சட்டவிரோத கடல் பயணம் வேண்டாம்

இலங்கை அகதிகளுக்கு தமிழக பொலிஸ் எச்சரிக்கை

இலங்கை அகதிகள் முகாமில் இருப்பவர்கள், சட்டவிரோதமாக கடல் பயணம் செய்வதை தவிர்க்க வேண்டுமென, தமிழக நுண்ணறிவுப் பிரிவு பொலிஸார் எச்சரித்துள்ளனர். தமிழகத்தில், இலங்கை அகதிகளுக்காக, 128 முகாம்கள் உள்ளன. அங்குள்ள இலங்கைத் தமிழர்களை, வேலை வாங்கித் தருவதாகக் கூறி, முறையான ஆவணங்கள் இன்றியும், சட்ட விரோதமாகவும், கடல் வழியாக அவுஸ்திரேலியாவுக்கு அழைத்துச் செல்ல, சிலர் முயற்சிக்கும் சம்பவங்கள் தொடர்கின்றன.

இந்நிலையில், அகதி முகாம்களில் உள்ள இலங்கைத் தமிழர்களுக்கு, நுண்ணறிவுப் பிரிவு பொலிஸ் தலைவர் அபாஷ் குமார், சுற்றறிக்கை அனுப்பியுள்ளார். அதில் கூறியிருப்பதாவது, இலங்கைத் தமிழர்கள்,அவுஸ்திரேலியாவில் உள்ள, கிறிஸ்துமஸ் மற்றும் கொக்கோஸ் தீவுகளுக்கு, பாஸ்போர்ட், விசா இல்லாமல், படகுகள் வாயிலாக செல்ல முயற்சிப்பதாக, காவல் துறைக்கு தகவல் வந்துள்ளது.

சர்வதேச கடலில், இது போன்ற சட்ட விரோத பயணங்கள், குற்றச் செயலாக கருதப்படுகிறது. போலி முகவர்கள் மற்றும் இடைத்தரகர்கள் சிலர், அகதிகள் முகாம்களில் உள்ள இலங்கைத் தமிழர்களிடம் பணம் வசூலித்து, வெளிநாட்டுக்கு அனுப்புவதாகக் கூறி ஏமாற்றுகின்றனர்.

இது போன்ற செயல்களில் ஈடுபடும் கும்பல்களை கட்டுப்படுத்த முன் எச்சரிக்கை நடவடிக்கையாக, சம்பந்தப்பட்ட போலி முகவர்களை கண்டு பிடித்து, பொலிஸார் கைது செய்கின்றனர். இலங்கைத் தமிழர்கள், சட்ட விரோதமாக கடல் பயணம் செய்வதை தவிர்க்க, போலி முகவர்களிடம் ஏமாறாமல் இருக்க, எச்சரிக்கை செய்யப்படுகின்றனர்.

கள்ளத்தனமாக வெளிநாடு செல்வோர் அல்லது அனுப்ப முயற்சிப்போர் குறித்து, தகவல் அறிந்தவர்கள் 044- 28447739 மற்றும் “கியூ” பிரிவு கட்டுப்பாட்டு அறை தொலைபேசி 9444400130 என்ற எண்ணில் தொடர்பு கொள்ளலாம்.

சரியான தகவலுக்கு, வெகுமதி அளிக்கப்படும், பெயர் ரகசியம் காக்கப்படும். இவ்வாறு, சுற்றறிக்கையில் தெரிவிக்கப்பட்டுள்ளது.

இதேவேளை அவுஸ்திரேலியா செல்ல முயன்ற, ராமநாதபுரம் மாவட்டம், மண்டபம் அகதிகள் முகாமை சேர்ந்த 84 அகதிகளை கர்நாடக மாநிலம் மங்களூரில், பொலிஸார் பிடித்து, சென்னைக்கு அழைத்து வந்தனர்.

ஒரு இலட்சம் ரூபாயை, முகவர்கள் முன்பணமாக வாங்கிக் கொண்டதாக, இவர்கள் தெரிவித்தனர். இதைத் தொடர்ந்து, அகதிகளை ஏமாற்றியவர்கள் யார் என, கியூ பிரிவு பொலிஸார் விசாரிக்கின்றனர்.