சிரிய இராணுவ தலையீட்டுக்கு அமெ. தொடர்ந்து தீவிர முயற்சி

சிரிய அரசு இரசாயன ஆயுதத்தை பயன்படுத்தியதற்கு அமெரிக்காவிடம் எந்த ஆதாரமும் இல்லை என்ற சிரிய ஜனாதிபதி பஷர் அல் அஸாத் அமெரிக்க தொலைக்காட்சிக்கு வழங்கிய பேட்டியில் குறிப்பிட்டுள்ளார். சி.பி. எஸ். தொலைக்காட்சிக்கு அஸாத் வழங்கிய பேட்டி நேற்று ஒளிபரப்பப்பட்டது. அதில் மேற்கின் தாக்குதலுக்கு தமது நட்பு நாடுகள் பதிலடி கொடுக்கும் என்றும் அவர் உறுதி அளித்தார். சிரியா மீதான இராணுவ நடவடிக்கைக்கு ஆதரவு திரட்டும் முயற்சியில் அமெரிக்க இராஜாங்கச் செயலாளர் ஜோன் கெர்ரி தீவிரமாக ஈடுபட்டுள்ளார். இதனையொட்டி ஐரோப்பா சுற்றுப் பயணம் மேற்கொண்டிருக்கும் அவர் ஐரோப்பிய ஒன்றியம் மற்றும் அரபு நாடுகளின் வெளியுறவு அமைச்சர்களையும் சந்தித்தார். சிரியா தாக்குதலுக்கு அனுமதி அளிப்பது குறித்து அமெரிக்க கொங்கிரஸ் அவையும் விவாதத்தை ஆரம்பித்துள்ளது.

கோடை இடைவேளைக்கு பின்னர் கொங்கிரஸ் அவை உறுப்பினர்கள் நேற்று கூடினர். அவர்கள் ஜனாதிபதி பராக் ஒபாமாவின் சிரியா மீதான மட்டுப்படுத்தப்பட்ட இராணுவ நடவடிக்கை குறித்த பிரேரணையை விவாதத்திற்கு எடுத்துக் கொள்ளவுள்ளனர்.

இது தொடர்பில் செனட் அவையில் நாளை புதன்கிழமை வாக்கெடுப்பு நடத்தப்படும் என எதிர்பார்க்கப்படுகிறது.

கடந்த ஓகஸ்ட் 21ஆம் திகதி டமஸ்கஸ் புறநகர் பகுதியில் இடம்பெற்ற இரசாயன தாக்குதலை சிரிய அரசே நடத்தியதாக குற்றம்சாட்டும் அமெரிக்கா, இந்தத் தாக்குதலில் 1,429 பேர் கொல்லப்பட்டிரு ப்பதாக குறிப்பிட்டுள்ளது.

ஆனால் தமக்கு எதிராகப் போராடும் கிளர்ச்சியாளர்களே இந்தத் தாக்குதலை நடத்தியதாக பஷர் அல் அஸாத் கூறி வருகிறார். கடந்த இரண்டரை ஆண்டுகளாக தொடரும் சிரிய உள்நாட்டு யுத்தத்தில் சுமார் 100,000 பேரளவில் கொல்லப்பட்டி ருப்பதாக ஐ. நா. கணித்துள்ளது.

எனினும் சி. பி. எஸ். தொலைக் காட்சிக்கு வழங்கிய போட்டியில் அஸாத், டமஸ்கஸ் தாக்குதலின் பின்னணியில் தமது படைகள் இருப்பதை நிரூபிக்கமாறு அமெரிக்காவுக்கு சவால்விடுத்துள்ளார். “எனது சொந்த மக்களுக்கு எதிராக நானே இரசாயன தாக்குதல் நடத்தியதற்கான எந்த ஆதாரமும் இல்லை” என்றும் அவர் கூறினார்.

