புலிகள் இயக்கத்தின் சர்வதேச விவகாரங்களுக்கான முன்னாள் பொறுப்பாளரும் தற்போது இலங்கை அரசின் பிடியில் உள்ளவருமான குமரன் பத்மநாதனை (கே.பி.) சிரேஷ்ட ஊடகவியலாளர் டி.பி.எஸ். ஜெயராஜ் 'டெய்லிமிரர்' ஆங்கில பத்திரிகைக்காக பேட்டி கண்டார்.(நான்காவது பாகம்)

புலிகள் இயக்கத்தின் சர்வதேச விவகாரங்களுக்கான முன்னாள் பொறுப்பாளரும் தற்போது இலங்கை அரசின் பிடியில் உள்ளவருமான குமரன் பத்மநாதனை (கே.பி.) சிரேஷ்ட ஊடகவியலாளர் டி.பி.எஸ். ஜெயராஜ் 'டெய்லிமிரர்' ஆங்கில பத்திரிகைக்காக பேட்டி கண்டார்.

அதன் நான்காவது பாகம் நேற்று வெளியாகியது. அதைத் தமிழில் தருகின்றோம்.

கேள்வி : அண்மைக் காலத்தில் நடந்த முக்கிய நிகழ்வுகள் பற்றி விளக்கமாக கூறினீர்கள். நன்றி. இவ்விடயங்கள் தொடர்பாக புதிய விளக்கங்களை நீங்கள் தந்துள்ளீர்கள். ஆனால் இப்போது நான் சமகால நடப்புகள் பற்றி கேட்க விரும்புகிறேன்? இந்த அரசுடனான, குறிப்பாக பாதுகாப்பு அமைச்சின் செயலாளரான கோத்தாபய ராஜபக்ஸவுடனான உங்கள் தொடர்புகள் பற்றி அறிய விரும்புகிறேன். நீங்கள் ஏற்கனவே உங்களை கைது செய்தமை, பாதுகாப்பு செயலாளருடனான உங்கள் முதல் சந்திப்பு என்பன பற்றி கூறியிருக்கிறீர்கள். நீங்கள் இருவரும் நல்லதொரு உறவை பேணுகிறீர்கள். ஆனால் இதைப் பற்றி பல குற்றச்சாட்டுக்கள் வருகின்றன. பல எதிர்க்கட்சி தலைவர்களும் ஊடகங்களின் ஒரு பகுதியும் உங்களிடையே இரகசியமான சந்தேகத்துக்கிடமான சில கூட்டுச் செயற்பாடுகள் இடம்பெறுகின்றன என்று குற்றஞ் சுமத்துகின்றனர். நீங்கள் என்ன சொல்லுகிறீர்கள்?

பதில் : நான் கூறுவது உண்மையானது. இது மிகவும் எளிமையான கதை..... எமக்கிடையில் எந்த விதமான உடன்பாடும்இல்லை. எம்மிடையே இருந்தது புரிந்துணர்வு மட்டுமே. நேர்மையான புரிந்துணர்வு. நாம் இருவரும் சில பொது இலக்குகளை கொண்டுள்ளோம். எனவே நாம் அந்த பொது நோக்கங்களுக்காக இணைந்து வேலை செய்கின்றோம். இதுதான் எம்மிடையிலான உடன்பாடு. வேறேதுமில்லை.

கேள்வி: தயவுசெய்து இதை இன்னும் விளக்கமாக கூறமுடியுமா? இந்தக் கருத்துடன்பாடு என்னவென்று குறிப்பிட்டுச் செல்லுங்கள்?

