ஈழத் தமிழர் விடுதலைக்கான நெடுந்தூர நடைபயணம் - 16வது முதல் 21வது நாள்வரையான நிகழ்வுகள்!

மருத்துவ பரிசோதனையை முடித்துவிட்டு 31-01-2011 திங்கள் கிழமை கொன்ரபொல் என்ற இடத்தில் காலை 06:10 மணியளவில் புறப்பட்ட நடைபயணம் மிரியல்குண்டா என்ற இடத்தைக் கடந்து இரவு 08:00மணியளவில் நல்குண்டா என்ற இடத்தில் இரவு முகாம் அமைத்தனர். 31-01-2011 திங்கள் கிழமை நடைபயண வீரர்கள் 38 கிலோ மீற்றர் தூரத்தைக் கடந்தனர். மொத்தமாக 532.8 கிலோ மீற்றர் தூரத்தைக் கடந்திருந்தனர்.

17வது நாளான 01-02-2011 செவ்வாய்கிழமை காலை 06:00 மணியளவில் நல்கொண்டாவில் இருந்து புறப்பட்ட நடைபயண வீரர்கள் தொடர்ந்து நடைபயணத்தை மேற்கொண்டு 38.5 கிலோ மீற்றர் தூரத்தைக் கடந்து இரவு 07:30 மணியளவில் நர்கட்பள்ளி என்ற இடத்தில் இரவு முகாம் அமைத்தனர். நடைபயண வீரர்களுக்கு வழிநெடுகிலும் பள்ளி மாணவர்கள் கைகொடுத்து வாழ்த்துச் சொல்லி அனுப்பிவைத்தனர். 17 நாட்களிலும் மொத்தமாக 571.3 கிலோ  மீற்றர் தூரத்தைக் கடந்திருந்தனர்.

18வது நாளான 02-01-2011 புதன் கிழமை காலை 06:00 மணியளவில் நர்கட்பள்ளியில் இருந்து தொடங்கிய நடைபயணம் கோயில குளம் என்ற இடத்தைக் கடந்து இரவு 07:45மணியளவில் சொதுப்பல் என்ற இடத்தை அடைந்தனர். அங்கேயே இரவு முகாம் அமைத்தனர். புதன்கிழமை மட்டும் 34.5 கிலோ மீற்றர் தூரத்தைக் கடந்திருந்தனர். மொத்தமாக 605.8 கிலோ மீற்றர் தூரத்தைக் கடந்தனர்.

ஒவ்வொரு நாள் காலையில் புறப்படும் போதும் இரவு வந்து சேரும் போதும் வீரர்களின் உடல் ரீதியான கஸ்ரங்கள் கேட்கப்படுகிறது. ஏதாவது கஸ்ரங்கள் குறைகள் இருந்தால் உடனே நிவர்த்தி செய்யப்படுகிறது. ஆனால் வீரர்கள் எங்களுக்கு எந்தக் குறையும இல்லை என்று தெரிவித்து உற்சாகத்துடன் நடைபயணத்தை மேற்கொள்கிறார்கள்.

மருத்துவ முகாமில் பரிசோதனை செய்யப்பட்டு உடல் தகுதியில்லாத நபர்கள் சென்னைக்கு அழைத்து வரப்பட்டு உயர் சிகிச்சை அளிக்கப்பட்டு இப்போது நலமுடன் இருக்கிறார்கள். எங்களையும் நடைபயண வீரர்களுடன் இணைத்து விடுங்கள் நாங்கள் இப்போது நலமுடன் இருக்கிறோம் என்று திரு. மங்களராஜா அவர்களிடம் தெரிவித்தனர். அதற்கு திரு. மங்களராஜசா அவர்கள் நடைபயணத்தை மேற்கொள்ள தேவையான நபர்கள் இருக்கிறார்கள், ஆகையால் நீங்கள் ஓய்வெடுங்கள் என்று தெரிவித்தார். அவர்கள் ஓய்வெடுத்துக்கொண்டிருக்கிறார்கள்.

19வது நாளான 03-01-2011 வியாழன் காலை 06.30 மணியளவில் சொதுப்பல் என்ற இடத்திலிருந்து புறப்பட்ட நடைபயண வீரர்கள் மால்கபூர், கயாத் நகர் என்ற இடங்களைக் கடந்து இரவு 07;30 மணியளவில் எல்.பி. நகர் என்ற இடத்தை வந்து சேர்ந்தனர். அங்கு இரவு முகாம் அமைத்தனர். 19வது நாள் 30.5 கிலோமீற்றர்களைக் கடந்து மொத்தமாக 636.3 கிலோ மீற்றர் தூரங்களைக் கடந்துள்ளனர்.

