காலங்கள் இனங்கள் மறக்கமுடியாத கனிவுடைய அன்னை நாகம்மா . . . . . !

புத்தபிரானின் வருகை மணிமேகலையின் வருகை என்ற ஒப்பற்ற சந்தர்ப்பங்களினால் புவிப் பந்தில் மதிப்புயர்ந்து நிற்கின்ற நயினை! நயினாதீவு, மேகலாதூபம், மேகலைத்தீவு, மணித்தீபம், நயினையம்பதி எனும் பல பெயர்களில் அழைக்கப்படுகிறது. என்றாவது ஒரு கால் நீரில் மூழ்கினாலும் வரலாற்றில் என்றும் மிதந்தே நிற்கவல்ல நயினாதீவு இந்துகள், பௌத்தர், இஸ்லாமியர்களுகாகனப் பிரபலமிக்க தரிசனக் குவியமாக அமைந்தது போல் நயினாதீவில் எம்தோழர்களின் அன்னை நாகம்மா அவர்களின் வாழ் நவீனமும்அமையப்பெற்றிருந்தது. பக்தியாளர்களான பெற்றவர்கள் ஸ்ரீ நாகபூசனியம்மன் அளவுக்கு மதிப்பு வைத்துப் நாகம்மா எனப்பெயர் சூட்டியிருப்பார்கள் போலும் அதற்கேற்ப நாகம்மாதன் நாமத்தின் மதிப்பை இன்றுவரை பேணிக்கொண்டே இருப்பவர். இவரது பிறந்தநாள் இன்று (21.12) வாழ்த்தத் தகுந்தவர்களை வாழும் பொழுதே வாழ்த்துவது வாஸ்தவமானது என்பதே வாஸ்தவம்.

நன்னீர் அகழும் தீவின் நடுவுள்ள முருகன் வீதியில் நல்லதம்பியரின் இல்லம் அமைந்து இருந்தது.
இல்லத்திற்குள் நாம் நுழைந்துவிட்டால் கிடைப்பதே பாரியஅதிசயம்தான். உடும்பு பிரட்டும் வயதில் ஒரு பிள்ளை நிமிர்ந்து பார்த்தாலும் நேதாஜியின் உருவப்படத்தில் தான் கண்பதிக்கும். அந்த அளவுக்கு நேதாஜியை நேசித்தார் திரு நல்லதம்பி. இலங்கை அரசியலின் பக்கம் என்று பார்த்தால் அப்போ அல்பிறெட் தம்பி ஐயா அவரது உற்ற நண்பர். அந்தக் காலத்திலிருந்தே அரசியற் தலமைகள் மதத் தலைவர்கள் என்று தினசரி நயினை நல்லதம்பியர் இல்லம் திருக்கோலம் தான்.

பிள்ளைகளும் பின்பற்றலோடு எம் தோழர்களானார்கள். என்ற போதும் காற்றுவெளிக் கிராமங்களில் காத்திரமான அன்னையர்கள் வாழ்ந்ததும் கணவரையும் மக்களையும் பாதுகாத்ததும் என்று பல பண்புகள் அன்னையரோடு நிலைத்திருக்கின்றன.

இந்த வகையில் திருமதி நல்லதம்பி நாகம்மா நயினை தந்த நல்ல பதிப்பு. பிள்ளைகள் எம் தோழர்களாகிப் உலகப் பாட்டாளி வர்க்கத்தை உயரத்தூக்கி மனிதகுலத்தின் துயர்களைப் பங்கிடும் அளவுக்கு உறவுகளை ஏற்படுத்தியிருந்தார்கள்.

நாம் வியக்க வல்ல விடயங்கள் என்றுஅன்னை நாகம்மாவிடம் தேட முடிந்தது பல பலவெனினும் ஞாபகமும் பார்வையும் அவரிடம் இதுவரை நலிந்ததே கிடையாது.

1950 களில் குன்றக்குடி அடிகளாரை அறிமுகப்படுத்தி அவரது உரைகளை ஆர்வத்தோடு பதிவு செய்தவர். கணவரும், மக்களும் அரசியல் ஈடுபாடு காட்டியதால் மட்டுமல்ல தனக்கெனத் தெளிவான அரசியல் ஞானத்தைத் தன்னோடு கொண்டிருக்கும் நாகம்மா அவர்கள்!

வாழ் காலத்தில் என்றுமே சுயநல, அராஜக அரசியலை நேசித்ததோ புலிகள் போன்ற அமைப்புகளுக்கு பணம் கொடுத்ததோ கிடையாது.

