எதிர்க்கட்சித் தலைவர் சம்பந்தன் பிரதம கொரடா அநுரகுமார

8 வது பாராளுமன்றத்தின் எதிர்க்கட்சித் தலைவராக தமிழ்த் தேசிய கூட்டமைப்பின் தலைவர் இராஜவரோதயம் சம்பந்தன் ஏகமனதாக தெரிவு செய்யப்பட்டுள்ளார். அதேநேரம் எதிர்க்கட்சி பிரதம கொரடாவாக ஜே.வி.பியின் தலைவர் அநுரகுமார திசாநாயக்க நியமிக்கப்பட்டுள்ளார். பாராளுமன்றம் நேற்று காலை 9.30 க்கு சபாநாயகர் கரு ஜெயசூரிய தலைமையில் கூடியது இதன் போது சபாநாயகர் இந்த அறிவிப்புக்களை விடுத்தார். எதிர்க்கட்சி தலைவராகத் தெரிவுசெய்யப்படுபவரின் கட்சியைச் சார்ந்த ஒருவரே எதிர்க்கட்சியின் பிரதம கொரடாவாக தெரிவுசெய்யப் படுவது பாராளுமன்ற சம்பிரதாயமாக உள்ளது. சம்பந்தன் எதிர்க்கட்சித் தலைவராக இருந்த போதும், எதிர்க்கட்சியின் பிரதம கொரடாவாக ஜே.வி.பியின் தலைவரான அநுர குமார திசாநாயக்க நியமிக்கப்பட்டுள் ளார்.

இரண்டு பிரதான கட்சிகளும் இணைந்து தேசிய அரசாங்கம் அமைத்திருக்கும் நிலையில் பாராளுமன்றத்தில் மூன்றாவது பெரிய கட்சியாக தமிழ்த் தேசியக் கூட்டமைப்பு காணப்படுகின்றது. அதற்கு அடுத்ததாக ஜே.வி.பி காணப்படுகின்றமை குறிப்பிடத்தக்கது. எதிர்க்கட்சித் தலைவர் பதவிக்கு ஐ.ம.சு.மு சார்பில் எவருடைய பெயரும் முன்மொழியப்பட்டிராத நிலையில் இரா.சம்பந்தனை எதிர்க்கட்சித் தலைவராக நியமிப்பதாக சபாநாயகர் அறிவித்தார். இந்த அறிவிப்பைத் தொடர்ந்து ஐ.ம.சு.முவில் அங்கம் வகிக்கும் மஹிந்த ஆதரவு கட்சிகளின் பிரதிநிதிகள் தவிர ஏனைய சகல உறுப்பினர்களும் மேசையில் தட்டி தமது வாழ்த்துக்களைத் தெரிவித்தனர்.

பிரதான கட்சிகளான ஐக்கிய தேசியக் கட்சியும், ஐ.ம.சு.முவும் இணைந்து அரசாங்கத்தை ஏற்படுத்தியிருப்பதால் பாராளுமன்றத்தில் மூன்றாவதாக கூடுதல் ஆசனங்களைக் கொண்டிருக்கும் கட்சியான தமிழ்த் தேசியக் கூட்டமைப்புக்கு எதிர்க்கட்சித் தலைவர் பதவி வழங்கப்பட்டுள்ளது.

எதிர்க்கட்சித் தலைவர் அறிவிக்கப்பட்டு சில நிமிடங்கள் கழிந்த பின்னர் ஒழுங்குப் பிரச்சினையொன்றை எழுப்பிய விமல் வீரவன்ச எம்.பி, ஐ.ம.சு.முவில் அங்கம் வகிக்கும் 56 பேர் கையொப்பமிட்டு குமார வெல்கமவை எதிர்க்கட்சித் தலைவராக நியமிக்குமாறு ஐ.ம.சு.மு தலைவர் ஜனாதிபதி மைத்திரிபால சிறிசேனவிடம் கையளித்ததாகக் கூறினார். ஐ.ம.சு.மு சார்பில் எவருடைய பெயரும் பிரேரிக்கப் படவில்லையெனக் கூறுவதை ஏற்க முடியாது என்றும் குறிப்பிட்டார்.