பதில் : தமிழீழ விடுதலைப் புலிகளுடனான யுத்தம் இப்போது முடிந்துவிட்டது. யுத்தத்தை திட்டமிட்டு ஒருங்கிணைந்து நடத்திய பாதுகாப்பு அமைச்சின் செயலாளர் கோட்டாபய ராஜபக்ஸ இப்போது வேறு பாத்திரமொன்றை ஏற்றுள்ளார். அவர் சமாதானத்தை பேணிப் பாதுகாக்க வேண்டியும், எதிர்காலத்தில் ஏற்படக் கூடிய வன்முறைக் கிளர்ச்சிகளை தடுக்க வேண்டியும் உள்ளது. யுத்தத்தால் உருவான பிரச்சினைகளுக்கு இணக்கமான முறையில் தீர்வு காண நிறையவே செய்யவேண்டியுள்ளது என்பதை அவரும், ஜனாதிபதி மஹிந்த ராஜபக்ஸவின் அரசினரும் உணர்ந்துள்ளனர். முன்னாள் புலி உறுப்பினர்கள் பலர் தடுத்து வைக்கப்பட்டுள்ளனர். மீள்குடியமர்த்தப்படும் அகதிகளுக்கு புனர்வாழ்வு அளிக்கப்பட வேண்டும். வழமை நிலை திரும்ப வேண்டும். ஜனாதிபதியும், அவரது சகோதரர்களும் இந்தப் பிரச்சினைகளுக்கு தீர்வுகளை விரும்புகின்றனர். அதே சமயம் நானும் இந்த பிரச்சினைகள் பற்றி கரிசனையாக உள்ளேன். இளைஞர்களும், யுவதிகளும் இயன்றளவு விரைவாக விடுவிக்கப்படுகின்றமையை நானும் விரும்புகின்றேன். இவர்களுக்கு புதுவாழ்வு வழங்க வேண்டும். இடம்பெயர்ந்தவர்கள் மீளக் குடியமர்த்தப்பட வேண்டும்-அவர்களுக்குப் புனர்வாழ்வு அளிக்கப்படவேண்டும் என நான் விரும்புகின்றேன். இதானால்தான் இந்த விடயங்களில் எம்மிடையே உடன்பாடு காணப்படுகின்றது. இந்த விடயங்களில் நான் ஓரளவு ஈடுபடுகின்றமைக்கு பாதுகாப்பு செயலாளர் சந்தர்ப்பம் தந்திருக்கின்றார். இதுதான் எமக்கிடையிலான கருத்துடன்பாடு .

கேள்வி: ஆனால், இந்த விடயங்களில் ஈடுபடுகின்றமைக்கு உங்களுக்கு இப்படியான வாய்ப்பு ஏன் வழங்கப்படுகின்றது என்பதே பலருக்கும் புதிராக உள்ளது.?

பதில் : பாதுகாப்பு செயலாளர் அல்லது அரசின் பொறுப்பு வாய்ந்த அமைச்சர் ஒருவர் அல்லது ஒரு உத்தியோகத்தரே இதற்கு பதிலளிக்க மிகப் பொருத்தமானவர் என நான் நினைக்கின்றேன்.

கேள்வி: இந்த வாய்ப்பு உங்களுக்கு ஏன் வழங்கப்பட்டது எண்ணுகின்றீர்கள் என்று எனக்குக் கூறுங்கள்?

பதில் : அவர்கள் ஒரு சிக்கலான, இக்கட்டான நிலைமையில் உள்ளனர் என நான் நினைக்கின்றேன். அவர்கள் இடம் பெயர்ந்தவர்களையும், தடுப்புக் காவலில் உள்ளவர்களையும் இயன்றளவு விரைவாக புனர்வாழ்வு அளிக்க அல்லது விடுவிக்க விரும்புகின்றனர். இது தாமதம் ஆக ஆக, சர்வதேச விமர்சனமும் அதிகரித்துக்கொண்டே செல்லும். அதே சமயம் இன்னொரு பக்கத்தில் அவர்கள் பாதுகாப்பு விடயங்களில் எச்சரிக்கையாகவும் செயற்படுகின்றனர். பிரிவினைவாதம் மீண்டும் உயிர்ப்பிக்கப்படும் வகையில் அல்லது அரசியல் சார்ந்த வன்முறை மீண்டெழும் வகையில் உள்நோக்கம் கொண்ட பகுதியினரால் இந்த மீள்குடியேற்றப்பட்ட விடுவிக்கப்பட்ட மக்கள் பயன்படுத்தப்படக் கூடாது என அவர்கள் எண்ணுகின்றார்கள். இதனால்தான் அரச அதிகாரங்கொண்டோர் கவனமாக உள்ளனர். இதனால் விடயங்கள் தாமதமாகின. இந்த மெதுவான நகர்வு அரசு மீதான விமர்சனத்துக்கும் வழிவகுத்துள்ளது. எனவே, அரசு பாதுகாப்பு நலன்களை பேணும் அதேசமயம் இந்த பிரச்சினைகளுக்கு விரைவான தீர்வு காண உதவக்கூடிய வழிவகைகளை தேடிக் கொண்டிருக்கிறது. இந்த இடத்தில்தான் நான் வருகிறேன் என நினைக்கிறேன். இந்த விடயங்களில் ஒரு அறிய பாத்திரத்தை வகிக்க அவர்கள் எனக்கு ஒரு சந்தர்ப்பத்தை தருகின்றனர். இது இராமாயணத்தில் கடலுக்கு குறுக்காக அணை கட்ட உதவிய அணிலின் பாத்திரம் போன்றதாகும். இது எனது வாழ்க்கையில் அர்த்தமுள்ள ஒன்றை செய்கின்றமைக்கு எனக்கு வாய்ப்பை அளிக்கின்றது. எனவே நான் மகிழ்ச்சியாக இருக்கின்றேன்.

