திருச்சியில் கேலிக் கூத்தாக முடிந்த மோடிக் கூத்து

பிரதமர் வேட்பாளர் என்று ஆர்.எஸ்.எஸ். அமைப்பினரால் பரிவட்டம் கட்டப்பட்டுள்ள நரேந்திர மோடி திருச்சியில் வந்து குதியாட்டம் போட்டுவிட்டு சென்றுள்ளார். இவரை மோடி என்று அழைப்பதைவிட மோசடி என்று அழைப்பதே பொருத்தமாக இருக்கும். நடிகர் ரஜினிகாந்த்தை பாஜக கூட்டணிக்கு வருமாறும், வாய்ஸ் கொடுக்குமாறும் பாஜக தலைவர்கள் இல.கணேசன், பொன். ராதாகிருஷ்ணன் போன்றவர்கள் நச்சரித்தனர். ஆனால் அவர் இவர்களை கண்டுகொள்ளவேயில்லை. ஆனால் ரஜினி படத்தையும் மோடி படத்தையும் ஒன்றாகப் போட்டு பல இடங்களில் டிஜிட்டல் போர்டு வைத்துள்ளனர்.

உத்தரகாண்ட் வெள்ளத்தின்போது ஒரே நாளில் குஜராத்தைச் சேர்ந்த 15ஆயிரத்திற்கும் மேற்பட்டோரை மோடி சூப்பர்மேன் போல பாய்ந்து சென்று காப்பாற்றியதாக புருடா விட்டனர். ஆனால் அது உண்மையில்லை என்ற உண்மை வெளியானவுடன் ஆளாளுக்கு நான் அவன் இல்லை என்று தப்பித்துக் கொண்டனர். மோடி கூட்டத்திற்கு முஸ்லிம் மக்கள் பெருமளவில் திரண்டு வருவதாக ஷோ காட்டுவதற்கு இவர்களே தொப்பி மற்றும் பர்தா அணிந்தவர்களை அழைத்து வந்தனர். அவர்களுக்கு ஒரே இடத்தில் தொப்பி மற்றும் பர்தா தைத்த விவகாரம் வெளியாகி நாறிக்கொண்டிருக்கிறது.இந்நிலையில்தான் மோடி திருச்சிக் கூட்டத்தில் கர்ஜித்திருக்கிறார். நாடு முழுவதும் மோடி அலை வீசுவதாக பாஜக தலைவர் ராஜ்நாத் சிங் புல்லரித்து போர்வையை எடுத்து போர்த்திக் கொண்டு புரண்டிருக்கிறார். போபாலில் அத்வானியின் காலை தேடிப்பிடித்து மோடி விழ, அவரோ முகத்தை பின்பக்கமாக திருப்பிக் கொண்டார். சொந்தக் கட்சிக்குள்ளேயே மோடியை எதிர்த்து சுனாமி சுழன்றுகொண்டிருக்கிறது என்பதுதான் உண்மை. தமிழ் மொழியின் பெருமை குறித்து மோடி வெகுவாக பேசியிருக்கிறார். ஆனால் பாஜக தலைமையிலான தேசிய ஜனநாயகக் கூட்டணி அரசு இருந்தபோது தேவ பாஷையான சமஸ்கிருதத்திற்கு நிகராக தமிழ் மொழிக்கு செம்மொழி அந்தஸ்து வழங்க மறுத்தனர். சமஸ்கிருத ஆண்டு என்று அறிவித்து பெருந்தொகையை ஒதுக்கியவர்கள் அவ்வாறு தமிழ் ஆண்டு என்று அறிவிக்க மறுத்தனர்.

ஆனால் திருச்சிக்கு வந்தவுடன் மோடிக்கு தமிழ் மொழியின் மீது பாசம் பொங்கி வழிந்து கொள்ளிடத்தையே நிறைத்திருக்கிறது. அமெரிக்காவின் உளவு வேலைகளை வெளியிட்ட ஸ்னோடெனுக்கு ரஷ்யா புகலிடம் கொடுத்ததால் ரஷ்ய மண்ணில் கால் வைக்க மாட்டேன் என்று கூறிவிட்டார் அமெரிக்க ஜனாதிபதி ஒபாமா. இதேபோன்ற தன்மான உணர்ச்சி நமக்கு வேண்டாமா? என்று மோடி அந்தக் கூட்டத்தில் கேட்டிருக்கிறார்.தேசிய ஜனநாயகக் கூட்டணி ஆட்சியில் பாதுகாப்புத்துறை அமைச்சராக இருந்த ஜார்ஜ் பெர்னாண்டஸ் நிர்வாணப்படுத்தப்பட்டு சோதனைக்குள்ளாக்கப்பட்டார். உள்துறை அமைச்சராக இருந்த எல்.கே.அத்வானி அரைநிர்வாணச் சோதனைக்கு ஆளாக்கப்பட்டார். ஆனால் அப்படிப்பட்ட அமெரிக்க மண்ணிற்கு எப்படியாவது சென்றே தீருவேன் என்று இந்த தன்மான வீரர் மோடி விசா கேட்டு கெஞ்சிக் கொண்டிருப்பதை நாடு பார்த்துக் கொண்டுதான் இருக்கிறது. காங்கிரஸ் கட்சியில் பொருளாதாரக் கொள்கைகளை கடுமையாக விமர்சித்திருக்கிறார் மோடி .

ஆனால் அது ஈயத்தைப் பார்த்து இளித்த பித்தளையின் கதையாகவே உள்ளது. காங்கிரஸ் கட்சி பின்பற்றும் அதே கொள்கைகளைத்தான் பாஜகவும் கொண்டுள்ளது. அதே கொள்கைகளைத்தான் மோடியும் குஜராத்தில் தீவிரமாக செயல்படுத்துகிறார். அதனால்தான் குஷியடைந்த முதலாளிகள் மோடியை தூக்கி வைத்து கொண்டாடுகிறார்கள். தமிழர்கள் தன்மானம் மிக்கவர்கள் என்று கூறியுள்ளார் மோடி. தமிழர்கள் மதச்சார்பின்மையில் உறுதி யான நம்பிக்கை கொண்டவர்கள் என்பதையும் அவர் விரைவில் புரிந்துகொள்வார்.