ஈழத் தமிழர் விடுதலைக்கான நெடுந்தூர நடைபயணம் - 26வது நாள் நிகழ்வுகள்!

ஈழத் தமிழர் விடுதலைக்கான நெடுந்தூர நடைபயணத்தின் 26 வது நாளான 10-02-2011 வியாழக்கிழமை நடைபயண வீரர்கள் காலை 05:30 மணியளவில் அர்குல் என்ற இடத்திலிருந்து புறப்பட்டு நிர்மல் என்ற இடத்தை நோக்கி நடந்தனர். காடுகள் அடுத்து கிராமங்கள் என்று நடந்து இரவு 09:00 மணியளவில் 40 கிலோ மீற்றர் தூரத்தில் உள்ள சோனாபேட் என்ற இடத்தை அடைந்தனர். அங்கேயே இரவு முகாம் அமைத்தனர். இன்று இரவு வரை மொத்தமாக 870 கிலோ மீற்றர் தூரத்தை நடைபயண வீரர்கள் கடந்தனர்.

நடைபயண வீரர்களில் ஒரு சிலரைத் தவிர அனைவரும் நல்ல உடல் ஆரோக்கியத்துடன் இருக்கின்றனர். அவர்களின் உடல் ஆரோக்கியத்திற்கு தேவையான உணவு உட்பட அனைத்தும் சரியான நேரத்தில் உயர்திரு. தம்பி தோழர் அவர்களின் தலைமையிலான குழு வழங்கி வருகிறது. உயர்திரு. தம்பி தோழர் அவர்கள் வீரர்களின் உடல் ஆரோக்கியத்தில் மிகுதந்த பொறுப்புடன் நடந்து வருகிறார்.

உயர்திரு. தம்பி தோழர் அவர்களின் குழுவுக்கு துணையாக திரு. கரன் அவர்கள் செயல்பட்டுக்கொண்டிருக்கிறார். தேவையான நேரத்தில் அனைத்துப் பொருட்களையும் குறுகியகால இடைவெளிக்குள் வாங்கிக்கொடுத்து தேவைகளை நிவர்த்தி செய்து கொடுத்தும் வருகிறார் மேலும் பல முக்கியமான வேலைகளையும் கரன் அவர்கள் பொறுப்பிலே தலைமைக்குழு கொடுத்துள்ளது.

திரு. கரன் அவர்கள் தாத்தா நெடுந்தீவைச் சேர்ந்த உயர்திரு. கார்த்திகேசு வேலயுதம்பிள்ளை மாஸ்ரர் அவர்கள் கடந்த 02-02-2011 அன்று மதியம் இயற்கை ஏய்தினார். கரன் அவர்களுக்கு தகவல் கொடுக்கப்பட்டது. மிகவும் வேதனை அடைந்தார். நடைபயண வீரர்களை தலைமையேற்று நடத்தி வரும் உயர்திரு. ஞா.ஞானராஜா அவர்கள் கரன் அவர்களை தாத்தாவின் இறுதி கிரியைக்கு சென்று வரும்படி கேட்டுக்கொண்டார். உயர்திரு. ஞானராஜா அவர்களுக்கும் அவர் நெருங்கிய உறவினர்தான்.

திரு. கரன் அவர்கள், நான் நடைபயணத்திற்கு வரும்போது என்னை வாழ்த்தி விட்டு, உங்களால் பயணத்தை தொடரமுடியுமா? கணதூரமாச்சே, இறைவன் அருளால் நீங்கள் நடந்து முடிக்க வேண்டும், இந்தியா மீண்டும் நேரடியாகத் தலையிட்டு எங்கட நாட்டுப் பிரச்சினையை தீர்க்க வேண்டும் என்றார் என்று கண்ணீரோடு கூறி நான் போகவில்லையென்று மறுத்துவிட்டார்.

உயர்திரு. கார்த்திகேசு வேலாயுதம்பிள்ளை மாஸ்ரர் அவர்களின் நல்லடக்கம் 08-02-2011 செவ்வாய்கிழமை நடைபெற்றது. இலங்கையிலிருந்து வந்த மாஸ்ரர் அவர்களது உறவினர்கள் உயர்திரு. ஞா.ஞானராஜா அவர்களை தொலைபேசியில் தொடர்புகொண்டு கரன் இங்கு வரவேண்டாம், நாங்கள் பார்த்துக்கொள்கிறோம், நடைபயணத்தை தொடரச் சொல்லுங்கள் என்று கேட்டுக்கொண்டனர்.

எனினும் திரு. ஞானராஜா அவர்கள் கரன் அவர்களிடம் உங்களது தாத்தாவின் இறுதிக் கிரியைக்குச் சென்று வாருங்கள் என்று கேட்டுக்கொண்டார், தலைமைக் குழுவும் சென்றுவருமாறு பணித்தது. அதற்கு கரன் அவர்கள், நான் நடைபயணத்தில் இருந்து இடையில் திரும்பி அங்கு சென்றால்தான் எனது தாத்தாவின் ஆத்மா சாந்தியடையாது.

எனது தாத்தாவின் கடைசி ஆசை நடைபயணத்தை எப்படியாவது முடிக்க வேண்டும் என்றுதான் அதனால் எனது தாத்தாவின் கடைசி ஆசையை நிறைவேற்ற வேண்டும், அதனால் நான் நடைபயணத்தை தொடர விரும்புகிறேன் என்று கண்ணீரோடு தெரிவித்து விட்டு நடைபயணத்தில் தனது கடமையை செவ்வென செய்து வருகிறார்.

இன்று காலையில் ஆந்திர மாநில தொலைக்காட்சி நிறுவனமான “ஐ நியூஸ்” நடைபயண வீரர்களை வீடியோ எடுத்து செய்திகள் சேகரித்துச் சென்று தொலைக்காட்சியில் ஒலிபரப்பி ஆதரவு வழங்கினர். மேலும் மாலை நேரத்தில் சொக்ஸி மற்றும் ஈநாடு என்ற ஆந்திராவில் பிரசித்திப் பெற்ற பத்திரிகைகளும் வந்து நடைபயணம் பற்றிய செய்திகளை மீண்டும் சேகரித்து தொடர்ந்து ஆதரவு வழங்குவதாகக் கூறிச் சென்றனர். ஆந்திர மாநில தொலைக்காட்சி நிறுவனமான ஜீ தொலைக்காட்சி உள்பட பல தொலைக்காட்சிகன் நேற்றும இன்றும் நடைபயணத்தை பற்றிய செய்திகளையும் படங்களையும் ஒலிபரப்பி ஆதரவு வழங்கியிருந்தனர்.

இந்த இலட்சிய வீரர்களின் நடைபயணம் வெற்றி பெற ஈழத் தமிழர்களும் இந்திய மக்களும் ஆதரவு தருமாறு கேட்டுக்கொள்கிறேன்.

நன்றி!

இவ்வண்ணம்,

மங்களராஜா

நடைபயணக் குழுத் தலைவர்

26-02-2011