இலங்கை பயணிகள் மீது தாக்குதல்

திருச்சி, செப். 4: தமிழகத்தில் வேளாங்கண்ணி, பூண்டி மாதா கோயிலுக்கு வந்த சிங்கள சுற்றுலாப் பயணிகள் மீது செவ்வாய்க்கிழமை தாக்குதல் நடத்தப்பட்டது. இதில், அவர்கள் பயணம் செய்த இரு வேன்களின் கண்ணாடிகள் உடைந்தன. இதையடுத்து, அவர்கள் திருச்சி விமான நிலையத்துக்கு பாதுகாப்புடன் அழைத்துவரப்பட்டு, சிறப்பு விமானம் மூலம் இலங்கைக்கு அனுப்பிவைக்கப்பட்டனர். இலங்கையில் உள்ள மேற்கு கடற்கரை மாவட்டமான புத்தளத்திலிருந்து வெவ்வேறு குழுக்களாக ஆண்கள் 65 பேர், பெண்கள் 83 பேர், குழந்தைகள் 36 பேர் என மொத்தம் 184 பேர் தமிழகத்துக்கு செப்டம்பர் 2-ம் தேதி வந்தனர். இவர்கள் பூண்டி மாதா கோயில், வேளாங்கண்ணி மாதா கோயில் உள்ளிட்ட இடங்களுக்குச் சென்று வழிபட திட்டமிட்டிருந்தனர்.

பூண்டியில் எதிர்ப்பு: தஞ்சாவூர் மாவட்டம், பூண்டியில் உள்ள மாதா கோயிலுக்கு திங்கள்கிழமை சிங்கள சுற்றுலாப் பயணிகள் வந்திருப்பதை அறிந்த நாம் தமிழர் மற்றும் விடுதலைச் சிறுத்தைகள் கட்சியினர், அவர்களை கோயிலிலிருந்து வெளியேற்ற வேண்டுமென வலியுறுத்தி போராட்டத்தில் ஈடுபட்டனர். இதைத் தொடர்ந்து, அங்கிருந்து செவ்வாய்க்கிழமை அதிகாலையில் இவர்கள் வேளாங்கண்ணிக்குச் சென்றனர்.

வேளாங்கண்ணியிலும் எதிர்ப்பு: வேளாங்கண்ணி பேராலயத்திலும் சிங்கள சுற்றுலாப் பயணிகள் உடனடியாக வெளியேற வேண்டுமென வலியுறுத்தி, மதிமுக மற்றும் நாம் தமிழர் கட்சிகளைச் சேர்ந்தவர்கள் போராட்டத்தில் ஈடுபட்டனர். போராட்டத்தில் ஈடுபட்ட 25 பேரை போலீஸார் கைது செய்தனர்.

பின்னர், அங்கிருந்து நாகை மாவட்ட போலீஸார் பாதுகாப்புடன் சிங்கள சுற்றுலாப் பயணிகளை வேளாங்கண்ணியிலிருந்து 6 வேன்களில் ஏற்றி திருச்சிக்கு அனுப்பிவைத்தனர்.

திருவாரூரிலும் எதிர்ப்பு: வரும் வழியில் திருவாரூர் புறவழிச் சாலையில் கூடிய மதிமுகவினர், சிங்களர்களுக்கு எதிர்ப்பு தெரிவித்து கோஷம் எழுப்பினர். மேலும், அவர்கள் வந்த வேன் மீது சிலர் செருப்புகளையும் வீசினர்.

வேன் கண்ணாடிகள் உடைப்பு: வேன்கள் திருச்சி அருகிலுள்ள திருவெறும்பூர் அருகே வந்தபோது ஒரு வேன் பழுதடைந்தது. பின்னர் அதிலிருந்தவர்களை மாற்று வாகனத்தில் ஏற்றிக் கொண்டு வந்துள்ளனர். திருவெறும்பூரை அடுத்த காட்டூர் அருகே வந்தபோது அடையாளம் தெரியாத ஒரு கும்பல் வேன்களை வழிமறித்து, வேன்கள் மீது கல்வீசித் தாக்குதல் நடத்தியது. இதில் இரு வேன்களின் கண்ணாடிகள் உடைந்தன.

இதுகுறித்து தகவல் அறிந்ததும் மாநகர காவல்துறையைச் சேர்ந்த அதிவிரைவுப் படையினர் காட்டூருக்கு விரைந்து அங்கிருந்து, சிங்களர்கள் அனைவரையும் மாற்று வாகனங்களில் பாதுகாப்புடன் திருச்சி விமான நிலையத்துக்கு அழைத்து வந்தனர்.

விமான நிலையத்தில் பலத்த பாதுகாப்பு: திருச்சி விமான நிலையத்தில் மாநகரக் காவல் ஆணையர் சைலேஷ் குமார் யாதவ் தலைமையில் அதிவிரைவு படையினர், மத்திய தொழிலக பாதுகாப்புப் படையினர், துணை ராணுவப் படையினர் பாதுகாப்புப் பணியில் ஈடுபட்டிருந்தனர்.

விமான நிலையத்தில் சிங்கள பயணிகள் கூறியது: நாங்கள் கடந்த 20 ஆண்டுகளாக பூண்டி மற்றும் வேளாங்கண்ணி உள்ளிட்ட பேராலயங்களின் ஆண்டுப் பெருவிழாக்களின்போது இங்கு வந்து செல்வோம். இந்த ஆண்டுதான் இதுபோன்ற அசம்பாவிதங்கள் நடைபெற்றுள்ளன. நாங்களும் தமிழ் பேசுவோம், வழிபட வந்த எங்களை ஏன் தடுக்கின்றனர் என்று புரியவில்லை என்றனர்.

சிறப்பு விமானம்: இதைத் தொடர்ந்து, இலங்கையிலிருந்து திருச்சிக்கு செவ்வாய்க்கிழமை இரவு வந்த சிறப்பு விமானத்தில் 184 பயணிகளும் இலங்கைக்கு பத்திரமாக அனுப்பிவைக்கப்பட்டனர் என விமான நிலைய வட்டாரங்கள் தெரிவித்தன.

8 பேர் கைது: திருச்சி அருகே சுற்றுலாப் பயணிகளைத் தாக்கியதாக மதிமுக பொதுக்குழு உறுப்பினர் அ. துரைராஜ் (45) உள்ளிட்ட 8 பேர் கைது செய்யப்பட்டனர்.

(நன்றி: தினமணி)