ஈழத் தமிழர் விடுதலைக்கான நெடுந்தூர நடைபயணம் - 31வது நாள் நிகழ்வுகள்!

ஈழத் தமிழர் விடுதலைக்கான நெடுந்தூர நடைபயண வீரர்கள் நேற்று இந்தியாவின் இரண்டு மாநிலங்களைக் (தமிழ்நாடு, ஆந்திரா) கடந்து மூன்றாவது மாநிலத்திற்குள் (மகாராஸ்ரா) நுழைந்தனர். மகாராஸ்ரா எல்லையிலிருந்து ஏழு கிலோ மீற்றர் தொலைவில் தேசிய நெடுஞ்சாலை (7) யின் ஓரத்தில் முகாம் அமைத்திருந்தனர். வெயிலின் தாக்கம் அதிகம் இருந்ததால் நேற்று நடைபயண வீரர்கள் 32 கிலோ மீற்றர் தூரமே கடந்திருந்தனர்.

நடைபயணத்தின் 31வது நாளான இன்று அங்கிருந்து (15-02-2011 செவ்வாய்) காலை 06:00 மணியளவில் தேசிய நெடுஞ்சாலை நடைபயணம் தொடர்ந்தது. வழி நெடுகிலும் இந்தி மொழியில் அச்சு செய்யப்பட்ட பிரசுரஙகளை மக்களிடம் கொடுத்து வந்தனர். அனைவரும் அதை விரும்பி வாங்கி படித்து வாழ்த்துக் கூறி, கையசைத்து அனுப்பினர்.

இன்று நடைபயண வீரர்கள் 39 கிலோ மீற்றர் தூரம் கடந்து கிராஞ்சி என்ற இடத்தில் இரவு முகாம் அமைத்துக் கொண்டனர். வீரர்கள் இன்னும் கடக்க வேண்டிய தூரம் 1134 கிலோ மீற்றர் தூரம் மட்டுமே!

தமிழ்நாட்டில் சில அரசியல் பிரச்சினைகளால் பத்திரிகைகளுக்கு, நடைபயணத்திற்கு முக்கியத்துவம் கொடுக்கக் கூடாது என்று செய்திகள் சேகரித்த நிருபர்கள் மனவேதனையடையும் அளவுக்கு அரசியல் அழுத்தம் கொடுக்கப்பட்டதால் மறைக்கப்பட்ட நடைபயணம் இன்று முதன் முறையாக இந்தியாவின் முக்கிய ஆங்கில நாளேடான இந்து நாளிதழ் அரசியல் அழுத்தங்களையும் மீறி செய்தி வெளியிட்டுள்ளது. நாளை மற்றுமொரு முக்கிய ஆங்கில நாளிதளான “த நியூ இந்தியன் எக்ஸ்பிரஸ்” படத்துடன் செய்தி வெளியிடுவதாக தெரிவித்துள்ளது.

இந்த நிலையில், குவாலியரிலிருந்து டெல்லிவரை 350 கிலோ மீற்றர் தூரம் நடைபயணம் மேற்கொள்ள வேண்டும் என அகதிகள் முகாம்களில் இருக்கும் பெண்கள் முடிவெடுத்துள்ளனர். அதனால் இன்று புழல் அகதிகள் முகாமில் உள்ள பெண்கள் சிலர் அகதி முகாமிற்கு பொறுப்பாக உள்ள வருவாய்த்துறையைச் சேர்ந்த வருவாய் ஆய்வாளரிடம் சென்று அனுமதி கேட்டுள்ளனர். அதற்கு அவர் “யாராவது சென்றீர்கள் என்றால் பதிவை வெட்டி றோட்டில் விட்;டுவிடுவேன்.” என்று மிரட்டியுள்ளார்.

