காணி, பொலிஸ் அதிகாரங்களை ன்னிடமிருந்து எவரும் பறிக்க முடியாது - ஜனாதிபதி மஹிந்த ராஜபக்ஷ

வடபகுதி ஜனநாயக ரீதியில் ஆளப்பட வேண்டும் என்பதில் அரசு அக்கறை

வடமாகாண சபைத் தேர்தல் தொடர்பாக அரசாங்கம் சொல்ல விரும்புவது என்ன?

முப்பது வருட கால ஏகாதிபத்திய பயங்கரவாத செயற்பாடுகளுக்கு முற்றுப்புள்ளி வைத்த எமது அரசாங்கம் வடக்கில் மக்கள் ஜனநாயக ரீதியில் ஆளப்பட வேண்டும் என்பதில் உறுதியாக உள்ளது. புலிகளின் மறைவிற்குப் பின்னர் நடைபெற்ற ஜனாதிபதித் தேர்தல், பாராளுமன்றத் தேர்தல் மற்றும் உள்ளூராட்சி சபைத் தேர்தல்களில் ஜனநாயக ரீதியில் அம்மக்கள் செயற்பட சந்தர்ப்பத்தை வழங்கினோம். இப்போது மீதமாகவுள்ள மாகாண சபைத் தேர்தலும் நடத்தப்படுகிறது. மக்கள் தமது பிரதிநிதிகளைத் தெரிவு செய்ய மீண்டுமொரு சந்தர்ப்பம் வழங்கப்பட்டுள்ளது. யுத்தம் முடிவிற்குக் கொண்டுவரப்பட்ட பின்னர் எமது அரசாங்கம் வடக்கில் பாரிய அபிவிருத்திகளை மேற்கொண்டு வருகிறது.

யுத்தத்தின்போது சரணடைந்த மற்றும் கைது செய்யப்பட்ட சுமார் 14,000 புலி உறுப்பினர்களுக்குப் புனர்வாழ்வளித்து சமூகத்தில் அவர்களை இணைத்துள்ளோம்.

புலிகளின் ஊடகப் பேச்சாளராக இருந்த தயா மாஸ்டர் ஆளுங்கட்சியின் வேட்பாளர் பட்டியலில் இணைக்கப்படவிருந்த நிலையில் இறுதி நேரத்தில் அவரது பெயர் நீக்கப்பட்டதாக அறிவிக்கப்பட்டது. இதற்குக் காரணம் என்ன?

எந்தவொரு சபைக்குமான வேட்பாளர் பட்டியல் தயாரிப்பிலும் நான் தலையிடவில்லை. அது கட் சியின் நியமனக் குழுவினாலேயே மேற்கொள்ளப்பட்டது. அது அவர்களது தீர்மானம்.

அதற்காக தயா மாஸ்டர் தகுதியற்றவர் என்று பொருளல்ல. அவரை விடவும் தகுதியானவர்கள் இருந்தமையால் இவரது பெயர் பட்டியலில் இடம்பெறாது விடுபட்டிருக்கலாம். ஆனாலும் அவர் தேர்தலில் எமது வேட்பாளர்களுக்கு ஆதரவாக செயற்படுவதாக அறிவித்துள்ளார்.

தமிழ்க் கூட்டமைப்பின் முதலமைச்சர் வேட்பாளரான சி.வி.விக்னேஸ்வரன், 13ஆவது திருத்தச் சட்டத்தை அமுலாக்குவதற்கு மக்கள் தனக்கு ஆணை வழங்க வேண்டும் என்று கோரிக்கை விடுத்துள்ளார். தேர்தலில் வடமாகாண சபையை தமிழ்க் கூட்டமைப்பு கைப்பற்றினால் விளைவு என்னவாகும்?

ஓன்றுமே நடக்காது. இதனை விடவும் பாரதூரமான நெருக்கடிகளுக்கும், சவால்களுக்கும் நாம் முகங்கொடுத்துள்ளோம். அதனால் இது ஒன்றும் பெரிய விடயமல்ல. ஒருவேளை தமிழ்க் கூட்டமைப்பு வெற்றி பெற்று விக்னேஸ்வரன் முதலமைச்சராக வருவாரேயானால் அவருடன் இது தொடர்பாக பேசுவதற்கு நான் தயாராகவே உள்ளேன்.

தமிழ்க் கூட்டமைப்பு வடமாகாண சபையைக் கைப்பற்றி காணி, பொலிஸ் அதிகாரங்களைக் கோரினால் அரசாங்கத்தின் நிலைப்பாடு என்னவாக இருக்கும்?

சட்டப்படி காணி, பொலிஸ் அதிகாரங்கள் என்னிடமே உள்ளன. அரசியலமைப்பிலும் அது மிகத் தெளிவாகக் குறிப்பிடப்பட்டுள்ளது. அதனால் என்னிடமிருந்து இந்த அதிகாரங்களை இலகுவில் எவராலும் பறித்துவிட முடியாது. எனது வரலாற்றில் அத்தகையதொரு மாற்றம் ஒருபோதும் ஏற்படாது.

யுத்தத்தில் காணாமல் போனோர் தொடர்பில் ஆராயும் பொருட்டு தாங்கள் ஜனாதிபதி ஆணைக்குழு ஒன்றினை நிறுவ முன்வந்தமைக்கு சர்வதேச அழுத்தமே காரணம் என வெளிநாட்டு ஊடகங்கள் பிரசாரம் செய்துள்ளன. இதில் உண்மை உள்ளதா?

