங்கி வருகிறது. இதனை யாவரும் அறிவார்கள். கொழும்பில் நடைபெறும் வேல் உற்சவத்தின் போது ஜனாதிபதி அலரிமாளிகையின் வெளியேவந்து ஊர்வலத்தை வரவேற்பார். எந்தவொரு நாட்டிலும் இப்படி நடப்பதில்லை.

கொழும்பு வடக்கிலுள்ள களனி கங்கை முதல் தெஹிவளை பாலம்வரை வாழும் தமிழ் மக்கள் சந்தோசமாகவும், மகிழ்ச்சியோடும் செல்வச்செழிப்புடனும் வாழ்கின்றனர். அவர்கள் தங்கள் வியாபார நடவடிக்கைகளை சுதந்திரமாக எதுவித இடையூறுமின்றி மேற்கொள்கின்றனர். வெள்ளவத்தை மயூராபதி அம்மன் கோவிலிலிருந்து பம்பலப்பிட்டி கதிரேசன் கோவில்வரை தமிழ் பெண்கள் பால்குட பவனி செல்கின்றனர். இதனை பெரும் பக்தி மரியாதையுடன் பெரும்பான்மை மக்கள் வரவேற்கின்றனர். இவ்வாறு இலங்கையில் தமிழ் மக்களின் பாரம்பரியம், கலாசாரம் பாதுகாக்கப்படுவதுடன் அவை வளர்ச்சியடைவதற்குத் தேவையான ஊக்குவிப்புக்களையும் ஜனாதிபதி தலைமையிலான அரசாங்கம் வழங்கி வருகின்றது.

இதனை தமிழ்நாட்டு முதலமைச்சர் ஜெயலலிதா அறிந்திருக்க வேண்டும். இல்லாவிட்டால் இனியாவது அறிந்துகொள்ள வேண்டும். இதனை கருணாநிதி தெரிந்துகொள்வது அவசியம். இவ்வாறான நிலையில் இலங்கையி லிருந்து தமிழ் நாட்டுக்கு யாத்திரை சென்றிருந்த யாதிரிகர்களை தாக்கியதை நான் வன்மையாகக் கண்டிக்கின்றேன்.

வடக்கு, கிழக்கு, மலையகம் ஆகியவற்றில் ஜனாதிபதி மஹிந்த ராஜபக்ஷ அவர்களின் ஆட்சிக் காலத்தில் பாரிய அபிவிருத்திகள் இடம்பெற்று வருகின்றன. இது பள்ளிவாசல்களை உடைக்கும் யுகம் அல்ல. பள்ளிவாசல்களை கட்டும் யுகமே மஹிந்த ராஜபக்ஷ அவர்களின் ஆட்சி. ஜனாதிபதி அவர்கள் நுவரெலியாவில் பள்ளிவாசல் ஒன்றை அண்மையில் திறந்துவைத்தார். காத்தான்குடியில் புதிய பள்ளிவாசல் அமைப்பதற்கு அடிக்கல் நாட்டியுள்ளார். பள்ளிவாசலை உடைத்த வரலாறு புலிகளுடையது.

வடக்கில் வாழ்ந்த முஸ்லிம்களை உடுத்த உடையோடு வெளியேற்றிய புலிகள் அங்கிருந்த 74 பள்ளிவாசல்களை உடைத்து சேதமாக்கினார்கள். இது பற்றிய முழுமையான விபரங்களை அமைச்சர் ரிசாட் பதியுதீன் வைத்துள்ளார். வடக்கில் மாத்திரமல்லாமல் கிழக்கிலுள்ள மூதூர் உள்ளிட்ட பல பிரதேசங்களிலிருந்து முஸ்லிம்களை புலிகளே வெளியேற்றினர். வெளியேற்றப்பட்ட அந்த முஸ்லிம்களை மீளக்குடியமர்த்தியது ஜனாதிபதி மஹிந்த ராஜபக்ஷ அவர்களின் யுகத்தில்தான். இந்த உண்மைகளை தமிழ் நாட்டு முஸ்லிம்களும் உலக முஸ்லிம்களும் அறிந்துகொள்ள வேண்டும் என்றார்.