இதன்போது ஒழுங்குப் பிரச்சினை யொன்றை எழுப்பிப் பதிலளித்த சபை முதல்வர் லக்ஷ்மன் கிரியல்ல, பாராளுமன்ற நிலையியற் கட்டளைக்கு அமைய சபாநாயகர் எதிர்க்கட்சித் தலைவர் யார் என்பதை அறிவித்துள்ளார். சபாநாயகரின் தீர்ப்பை சவாலுக்கு உட்படுத்த முடியாது என்றும் கூறினார். இதற்குப் பதிலளிக்கும் வகையில் கருத்துத் தெரிவித்த விமல் வீரவன்ச, சபாநாயகரின் தீர்ப்பை தாம் சவாலுக்கு உட்படுத்தவில்லையென்றும், ஐ.ம.சு.மு சார்பில் ஒருவருடைய பெயரும் பரிந்துரைக்கப்படவில்லையென்ற கருத்துக்கே பதிலளிப்பதாகவும் கூறினார். இதனைத் தொடர்ந்து சபையில் சலசலப்பு ஏற்பட்டது.

இதன்போது ஒழுங்குப் பிரச்சினை எழுப்பிய பிரதமர் ரணில் விக்ரமசிங்க, சபாநாயகருடைய தீர்ப்பை எவரும் சவாலுக்கு உட்படுத்த முடியாது. எதிர்க் கட்சித் தலைவருக்கு ஒருவருடைய பெயரை பிரேரிப்பதாயின் அதனை ஜனாதிபதியிடம் கையளிப்பது முறையாகாது. சபாநாயகரிடமே அதனை வழங்க வேண்டும். அதேநேரம் சபா நாயகரின் தீர்ப்பை சவாலுக்கு உட்படுத்து வதாயின் சபாநாயகருடைய பதவியும் இல்லாமல் போய்விடும் என்றார். இதனையடுத்து சபையில் ஏற்பட்டிருந்த சர்ச்சை முடிவுக்குக் கொண்டுவரப் பட்டது.

இதேவேளை, அமைச்சரவையின் எண்ணிக்கையை அதிகரிப்பது தொடர்பாக சபையில் எழுந்த சர்ச்சை குறித்து ஆராய்வதற்காக சபை 11.09 மணிக்கு தற்காலிகமாக இடைநிறுத்தப்பட்டது. இதன்போது எதிர்க்கட்சித் தலைவராக தெரிவுசெய்யப்பட்ட இரா.சம்பந்தனுக்கு ஆளும் கட்சி மற்றும் எதிர்க்கட்சி உறுப்பினர்கள் அவருடைய ஆசனத்துக்குத் தேடிச்சென்று வாழ்த்துக்களைத் தெரி வித்தனர். எனினும், ஐ.ம.சு.முவில் அங்கம் வகிக்கும் விமல் வீரவன்சவோ, வாசுதேவ நாணயக்காரவோ அல்லது தினேஷ் குணர்வத்தனவோ சம்பந்தனுக்கு வாழ்த்துக்களைத் தெரிவித்திருக்கவில்லை. நிமல் சிறிபால.டி.சில்வா, ஜோன் செனவிரட்ன, மஹிந்த சமரசிங்க உள்ளிட்ட ஐ.ம.சு.முவின் சிரேஷ்ட உறுப்பினர்கள் பலரும் சம்பந்தனுக்கு கைலாகு கொடுத்து வாழ்த்துக்களைத் தெரிவித்தனர்.

எதிர்க்கட்சித் தலைவர் விவகாரம் தொடர்பில் ஐ.ம.சு.முவின் பங்காளிக் கட்சிகளைச் சேர்ந்த விமல் வீரவன்ச மற்றும் தினேஷ் குணவர்த்தன ஆகியோரை சபாநாயகர் கரு ஜெயசூரிய தனியாக அழைத்து விளக்கமளித்திருந்தமை குறிப்பிடத்தக்கது.

அமைதி சமாதானம் ஜனநாயகம்

www.sooddram.com