நான் நல்லது செய்ய முற்பட்டால் அழுத்தம் காரணம் என்று கூறுவது இப்போது வழமையாகிவிட்டது. உண்மையில் 1980 களில் காணாமற்போனோர் குறித்து அன்று பேசியவன் நான்தான். அதேபோன்றுதான் இதுவும். எனது கொள்கை எப்போதுமே மாறுபடாது. எனக்கு எந்த அழுத்தமும் எவராலும் விடுக்கப்படவில்லை.

எதிர்க்கட்சியிலுள்ள மேலும் பலர் அரசாங்கத்தின் பக்கம் வரவுள்ளதாக கூறப்படுகிறது. இன்னும் எத்தனை எம்.பிக்கள் இவ்வாறு வரவுள்ளனர்?

தற்போது நான் அதற்கான கதவினை மூடும்படி கூறியுள்ளேன். ஆனாலும் கண்டி, குருநாகல் போன்ற பகுதிகளிலிருந்து பலர் எம்முடன் இணைந்து கொள்ள விருப்பம் தெரிவித்துள்ளனர். அதேபோன்று வடக்கிலிருந்து தமிழ்க் கூட்டமைப்பின் உள்ளூராட்சி சபை அங்கத்தவர்கள் பலரும் என்னை வந்து சந்தித்து எமக்கு ஆதரவு வழங்குவதாக கூறிவருகின்றனர்.

இம்முறை முதலமைச்சர் வேட்பாளர் இவர்தான் என்று அறிவிக்காமலேயே தங்களது கட்சி வேட்பாளர்கள் களமிறக்கப்பட்டுள்ளனர். இறுதியில் முதலமைச்சரை எவ்வாறு தெரிவு செய்வீர்கள்?

இம்முறை அப்பொறுப்பை நான் மக்களிடமே விட்டுள்ளேன். இன்றுவரை அதிக விருப்பு வாக்குகளைப் பெறுபவரே முதலமைச்சராக நியமிக்கப்பட்டு வருகிறார். அதனால் பொறுத்திருந்து பார்ப்போம்.

வடபகுதி கடற்பரப்பில் இந்திய மீனவர்கள் அத்துமீறி மீன்பிடித்து வருவதாக பரவலான குற்றச்சாட்டு எழுந்துள்ளது. இது குறித்து அரசாங்கம் எடுத்துள்ள நடவடிக்கை என்ன?

இலங்கை கடல் எல்லைக்குள் வெளியார் வந்து மீன் பிடித்தால் கைது செய்யுமாறு நாம் உத்தரவிட்டுள்ளோம். அவ்வாறு நாம் நடவடிக்கை எடுக்கும் சந்தர்ப்பங்களில் எமது கடற்படையினர் அப்பாவிகளான தமது நாட்டு மீனவர்களைக் கடலில் வைத்துத் தாக்குவதாகப் பொய்ப்பிரசாரம் செய்கின்றனர். இது குறித்து இந்திய அரசிற்குத் தெளிவுபடுத்தியுள்ளோம்.

யுத்த காலத்தில் எமது மீனவர்கள் கடலுக்குச் செல்வதில் கட்டுப்பாடுகள் இருந்தன. அதனை இந்திய மீனவர்கள் தமக்குச் சாதகமாகப் பயன்படுத்தி வந்தமையே உண்மையான வரலாறு. இப்போது யுத்தம் முடிந்து விட்டதே.

எமது மீனவர்கள் எமது கடலுக்குச் சென்று மீன் பிடிப்பதையே அவர்கள் தடுக்க முனைகிறார்கள். முடிந்தளவு சமரசமாகச் செல்வோம், எல்லை தாண்டி வந்தால் கைது செய்யுமாறு உத்தரவிடப்பட்டுள்ளது. அதேபோன்று எமது மீனவர்களும் எல்லை தாண்டிச் சென்றால் கைது செய்யுமாறு இந்திய அரசிற்கு அறிவித்துள்ளோம்.

பொதுநலவாய உச்சி மாநாடு குறித்த சரியான தகவல்கள் பொதுமக்களுக்கு உரிய முறையில் சென்றடைவதாகத் தெரியவில்லை. இதனைச் சீர் செய்ய ஏதாவது நடவடிக்கை எடுப்பீர்களா?

இம்மாநாடு தொடர்பாக எதிர்மறையானதும், பொய்யானதுமான கருத்துக்களையே பல ஊடகங்கள் வெளியிடுகின்றன. இதனைவிடுத்து ஆக்கபூர்வமாக கருத்துக்களையே ஊடகங்கள் எடுத்துச் செல்ல வேண்டும்.

இது எமது நாடு தொடர்பான சர்வதேச நாடுகள் சிலவற்றின் போலிப் பிரசாரங்களை முறியடித்து உண்மை நிலையை வெளிப்படுத்த எமக்குக் கிடைத்த அரிய வாய்ப்பாகக் கொள்ள வேண்டும். இன்று எமது நாட்டில் அமைதியான சமாதானச் சூழல் காணப்படுகின்றபோதிலும் சில வெளிநாடுகளில் இன்னமும் இங்கு யுத்தம் நடைபெறுவது போன்று பயண எச்சரிக்கை விடுக்கப்படுகிறது. இத்தகைய நிலைமையை இம்மாநாடு மூலமாக மாற்றியமைக்க நாம் முன்வர வேண்டும்.

(தே. செந்தில் வேலவர்)