ஈழத் தமிழர் விடுதலைக்கான நெடுந்தூர நடைபயணம் - மகாராஸ்ரா எல்லையை நோக்கி...

ஈழத் தமிழ் இனத்தின் சுதந்திரமான வாழ்வுக்கு ஆதரவும் அங்கீகாரமும் உத்தரவாதமும் தேடி நாம் மேற்கொள்ளும் இந்த நெடுந்தூர நடைபயணம் இன்று 28வது நாளாக (12-02-2011) ஆந்திர பிரதேசத்தின் எல்லையை வந்தடைந்துள்ளோம். இன்னும் 1240 கி.மீற்றர் தூர எமது நடைபயணத்தின் மூலம் நாம் எமது இனத்தின் பாதுகாப்புக்கு வழி தேடிச் செல்கிறோம். உலகத்தின் மிகப்பெரிய ஜனநாயக நாட்டின் தலைநகரை நாம் சென்றடைந்து ஈழத்தில் எம் இனத்தின் உரிமைக்கு உத்தரவாதம் வழங்கும்படி கோரவுள்ளோம்.

தீபெத்திய மக்களுக்கு இந்திய தேசத்தில் கிடைத்த அங்கீகாரத்துக்கும் ஆதரவுக்கும் இணையாக இன்று எமது ஈழ விடுதலைக்கு இந்திய தேசத்தில் கிடைக்கும் அங்கீகாரத்துக்கும் ஆதரவுக்கும் எமது இந்த நெடுந்தூர நடைபயணம் வழி அமைத்துக் கொடுத்ததையிட்டு நாம் பெருமைக் கொள்கின்றோம்.

கடந்த காலங்களில் எமது விடுதலக்கு இந்திய தேசம் வழங்கிய ஆதரவும் அங்கீகாரமும் எம்மவர் சிலரின் பொறுப்பற்ற செயல்களால் இல்லாதொழிக்கப்பட்டதன் தாக்கம்தான் கடந்த 2009ஆம் ஆண்டு சிங்களப் பேரினவாதம் அரங்கேற்றிய இன அழிப்பை இந்திய தேசத்தின் எல்லையிலிருந்து 38கிலோ மீற்றர் தூரத்தில் எம் இனத்தவர்கள் எறிpகணைகளால் சின்னப்பின்னாக்கப்பட்ட போது எம்மால் தடுக்க முடியாமல் போனது. எம் இனத்தவர்கள் சிங்களப் பேரினவாதிகளால் சிதைக்கப்படும் போது, எம்மவர் எழுப்பிய மரண ஓலம் இன்றுவரை எமது தேசத்தில் ஒலித்துக் கொண்டுதான் இருக்கின்றது. அந்த மரண ஓலத்தில் பிழைப்பு நடத்திய தலைவர்களும் இன்றுவரை தமது செயல்களில் திறமைக்காட்டி நிற்கின்றனர். தமிழ் மக்களின் தலைவர்களாக காட்டிக் கொள்ளும் இந்தத் தலைவர்கள் தமிழ் இனத்தைக் கொடூரமாக அழித்த சிங்களப் பேரினவாதிகளுடன் சமரசம் பேசிக் கொண்டிருப்பது தமிழர்களின் தலைவிதியாகி விட்டது. தண்டிக்கப்பட வேண்டிய சிங்களப் பேரினவாதிகள் இன்று தமிழர்களைக் கொன்று தான் செய்த கொடுமைகளை மறைத்துக் கொண்டுள்ளனர். அதற்கு எம் இனத்தவரும் துணை போகின்றனர்.

புலம்பெயர்ந்து வாழும் ஈழத் தமிழர்களும் இன்றுவரை மேளதாளங்களுடன் ஊர்வலம் வரும் பொய்யுரைகளை ஏற்றுக்கொண்டு செயல்படுவது ஈழத்தில் சிங்களப் பேரினவாதிகளால் சிறைவைக்கப்பட்டிருக்கும் எம் இனத்தவரை விடுதலை செய்ய வழி அமைக்காது. முhறாக எம் இனத்தை இல்லாதொழிக்க சிங்களப் பேரினவாத சக்திகளுக்கு வழி அமைத்துக் கொடுத்துவிடும்.

கடந்த காலங்களில் எப்படியெல்லாம் எமது விடுதலைப் போராட்டம் வழி நடத்திச் செல்லப்பட்தென்பதை நாம் மறந்துவிடக் கூடாது.

சுயநல சக்திகள் எமது விடுதலைப் போராட்டத்திற்குள் நுழைந்து எமது போராட்டத்தை அழிக்க சிங்களப் பேரினவாதிகளுக்கு வழி அமைத்துக் கொடுத்தனர். அவர்கள் இன்றும் அதே செயலை தொடர்ந்துகொண்டுதான் இருக்கின்றனர். அதை எம்மவர்களும் வரவேற்றுக் கொண்டுதான் இருக்கின்றனர்.

ஈழத் தமிழர்களால் இயக்கப்படும் ஊடகங்களும் இணையதளங்களும் வானொலிகளும் தொலைக்காட்சிகளும் சுய நல சக்திகளுக்கு வழங்கும் ஆதரவு அவர்களுக்கு மேலும் ஊக்கத்தைக் கொடுப்பது மட்டுமல்லாமல் மேலும் மேலும் எம் இனத்தவரை தவறான வழிகளில் வழிநடத்திச் செல்வதற்கு வழியமைத்துக் கொடுக்கின்றது.