20வது நாளான 04-01-2011 வெள்ளிக்கிழமை காலை 0520 மணியளவில் எல்.பி. நகரிலிருந்து புறப்பட்ட நடைபயணம் திரிநகா, செக்கந்திரபாத் (கைதரபாத் அருகில்) என்ற இடங்களைக் கடந்து 34.5 கிலோ மீற்றர் தூரங்கள் நடைபயணம் மேற்கொண்டு மாலை 06:00 மணியளவில் கண்ட்லாகோய் என்ற இடத்தில் அதாவது கைதராபாத் என்ற இடத்திலிருந்து 30 கிலோ மீற்றர் தூரம் தாண்டி தங்குவதற்காக முகாம் அமைத்தனர். நடைபயண வீரர்கள் மொத்தமாக 670.5 கிலோ மீற்றர் தூரத்தைக் கடந்திருந்தனர்.

நடைபயணத்தின் 21 வது நாளான இன்று 05-01-2011 சனிக்கிழமை மருத்துவ பரிசோதனை. வீரர்களின் உடுப்பு சுத்தம் செய்ய மற்றும் ஓய்விற்காக இன்று முழு நேர ஓய்வு கொடுக்கப்பட்டிருந்தது. மருத்துவ பரிசோதனை செய்யப்பட்டதில் வீரர்கள் அனைவரும நல்ல உடல் தகுதியுடன் இருப்பதாக சான்றிதழ் வழங்கப்பட்டது.

மதிய இடைவேளைக்குப் பிறகு வீரர்கள் அனைவரும் ஒருவருடன் ஒருவர் கதைத்து மிகவும் மகிழ்ச்சியாக இருந்த வேளையில் ஒரு துக்கமான செய்தி வந்து சேர்ந்தது. வீரர்கள் மிகவும் கவலையடைந்தனர். நடைபயணம் மேற்கொண்டிருக்கும் கடலூர், குறிஞ்சிபாடி முகாமைச் சேர்ந்த திரு. சிவகுரு (அனில்) என்பவரின் தந்தை (திரு. கந்தசாமி அவர்கள்) உடல் நலக்குறைவால் மரணமடைந்துவிட்டார் என்ற செய்தி பெறப்பட்டது.

திரு. சிவகுரு அவர்கள் மிகவும் வேதனையடைந்தார். நான் எனது தந்தைக்கு மட்டும் தெரிவித்துவிட்டு வேறு யாரிடமும் தெரிவிக்காமல்தான் சென்னை வந்தேன். எனது தந்தை தனக்கு உடல்நிலை சரியில்லாத சூழ்நிலையிலும், இங்கு நான் பார்த்துக்கொள்கிறேன் என்று ஆறுதல் வழங்கி என்னை வாழ்த்தி வழியனுப்பி வைத்தார்.

நான் எனது தந்தை இவ்வளவு மோசமான நிலையில் இருப்பார் என்று நினைக்கவில்லை என்று மனவேதனையுடன் அழுதார். நடைபயண வீரர்களுக்கு அவர் ஆறுதல் கூறினார், எனது தந்தையின் ஆத்மா எமது நடைபயணத்தை வெற்றி பெற வாழ்த்துக் கூறிக்கொண்டுதான் இருக்கும். நீங்கள் கவலைபட வேண்டாம், எனது தந்தைக்கு எனது கடமையை செய்துவிட்டு வருகிறேன், நீங்கள் நடைபயணத்தை தொடருங்கள் என்று வீரர்களுக்கு ஆறுதல் சொல்லிவிட்டு சிவகுரு அவர்கள் இன்று தனது குறிஞ்சிபாடி முகாம் செல்கிறார்.

நடைபயண வீரர்கள் அதிக தூரம் நடந்து சென்றுவிட்தால் நாளை காலையில்தான் தனது முகாம் சென்றடைய முடியும் என்றும் தெரிவித்தார். அதற்கு முன்பு சென்னையிலிருக்கும் தனது நண்பர்களை முதலில் செல்லுமாறு தொலைபேசியில் அறிவித்துவிட்டு புறப்பட்டார்.

நடைபயண வீரர்கள் அனைவரும் இன்று ஒருவகை சோர்வுடன் காணப்பட்டனர். இலட்சிய வெறிகொண்ட வீரன் திரு. சிவகுரு அவர்கள் ஒருவகை இறுகிய மனதுடன் வாழ்த்துச் சொல்லி அனுப்பிய தனது தந்தைக்கு இறுதி கடமையைச் செய்ய இன்று கடலூர் புறப்பட்டுச் செல்கிறார்.

திரு. ஞானராஜா அவர்கள்

நடைபயண தலைமைக்குழு