கேள்வி : ஏன் ஒரு அரச சார்பற்ற நிறுவனங்கள், தமிழ் கட்சிகள் ஆகியவற்றுக்கு இச்சந்தர்ப்பம் வழங்கப்படவே இல்லை?

பதில் : மீண்டும் சொல்கிறேன், நான் கேள்விப்பட்ட விடயங்களை வைத்துக்கொண்டு, நான் என்ன நினைக்கின்றேன் என்பதை மட்டும்தான் நான் கூறமுடியும். கடந்த காலத்தில் பெற்ற விரும்பத் தகாத அனுபவங்கள் காரணமாக அநேகமான அரச சார்பற்ற நிறுவனங்களை அரசு நம்பவில்லை என நான் நினைக்கின்றேன். இதனால்தான் பல அரச சார்பற்ற நிறுவனங்களுக்கு நாட்டில் மட்டுப்படுத்தப்பட்ட அனுமதிதான் வழங்கப்பட்டிருக்கிறது . தமிழக்கட்சிகளும் முன்னர் கிடைத்த வாய்ப்புகளை தவறாக பயன்படுத்தின அல்லது துஷ்ப்பிரயோகம் செய்தன. இதனால் அவர்கள் மீதும் அரசினர் நம்பிக்கையற்று உள்ளனர். புனர்வாழ்வு அளிக்கப்படும் முன்னாள் புலிகள் ஆயிரக்கணக்கில் உள்ளனர். இவர்களது பிரச்சினை பாதுகாப்பு மற்றும் அரசியல் என்பவற்றுடன் தொடர்புறுகின்ற, மிகவும் கவனமாகக் கையாள வேண்டிய விடயமாக உள்ளது. விமர்சனங்கள் வருகின்றபோதும் அரசு இந்த விடயத்தில் எந்த வித்திலும் ஆபத்துக்கு முகங்கொடுக்கும் நிலை வருவதை விரும்பவில்லை. பழைய புலி உறுப்பினர்களுடன் கலந்து பழக சகல நிறுவனங்களையும் அனுமதித்தால் பாதுகாப்பு சிதைவடையும். ஆபத்துக்கு முகங்கொடுக்கும் நிலைமை ஏற்படும். இப்படியான நிலைமையில் எனக்கு ஒரு இடம் கிடைத்துள்ளது. புனர்வாழ்வுக்கு தயாராக்கப்படும் முன்னாள் புலிகளுடனும் வேறு பிரயோசனப்படக்கூடிய சிலருடனும் கலந்து பழகுகின்றமைக்கு என்னை அனுமதிக்க அரசு தயாராக உள்ளது. அவர்கள் என்னை நம்புகின்றனர். அத்துடன் நான் அவர்களிடம் பிடிப்பட்டுள்ளமையால் என்னையிட்டுப் பயப்பட வேண்டியதில்லை. என்னைப் பொறுத்த வரையில் எனது மக்களுக்கு குறிப்பாக முன்னை நாள் புலி உறுப்பினர்களுக்கு சேவை செய்யக் கிடைத்த இந்த வாய்ப்பை நான் விருப்போடு ஏற்றுக்கொள்கிறேன்.

