காங்கிரஸ் விதைக்க  பாஜக அறுவடை

செவ்வாய்க்கிரக சுற்றுவட்டப்பாதையில் இணைந்த மங்கள்யான்

மங்கள்யான் விண்கலம் செவ்வாய்க்கிரகத்தின் சுற்றுவட்டப் பாதையில் வெற்றிகரமாக இணைந்ததாக இஸ்ரோ விஞ்ஞானிகள் தெரிவித்துள்ளனர். முதல் முயற்சியிலேயே செவ்வாய்க்கிரகத்தின் சுற்றுவட்டப் பாதைக்குள் விண்கலத்தை செலுத்திய பெருமை இந்தியாவுக்கு கிடைத்துள்ளதாகவும் இந்தியச் செய்திகள் தெரிவிக்கின்றன. உலகமே ஆவலோடு எதிர்பார்த்திருந்த இந்த அரிய நிகழ்வை பிரதமர் நரேந்திர மோடி பெங்களூரில் உள்ள இஸ்ரோ தரைக்கட்டுப்பாட்டு மையத்திலிருந்து பார்வையிட்டதாகவும் செய்திகள் தெரிவிக்கின்றன.

மங்கள்யான் கடந்து வந்த பாதை:

கடந்த வருடம்  நவம்பர் மாதம் 5ஆம் திகதி ஆந்திர மாநிலம் ஸ்ரீஹரிகோட்டாவிலிருந்து பி.எஸ்.எல்.வி – சி 25 ரொக்கெட் மூலம் பிற்பகல் 2.38 மணிக்கு மங்கள்யான் விண்கலம் விண்ணில் செலுத்தப்பட்டது. பூமியின் சுற்றுவட்டப் பாதையில் சுற்றிவந்த மங்கள்யான், நியூட்டன் 440 திரவ நிலை இயந்திரம் இயக்கப்பட்டதன் மூலம் 23,550 கிலோமீற்றருக்கு  மேலே உயர்த்தப்பட்டது. அதைத் தொடர்ந்து பல்வேறு இயந்திரங்கள் படிப்படியாக இயக்கப்பட்டதால் சுற்றுவட்டப் பாதையில் மங்கள்யான் மெல்ல மெல்ல மேல் எழுந்தது.

இந்த நிலையில், கடந்த வருடம் டிசெம்பர் முதலாம் திகதி புவி ஈர்ப்பு விசையிலிருந்து விலகி 66.6 கோடி கிலோமீற்றர் தொலைவில் உள்ள செவ்வாய்க்கிரகத்தை நோக்கி மங்கள்யான் தனது பயணத்தை தொடங்கியது. சந்திரனின் சுற்றுவட்டப் பாதை உள்ளிட்ட முக்கிய பாதைகள் அடுத்தடுத்த நாட்களில் வெற்றிகரமாக மாற்றப்பட்டன. மங்கள்யானின் ஒவ்வொரு அசைவுக்கும் தேவையான ஆணைகளை இஸ்ரோ விஞ்ஞானிகள் பெங்களூரில் உள்ள தரைக்கட்டுப்பாட்டு மையத்திலிருந்து அவ்வப்போது கொடுத்துக்கொண்டே இருந்தனர்.

மங்கள்யான் விண்கலம் கடந்த ஜூன் 12ஆம் திகதி 2ஆவது வழித்தடத்துக்கு மாற்றப்பட்டது. 300 நாட்களை நெருங்கிக்கொண்டிருந்த வேளையில் கடந்த 16ஆம் திகதி மங்கள்யானில் மேற்கொள்ளவேண்டிய தகவல் பரிமாற்ற ஆணைகள் பதிவேற்றம் செய்யப்பட்டன. அதனைத் தொடர்ந்து 3ஆவது வழித்தடத்துக்கு மாற்றம் செய்யப்பட்டது.

செவ்வாய்க்கிரகத்தை நெருங்கிக்கொண்டிருந்த வேளையில் மங்கள்யானில் கடந்த 10 மாதங்களாக செயல்படாமலிருந்த இயந்திரங்களை இயக்கி சோதிக்க இஸ்ரோ விஞ்ஞானிகள் திட்டமிட்டனர். அதன்படி கடந்த திங்கட்கிழமை மங்கள்யான் விண்கலத்தில் உள்ள முக்கிய திரவநிலை நியூட்டன் 440 இயந்திரத்தை சுமார் 4 வினாடிகள் இயக்கினர்.

இதற்கு 0.567 கிலோ எரிபொருள் செலவானது. இந்த சோதனை முயற்சி வெற்றிகரமாக அமைந்தது. இதனையடுத்து ஏற்கெனவே திட்டமிட்டதுபோல், மங்கள்யான் செவ்வாய் சுற்றுவட்டப் பாதையை அடைந்தது. இஸ்ரோ விஞ்ஞானிகள் ஒருவொருக்கொருவர் வாழ்த்து தெரிவித்து மகிழ்ச்சியை பகிர்ந்துகொண்டனர்.

இந்தியா புதிய சாதனை:

மங்கள்யான் விண்கலம் செவ்வாய்க்கிரகத்தின் சுற்றுவட்டப் பாதையில் வெற்றிகரமாக நிலைநிறுத்தப்பட்டதால் இந்த சாதனையைச் செய்த நான்காவது நாடு என்ற பெருமை இந்தியாவுக்கு கிடைத்துள்ளது. அமெரிக்கா, ஐரோப்பா, ரஷ்யா ஆகிய நாடுகள் ஏற்கெனவே இதே சாதனையை படைத்துள்ளன.

முதல் முயற்சியிலேயே செவ்வாய்க்கிரகத்தின் சுற்றுவட்டப் பாதைக்குள் விண்கலத்தை செலுத்திய பெருமையும் இந்தியாவுக்கு கிடைத்துள்ளது.

இதுவரை செவ்வாய்க்கிரக ஆய்வுக்காக அனுப்பப்பட்ட 51 விண்கலங்களில் 21 மட்டுமே வெற்றியடைந்திருப்பது குறிப்பிடத்தக்கது. (த ஹின்டு)