எமது விடுதலைக்கு சரியான வழிகளை தெரிவு செய்யும் பொறுப்பும் கடமையும் உங்களுக்கு உண்டு என்பதை இத்தருணத்தில் நினைவுப் படுத்திக் கொள்கிறோம். ஆகவே அவர்களுக்கு எமது விடுதலையின் உண்மை நிலையை எடுத்துச் சொல்லுங்கள். எமது இனம் விடுதலை அடைய வழி அமைத்துக் கொடுங்கள் மாறாக பொய்யுரைகளுக்கு முக்கியத்துவம் கொடுப்பீர்களேயானால் எம் இனம் அகதிகளாக வாழ்வதை தடுக்க முடியாது. சிங்களப் பேரினவாதிகளால் அழிக்கப்படுவதையும் தடுக்க முடியாது.

குறிப்பாக ஒரு விடயத்தைக் கூற விரும்புகின்றோம்:-

கடந்த 2009ஆம் ஆண்டு ஜனவரி மாதம் முதல் யூன் மாதம் வரை சிங்களப் பேரினவாதம் அரங்கேற்றிய கொடூர இன அழிப்பு இந்திய அரசின் பழிவாங்கும் செயல் என்று சில சுயநல சக்திகள் கூறும் பொய்யுரைகளுக்கு முக்கியத்துவம் கொடுக்கும் நீங்கள் ஒரு நிமிடம் சிந்தித்துப் பாருங்கள். இந்திய அரசு ஏன் ஈழத் தமிழினத்தை பழிவாங்க வேண்டும், விடுதலைப் புலிகள் செய்த தவறுக்காக எம் இனத்தை ஏன் தண்டிக்க வேண்டும், உண்மையில் இந்திய அரசு எமது விடுதலைக்கு கொடுத்த ஆதரவிலிருந்து விலகி இருந்ததே தவிர பழிவாங்க என்றும் முயற்சித்ததில்லை.

சிங்களப் பேரினவாதிகள்தான் எம் இனத்தவரை இல்லாதொழிப்பதற்கு சதிச்செயல் செய்து முழு உலகையும் ஏமாற்றினரே தவிர இந்திய அரசு அல்ல. சிங்களப் பேரினவாதிகளின் இன அழிப்பு நடவடிக்கையில் இருந்து எம் இனத்தவர்களை பாதுகாக்க எமக்கு இ;ந்திய தேசத்தின் ஆதரவு தேவை. அந்த ஆதரவைப் பெறுவதற்கான முயற்சிகளை மேற்கொள்வதை விடுத்து சதிச் செயல்கள் செய்து எமது விடுதலைப் போராட்டத்தை முள்ளியவாய்க்கால் வரை இழுத்துச் சென்றவர்கள் சொல்லும் கட்டுக் கதைகளுக்கு முக்கியத்துவம் கொடுத்து, ஏற்கனவே எம் இனத்தவருக்கும் இந்திய தேசத்திற்கும் இடையில் இருக்கும் இடைவெளியை பெரிதாக்கமல் இந்திய தேசத்தின் ஆதரவையும் அன்பையும் பெற முயற்சி செய்ய வேண்டும்.

கடந்த 2009 ஆம் ஆண்டு நடந்த இந்திய நாடாளுமன்ற தேர்தலில் ஓட்டுப் பெறுவதற்காக விடுதலைப் புலிகளை தவறான பாதையில் வழிநடத்திச் சென்று எம் இனத்தவர்கள் ஒரு லட்சத்துக்கும் அதிகமானவர்களை பலி கொடுத்தவர்கள் இந்தக் கைக்கூலிகள். இன்று ஒட்டுமொத்த எம் இனத்தவர்களை சிங்களப் பேரினவாதிகளிடம் அடிமைகளாக்க வழி அமைத்துக் கொடுத்தவர்களும் இந்தக் கைக்கூலிகள்தான்.

நாம் கடந்த 16-01-2011 அன்று தொடங்கிய “சென்னை முதல் டெல்லிவரையிலான நெடுந்தூர நடைப்பயணத்தில் 28வது நாளில் ஆயிரம் கிலோ மீற்றர் தூரம் கடந்து ஆந்திர பிரதேசத்தின் முடிவு எல்லையை கடந்து மகாராஸ்ரா மாநிலத்திற்குள் நுழையும் இவ்வேளையில் நாம் கடந்து வந்த இந்த 1100 கிலோ மீற்றர் தூரத்தில் எமக்கு ஆந்திரப் பிரதேச மக்களும் பத்திரிகை துறையினரும் தொலைக்காட்சித் துறையினரும் வழங்கிய ஆதரவு எம்மை சோர்வடைய விடாமல் மிகவும் உற்சாகமாக வழி நடத்திச் செல்கின்றது.

எனவே ஆந்திரப் பிரதேச மக்கள் வழங்கிய ஆதரவு போல் எம் இனத்தவர்கள் அனைவரும் ஆதரவு வழங்க வேண்டும். நீங்கள் வழங்கும் ஆதரவு எம் இனத்துக்கும் இந்தியத் தேசத்திற்கும் உள்ள இடைவெளியை நிரப்பும். எம் இனத்துக்கு ஈழத்தில் விடுதலை கிடைக்க வழி அமைக்கும் என்று கூறிக் கொண்டு பொய்களைப் புறம்தள்ளி உண்மைகளை ஏற்றுக்கொண்டு ஆதரவு தரும்படி ஈழ தேசிய ஜனநாயக விடுதலை முன்னணியினராகிய நாம் கேட்டுக் கொள்கிறோம்.

நன்றி!

இவ்வண்ணம்,

ஈழ தேசிய ஜனநாயக விடுதலை முன்னணி

ஈ.என்.டி.எல்.எப்.