இலங்கை யாத்திரிகர்கள் மீதான தாக்குதல்

புலம் பெயர் தமிழர்களின்  தூண்டுதலே காரணம்

தமிழகத்தில் அண்மையில் இலங்கை பக்தர்கள் மீது நடத்தப்பட்ட தாக்குதல் சம்பவங்கள் புலி ஆதரவாளர்களான புலம்பெயர்ந்த தமிழ் அமைப்புக்களின் தூண்டுதலாலேயே இடம்பெற்றன. இவற்றில் ஜெயலலிதாவோ அல்லது கருணாநிதியோ சம்பந்தமில்லையென பிரதி வெளிவிவகார அமைச்சர் நியோமல் பெரேரா தெரிவித்தார். இச்சம்பவம் காரணமாக இரு நாடுகளு க்குமிடையிலான நல்லுறவுகளில் எவ்வித பாதிப்புமில்லையென தெரிவித்த பிரதியமைச்சர் மேற்படி சம்பவம் நடைபெற்ற இருவார காலங்களில் இந்தியா சென்றுள்ள ஜனாதிபதி மஹிந்த ராஜபக்ஷ அவர்களுக்கு அங்கு மகத்தான வரவேற்பளிக்கப்பட்டுள்ளது என்பதையும் குறிப்பிட்டார்.

இந்தியாவிற்கு யாத்திரிகர்களாக செல்லும் இலங்கை பக்தர்களுக்கு அங்கு ஏற்படும் அசெளகரியங்கள், பக்தர்கள் தாக்கப்படுகின்றமையை நிறுத்த நடவடிக்கை எடுத்தல் போன்றவை தொடர்பில் ஐ. தே. க. எம். பி. தயாசிறி ஜெயசேகர நேற்றுப் பாராளுமன்றத்தில் சபை ஒத்திவைப்பு வேளை பிரேரணையொன்றை முன்வைத்தார்.

இப்பிரேரணை மீதான விவாதத்திற்குப் பதிலளிக்கையிலேயே பிரதியமைச்சர் இவ்வாறு தெரிவித்தார்.

அவர் இது தொடர்பில் மேலும் தெரிவித்ததாவது:-

அண்மையில் தமிழகத்தில் இலங்கை பக்தர்கள் மீது நடத்தப்பட்ட தாக்குதல் சம்பவம் குறித்து பல்வேறு ஊடகங்கள் பல விதமாக செய்திகளை வெளியிட்டிருந்தன.

உண்மையில் இது புலி ஆதரவாளர்களின் பின்னணியில் அடிப்படைவாத குழு ஒன்றினால் மேற்கொள்ளப்பட்ட சம்பவங்களாகும். இந்திய அரசும் இலங்கை அரசும் அதே போன்று தமிழகத்தில் ஜெயலலிதாவும் கருணாநிதியும் கூட இதற்கு கண்டனத்தை வெளியிட்டிருந்தனர்.

உடனடியாகவே உரிய நடவடிக்கைகள் எடுக்கப்பட்டு சம்பந்தப்பட்டவர்களைக் கைது செய்ய நடவடிக்கை எடுக்கப்பட்டது. இரு நாடுகளுமே தமது நல்லுறவுகளை மேலும் பலப்படுத்துவதில் முனைப்பாகச் செயற்படுகின்றன. அதேபோன்று இருநாட்டு மக்களும் நட்புறவுகளை வளர்த்துக் கொள்வதிலேயே ஆர்வத்துடன் செயற்படுகின்றனர். இதனைக் குழப்பும் விதத்திலேயே சில அடிப்படைவாத குழுக்கள் செயற்பட்டுள்ளன. இந்த சம்பவம் தமிழகத்தில் நடந்த போதும் தமிழக முதல்வர் இதில் நேரடியாக எந்த விதத்திலும் சம்பந்தப்படவில்லை. மாறாக அதனைக் கண்டறிந்துள்ளதுடன், சம்பவத்தில் ஈடுபட்டுள்ளதுடன் சம்பவத்தில் ஈடுபட்டவர்களுக்கு எதிராக நடவடிக்கையும் எடுத்துள்ளார்.