கேள்வி : இந்த வகையில் உங்களுக்கு உற்சாகம் அளிப்பது என்ன?

பதில் : முன்னாள் புலித் தலைவர்களில் மிக மூத்தவராக நான் இப்போது இருக்கின்றேன் என நினைக்கின்றேன். இன்றைய தமிழ் மக்களின் பரிதாப நிலையை காணும்போது நான் மிகுந்த குற்றவுணர்வுக்கு ஆளாகின்றேன். இந்த இளைஞர், யுவதிகளின் க தியை பார்க்கும்போது எனக்கு மிகுந்த கவலையாகவும் துன்பமாகவும் இருக்கிறது. இந்த பிள்ளைகளில் பலர் விருப்பத்துக்கு மாறாக வலுக்கட்டாயமாக இயக்கத்தில் சேர்க்கப்பட்டவர்கள் என்பதை என்னால் மறுக்க முடியாது. வன்னிப்பிரதேச சாதாரண மக்களை (சிவிலியன்) காணும்போது நான் பெரிதும் கழிவிரக்கம் கொள்கின்றேன். அவர்கள் ஒரு காலத்தில் செழிப்போடு வாழ்ந்தவர்கள். இப்போது போரின் காரணமாக துன்பகரமான வறுமையில் உள்ளனர். இதனால்தான் நான் அவர்களுக்கு இயன்றளவு உதவி செய்து சிறிதாவது பிராயச்சித்தம் செய்ய விரும்புகின்றேன். இன்னுமொரு காரணம் உள்ளது. நான் சென்ற வருடம் கேள்விப்பட்ட கதை. பிரபாகரனும் வேறு தலைவர்களும் சென்ற மே மாத நடுப்பகுதியில் கூடிப் பேசிய ஒரு சந்தர்ப்பத்தில் "எமது மக்களுக்கும், உறுப்பினர்களுக்கும் என்ன நடக்கும்?" என ஒருவர் கேட்டிருக்கின்றார். அதற்கு "கே.பி. இருக்கிறார்,அவர் மக்களையும் உறுப்பினர்களையும் கவனித்துக்கொள்வார் என பிரபாகரன் கூறினாராம். இது உண்மையில் நடந்த சம்பவம்தான் என்றும் பிரபாகரன் இவ்வாறு வெளிப்படையாக என்னைக் குறிப்பிட்டார் எனவும் உறுதி செய்யும் சந்தர்ப்பம் சில மாதங்களுக்கு முன்தான் எனக்குக் கிடைத்தது. எனக்கு பொறுப்பளிக்கப்பட்ட நிறைவான பணி இந்த மக்களை கவனித்து கொள்வதுதான். இவைதான் நான் ஊக்கத்துடன் இருக்கக் காரணம் நான் வடக்கு கிழக்கு புனர்வாழ்வு மற்றும் அபிவிருத்திக்கான நிறுவனத்தை (NERDO) தோற்றுவித்தேன். இது ஜுலை 06, 2010 இல் ஒழுங்கு முறையாக பதிவு செய்யபட்டது. எமது நிறுவனத்துக்கு வடக்கு, கிழக்கில் நடமாடவும், மீள்குடியமர்த்தப்பட்டவர்களுடனும் புனர்வாழ்வு அளிக்கப்படுவோருடனும் கலந்து பழகவும் பாதுகாப்பு அனுமதி தரப்பட்டுள்ளது.

கேள்வி: பாதுகாப்பு செயலாளரின் ஆசீர்வாதத்துடன்தானே NERDO இந்த அங்கீகாரத்தையும் நடமாட்ட சுதந்திரத்தையும் பெற்றுக்கொண்டது?

பதில்: ஆம் நாம் சகல விதிமுறைகள், நடைமுறைகளுக்கூடாகவும் சென்று விண்ணப்பித்தோம். ஆனால் பாதுகாப்புச் செயலாளரின் ஆதரவின்றி இவ்வளவு விரைவான அனுமதி கிடைத்திருக்கும் என நான் நினைக்கவில்லை.