இந்தியாவிலேயே மிக அதிக அளவு லஞ்சமும், ஊழலும் நிறைந்த துறை வருவாய்த்துறைதான். இந்திய மக்கள் ஓர் சாதிச் சான்றிதழ் பெற வேண்டும் என்றால் லஞ்சம் கொடுக்காமல் சான்றிதழ் பெற முடியாது. அப்படியான ஒரு மோசமான துறையின் நிருவாகத்தின் கீழ்தான் ஈழத் தமிழர்கள் முகாம்களில் அடிமையாக்கப்பட்டுள்ளனர். அப்படியென்றால் ஈழத் தமிழர்கள் எப்படி நடத்தப்படுவார்கள் என்பதை தெரிந்துகொள்ளலாம். ஈழத் தமிழர்கள் அடிமைகளாக நடத்தப்படுவதற்கு இது ஓர் உதாரணமே போதுமானது.

ஈழத் தமிழர்கள் தங்களை வருத்தி நடந்து டெல்லி செல்வதினால் இந்த வருவாய்த்துறையினருக்கு என்ன நட்டம் வந்துவிட்டது? நடைபயணத்தில் மேற்கொண்டுள்ள உறுப்பினர்களுக்கு அரசினால் கொடுக்கப்படும் கொடுப்பணவைக் கூட இவாகள் நிறுத்திவிட்டார்கள். இந்த நூறு பேருக்குக் கொடுப்பனவு நிறுத்தியதால் அரசாங்கத்துக்கு லாபம் ஈட்டி கொடுத்துவிட்டார்கள் இந்த வருவாய்த்துறையினர் என்று எண்ண வேண்டாம். இவர்களுக்கு அதில் லாபம் கிடைக்கவில்லை என்பதனால்தான் இந்தச் சிறிய கொடுப்பனவைக்கூட வெட்டி விடுவதாக மிரட்டி வருகின்றனர்.

 நாங்கள் இங்குள்ள அரசியல் கட்சிகளுக்கு எதிராக ஊர்வலம் நடத்துகிறோமா? அல்லது அரசுக்கு எதிராக ஆர்ப்பாட்டம் செய்கிறோமா? எங்களது சொந்தப் பிரச்சினையைத் தீர்க்கத்தானே நாங்கள் எஙகளை வருத்தி நடந்து செல்கிறோம். நல்லவிடயம்தானே, ஒருவேளை இந்தியா எங்களது பிரச்சினையை தீர்த்துவிட்டால் நாங்கள் அனைவரும் ஈழம் சென்றுவிடுவோம்தானே, அதன்பிறகு இவர்களுக்குப் பிரச்சினை இல்லையே! இப்படியிருக்கiயில் இவர்கள் ஏன் இவ்வாறு கடுமையாக நடந்துகொள்கிறார்கள்? ஒருவேளை எங்களால் இவர்களுக்கு ஏதோ வருவாய் இழப்பு ஏற்பட்டுவிடும் என்ற ஒரு காரணத்தைத் தவிர வேறு காரணம் எதுவும் இல்லை.

கடந்த 28 ஆண்டுகளாக எங்கள் அகதிகளைச் சுறண்டியவர்கள் இந்த வருவாய்த்துறையினர். எப்படி இந்த வருவாயை இழக்க மனது வரும்? அதனால்தான் இந்த வருவாய்த்துறையினர் எங்களது பிரச்சினை தீரக் கூடாது என்று நினைக்கிறார்கள். இவர்கள் சிங்களவரை விட மோசமானவர்கள், காலம் முழுவதும் ஈழத் தமிழர்களை அடிமைகளாக வைத்திருக்க விரும்புகிறார்கள்

இப்படியான சூழ்நிலையில்தான் ஈழத் தமிழர்கள் தமிழகத்தில் வாழ்ந்து வருகிறார்கள். இந்த நிலையிலிருந்து எங்கள் இனம் விடுதலை அடைய வேண்டும். இந்த உண்மை நிலையையும் எங்களது நியாயமான கோரிக்கைகளையும் அரசியல் அழுத்தங்களையும் மீறி பத்திரிகை துறையினர் ஆதரவு தருவார்கள் என்று நம்புகிறோம்.

நன்றி!

ஈழ தேசிய ஜனநாயக விடுதலை முன்னணி

ஈ.என்.டி.எல்.எப்.