இலங்கைக்கும் இந்தியாவுக்கும் இடையில் நெருங்கிய சிறந்த பலமான நட்புறவு உள்ளது. அந்த நட்புறவை சீர்குலைப்பதற்கே இத்தகைய முயற்சிகள் மேற்கொள்ளப்படுகின்றன.

இலங்கைக்கும் இந்தியாவுக்கும் இடையிலான வர்த்தக நடவடிக்கைகள் 2 பில்லியனைக் கொண்டதாகவே கடந்த காலங்களில் இருந்துள்ளன. தற்போது அது 5 பில்லியன்களாக அதிகரித்துள்ளது. அதே போன்று இலங்கையிலிருந்து இந்தியா செல்வோரின் எண்ணிக்கையும் இலங்கைக்கு வருவோரின் எண்ணிக்கையும் வெகுவாக அதிகரித்துள்ளன.

ஜே. ஆர். ஜயவர்தனவின் காலத்திலேயே புலி பயங்கரவாதத்தை ஒழிக்க வாய்ப்புகள் கிடைத்தன. எனினும் ஜே. ஆர். வெளிநாட்டு அழுத்தங்களுக்கு அடிபணிந்து அச்சந்தர்ப்பத்தை சாத்தியமாக்கத் தவறிவிட்டார். அதன் பின்னர் ஆயுதங்களையும் வழங்கி புலிகளுக்கு ஆதரவளித்த ரணசிங்க பிரேமதாசவைப் புலிகளே வீதியில் படுகொலை செய்தனர்.

அவர்கள் தமிழ், முஸ்லிம், சிங்களவர் என்றில்லை. அனைத்துத் தலைவர்களையும் படுகொலை செய்தனர். புலிகளுக்கு அரசியல் தீர்வுகாணும் எவ்வித அக்கறையும் தேவையும் இருந்ததில்லை.

இலங்கையில் பயங்கரவாதம் ஒழிக்கப்பட்டதில் இந்தியா மட்டுமல்ல முழு ஆசியாவும் பயனடைந்தது. அதற்கான கெளரவம் ஜனாதிபதி மஹிந்த ராஜபக்ஷவுக்கே கிடைத்துள்ளது.

இந்தியா மட்டுமன்றி லண்டன், கனடா என பல்வேறு ஐரோப்பிய நாடுகளிலும் புலிக் கொடிகள் தலைதூக்குகின்றன. எதிர்க் கட்சித் தலைவர் ரணில் விக்கிரமசிங்க உட்பட சில சக்திகள் இத்தகைய செயற்பாடு களுக்கு ஊக்கமளிப்பதைக் குறிப் பிடவேண்டும். இலங்கையிலிருந்து இந்தியா செல்லும் யாத்திரிகர்களுக்கு இந்தியா முழுமையான பாதுகாப்பை வழங்குகிறது.

இலங்கையிலுள்ள இந்திய உயர் ஸ்தானிகருக்கு இவர்கள் அறிவித்து வழங்கப்படும் அறிவுறுத்தல்களுக்குக் கவனம் செலுத்துவது அவசியமாகும்.

நான் இந்தியா சென்றிருந்த சமயம் மத்திய மற்றும் தமிழக அரசியல் தலைவர்களைச் சந்தித்தேன். தமிழ்த் தேசிய கூட்டமைப்பு மற்றும் சகல கட்சிகளுடனும் பேச்சு நடத்தி பாராளுமன்றம் மீதான நம்பிக்கையைக் கட்டியெழுப்ப வேண்டும் என அவர்கள் கேட்டுக்கொண்டனர் எனவும் பிரதியமைச்சர் மேலும் தெரிவித்தார்.