இன்று வரை தொண்டு நிறுவனங்களுக்கு அன்பளிப்புகள் செய்தவண்ணமே இருக்கிறார். 1968 களில் நயினை விட்டு இடம் பெயர்ந்து கொக்குவில் வந்திருந்த போது ஆ.பு .சுப்பிரமணியம், டொமினிக் ஜீவா இவர்களை வரவேற்று விருந்து வைத்து சூழலில் சிலரைப் பகைத்துக்கொண்டவர் என்ற போதும் பகையாளிகளின் பண்பற்ற தன்மையை நன்கு விளக்கமாக வெளிப்படுத்தியவர்.

ஆரசியற் கட்சிகள் தொழிற் சங்கங்கள் செயற்பாட்டிலிருந்த காலங்களில் தெற்கிருந்து வடக்கு வரும் அத்தனை இடது அரசியற் செயற்பாட்டாளர்களும் சந்தித்த அன்னை முற்றம் தோழி நாகம்மாவின் இல்லம் தான். இலங்கைக் கம்யூனிஸ்ட் கட்சியின் இளைஞர் அணித் தலைவர் ஜெயத்திலகா, றுனு சில்வா செங்கொடிச் சங்கத்தினர் இன்னும் பலர் எங்கள் அன்னை நாகம்மா கையிட்ட அன்ன முண்டவர்களே.

ஸ்ரீ மாவோ யாழ்ப்பாணப் பல்கலைக்கழகத்தைத் திறந்து வைக்க வந்தபோது தமிழுணர்வாளர்களின் எதிர்ப்iப சந்திக்க நேர்ந்தது. அதையும் எதிர்கொண்டு அந்த உர்வலத்திலும் கலந்துகொண்டும் ஆதரவைக் கொடுத்து உதவியவர்.

மகன்மார்கள் மாக்ஸிய சித்தாந்தத்தைக் தழுவிக்கொண்டதை வரவேற்ற ஒரு உதாரண அன்னையாக இருந்த நாகம்மா அவர்கள்.

இடதுசாரிகளின் புகலிடம் என்ற வகையில் தங்கள் இல்லத்தையே மாற்றிக்கொண்டார். தோழர் வைத்திலிங்கம் மாஸ்டரின் தேர்தல் பணிகளில் உதவியது. அப்போதைய இலங்கைக் கம்யூனிஸ்ட் கட்சியின் தோழர்கள் எனும் பிரபலங்கள் பீற்றர்கெனமன், விக்கிரமசிங்க உட்பட்ட பலரும் அன்னை நாகம்மா கைப்பக்குவ சாப்பாட்டில் கிறங்கிப்பொனவர்கள். இது தவிர சில முக்கிய விடயங்களும் அன்னை நாகம்மா அவர்களின் கண்காணிப்பில் வீட்டில் அரங்கேறியிருந்தன.

வடக்கில் ரஸ்சியன் கொன்சலாட் ஆரம்பித்தது. வீ. பொன்னம்பலத்தார் தலமையில் செந்தமிழர் இயக்கத்தின் ஆரம்பம். அதன் அரசியலமைப்பின் முதல் வாசிப்பு இவைகள் அவரது இல்லத்திலேயே நிறை வேறின என்பது ஒரு வரலாற்றுத் தகவல்.

இந்த அளவுக்கு தோழர் வி.பி இவர்கள் குடும்பத்தோடு தோழமையுடன் இருந்தார். காரணம் இவரது மைந்தர்கள். தோழர் திரணகம யாழ் பல்கலைக் கழக விரிவுரையாளராக இருந்த வேளை அவரது முன்னெடுப்பில் கூட்டப்பட்ட பல்கலைக்கழக மாணவரமைப்புக்காக சிங்கள அமைப்புக்கு கிங்ஸிலி, தமிழமைப்புக்காக வ.ஐ.ச.ஜெயபாலன் இவர்களின் தேர்வும் இந்த அன்னையின் முன்றலிலேயே நடந்தது என்பது வரலாற்றில் ஓர் பதிவு.

இன்றுள்ள சிங்களத் தமிழ் இடது சாரித் தோழர்களையும் வரவேற்று உபசரித்த வாய்ப்புக் கிடைக்கப் பெற்றவர் ஒருவர் வாழ்கிறார் என்றால் எம் அன்னை நாகம்மாத் தோழி ஒருவரே தான். ஒரு தடவை அரசியல் சார் ரஸ்ய படமொன்றை வீட்டில் திரையிட்ட போது விசமிகளின் கல் வீச்சுக்கு இலக்காகிக் காயமுற்றவர்.

இவ்வாறு பல் வகையில் . . . . . . .அவர் பாராட்டப்பட வேண்டியவர் இன்னும் பல்லாண்டுகள் வாழவேண்டியவர் வாழவேண்டும் என வாழ்த்த இந்த வாய்ப்புக் கிடைத்த வரத்தோடு விடைபெறுவது!

தோழமையோடு
நெடுந்தீவு
வை.லோகநாதன்