கேள்வி: முன்னைய விடயத்துக்கு மீண்டும் போக அனுமதியுங்கள். நீங்கள் தடுத்து வைக்கப்பட்டுள்ள ஒருவராக இருந்த போதும் கோட்டாபய ராஜபக்ஸவுடனான உங்கள் விசேடமான உறவின் காரணமாக மட்டுமே, நீங்கள் சில செயல்களில் சுதந்திரத்தை அனுபவிக்க முடிகின்றது என்பது தெட்டத் தெரிகின்றது. நீங்கள் முன்னர் கூறினீர்கள் உங்களுக்கிடையே உடன்பாடு எதுவுமில்லை. மக்கள் நேய பணிகளை நிறைவேற்ற வேண்டும் என்பதே உங்களிடையேயான கருத்துடன்பாடாக இருக்கின்றது என்று. இப்படியான மிகவும் நல்ல உறவு எப்படியான சூழலில் பரிணமித்தது? தொடர்ந்து எப்படி வளர்கின்றது என நீங்கள் விளக்குவீர்களா?

பதில்: நல்லது. நான் எப்படி மலேசியாவில் பிடிப்பட்டேன்?, கொழும்புக்கு எப்படிக் கொண்டு வரப்பட்டேன்?, எமது முதல் சந்திப்பு எவ்வாறு இருந்தது? என்பன பற்றி முன்னரே கூறியிருக்கிறேன். அதன்பின் தொடர்ந்து நடந்த மூன்றாவது சந்திப்பில் கோட்டாபய ராஜபக்ஸ நான் எதிர்காலத்தில் என்ன செய்ய விரும்புகின்றேன் என்பது பற்றி நேரடியான கேள்விகளை என்னிடம் கேட்டார். அப்போது நான் என்னைப் பொறுத்தவரை யுத்தம் முடிந்துவிட்டது என்றும் ஈழத்துக்கான ஆயுதப் போராட்டத்தை மீண்டும் தொடங்குவது இனிமேல் முடியாதது என்பதை பூரணமாக உணர்ந்துவிட்டேன் என்றும் தெளிவாகக் கூறினேன். மக்களின் கதி பற்றி நான் மிகவும் குற்றவுணர்வுடன் உள்ளேன் என்றும் எனக்கு ஒரு வாய்ப்புத் தரப்படுமானால் நான் இந்த மக்களுக்கு சிறு அளவிலாவது குறைந்த பட்சம் பிராயச்சித்தம் என்ற வகையில் உதவி செய்ய விரும்புகிறேன் என்றும் கூறினேன். அப்போது பாதுகாப்பு செயலாளர் இடம்பெயர்ந்தோரை விரைவில் விடுவித்து மீள்குடியேற்றம் செய்யவும், முன்னாள் புலி உறுப்பினர்களுக்கு புனர்வாழ்வு அளிக்கவும் அவரும் விரும்புகிறார் எனக் கூறினார். இந்த வகையில் காரியங்களை விரைவுபடுத்த நம்பத் தகுந்த ஆட்கள் அவருக்கு தேவைப்படுகிறது எனவும் கூறினார். இந்த செயன்முறையில் அவருக்கு உதவ நான் விரும்புவேனா? என என்னிடம் அவர் கேட்டார். நான் ஆம் எனக் கூறினேன். சில நாட்களின் பின் இராணுவ புலனாய்வு தலைவர் ஜெனரல் கபில ஹெந்தவிதாரண எனது வேண்டுகோளை அவரும், பாதுகாப்பு செயலாளரும் விரிவாக ஆராய்ந்தனர் என்றும் ,அப்போது ஒரு சாதகமான தீர்மானம் எடுக்கப்பட்டது என்றும் என்னிடம் தெரிவித்தார். அதன்பின் இந்த தொடர் நடவடிக்கைகளில் பங்குகொள்ளும் வகையில் சுதந்திரமான செயற்பாட்டுக்கு எனக்கு அனுமதி கிடைத்தது.