அதேபோன்று சிரியா மீது தாக்குதல் நடத்தினால் தம்முடன் நட்புக் கொண்டிருப்போர் பதிலடி கொடுப்பார்கள் என்றும் அசாத் சுட்டிக்காட்டினார். சிரிய அரசுக்கு சீனா மற்றும் ரஷ்யாவுடன் ஈரானும் ஆதரவாக செயற்படுவதோடு லெபனானின் ஷியா ஆயுதக் குழுவான ஹிஸ்புல்லாவும் இந்தக் கூட்டணியில் உள்ளது.

இந்நிலையில் ரஷ்யா சென்றிருக்கும் சிரிய வெளியுறவு அமைச்சர் வலித் முவல்லம், யுத்தத்தை ஆரம்பிப்பதற்கு அமெரிக்கா இரசாயன ஆயுதத்தை சாக்காக பயன்படுத்துவதாக குற்றம்சாட் டினார். அதே போன்று இந்த பிரச்சினைக்கு அமைதியான தீர்வைத் தவிர மாற்று இல்லை என்று ரஷ்ய வெளியுறவு அமைச்சர் செர்கை லவ்ரொவ் குறிப்பிட்டார். இதனை சாத்தியமாக்க ரஷ்யா தொடர்ந்தும் முயற்சிக்கும் என அவர் குறிப்பிட்டார்.

“எமது நட்பு நாடான அமெரிக்கா ஜெனீவா மாநாட்டை நடத்துவது பற்றி அவதானம் செலுத்த வேண்டுமே ஒழிய யுத்தத்திற்கு தயாராகக் கூடாது” என்று லவ்ரொவ் குறிப்பிட்டார்.

மறுபுறத்தில் லண்டனில் இருந்து கருத்துத் தெரிவித்த ஜோன் கெர்ரி, மோதலை முடிவுக்குக் கொண்டுவர அரசியல் தீர்வு முன்னெடுக்கப்பட வேண்டும் என்ற கோரிக்கையை ஏற்றுக் கொண்டார். ஆனால் செயற்படுவதை விடவும் செயற்படாமல் இருப்பது அபாயத்தை ஏற்படுத்தும் என எச்சரித்தார்.

“எண்ணில் அடங்காத தமது சொந்த மக்களுக்கு எதிராக இரசாயன ஆயுதங்களைப் பயன்படுத்தி ஒழித்துக்கட்ட ஒரு தரப்பு நினைக்கும் போது... அவர்கள் பேச்சுவார்த்தை மேசைக்கு ஒரு போதும் வரமாட்டார்கள்” என்றார் கெர்ரி. ஓகஸ்ட் தாக்குதலின் பின்னணியில் அஸாத் தொடர்புபட்டிருப்பதற்கு மறுக்கமுடியாத ஆதாரங்கள் தம்வசம் இருப்பதாக வெள்ளை மாளிகை குறிப்பிட்டுள்ளது.

இது குறித்து வெள்ளை மாளிகை தலைமை அதிகாரி டென்னிஸ் மக்டொனால் கூறும் போது, “தாக்குதலின் விளைவை வீடியோ ஆதாரங்களில் பார்த்தோம். இப்போது தாக்குதலுக்கு பொறுப்புக்கூற வேண்டியவர்களின் புகைப்படும் அல்லது மறுக்க முடியாத ஆதாரங்களை கேட்பதா? இது ஒன்றும் நீதிமன்றமல்ல. உளவு துறை அவ்வாறு செயற்படுவதுமில்லை” என்றார்.

இந்நிலையில் சிரியா மீதான தலையீட்டுக்கு ஆதரவு திரட்டும் முழு முயற்சியில் ஒபாமா இந்த வாரம் முழுவதும் அவதானம் செலுத்தவுள்ளார். இதற்கு மக்கள் ஆதரவைப் பெற அவர் இன்று வெள்ளை மாளிகையில் இருந்து உரையாற்றவுள்ளார்.

அத்துடன் சிரிய விவகாரத்தில் கொங்கிரஸ் அவையிலும் அவருக்கு பாரிய சவால் காத்திருப்பதாக எதிர்பார்க்கப் படுகிறது. இதனையொட்டி வெள்ளை மாளிகை அதிகாரிகள் கொங்கிரஸ் உறுப்பினர்களுக்கு நாளாந்தம் விளக்கங்களை அளித்து வருகின்றனர்.