தமிழக மீனவர்களைக் கைது செய்தது சிறிலங்கா அரசுதான்!

தமிழகத்து மீனவர்களை கடத்திச் சென்று யாழ்ப்பாணச் சிறையில் அடைத்தது யாழ்ப்பாணத் தமிழர்கள் செய்த செயலல்ல. சிங்கள அரசின் உளவுத்துறையின் ஏற்பாட்டில் டக்கிளஸ் தேவானந்த என்ற அமைச்சர்தான் இதனைச் செய்வித்தவர். கடந்த நாடாளுமன்றத் தேர்தலுக்கு சில தினங்களுக்கு முன்னர் யாழ்ப்பாணக் குடாநாட்டு மீனவர்கள் சிலருக்கு மீன்பிடிப் படகுகளை அமைச்சர் டக்கிளஸ் தேவானந்த வழங்கினார். அறுபது படகுகள் வரை முற்பணம் செலுத்தாமல் சிங்கள அரசின் சார்பாக தவணை முறையில் வழங்கப்பட்டது. அந்தப் படகுகளைக் கொண்டு அவர்கள் மீன்பிடித்து வந்தனர்.

அண்மைக் காலங்களில் சிறிலங்கா கடற்படையினர் தமிழக மீனவர்களைத் தாக்கியும் படுகொலை செய்தும் வருகின்றனர். சிறிலங்கா அரசின் மீது தமிழகமும், இந்தியாவும் கோபம் கொண்டுள்ளன. கடற்படையின் செயற்பாட்டினால் இந்தியா தங்களுக்கு எதிராகத் திரும்பிவிடுமோ என்ற அச்சத்தின் காரணமாக இச்செயல்களை சிறிலங்கா கடற்படையினர் செய்யவில்லை, யாழ்ப்பாணத்துத் தமிழர்கள்தான் செய்துவருகின்றனர் என்பதை இந்தியாவுக்குத் தெரியப்படுத்துவதற்காகவே திட்டமிட்டுச் செயற்படுத்தப்பட்டது.

இந்தக் கடத்தலுக்குப் பயன்படுத்தப்பட்டவை டக்கிளஸ் தேவானந்தா வழங்கிய, முற்பணம் பெறாமல் வழங்கப்பட்ட அந்தப் படகுகளைத்தான்.

சிறிலங்கா கடற்படையினர் சிவில் உடையில் லுங்கி மற்றும் சாதாரண சட்டை அணிந்து அந்த மீன்பிடிப் படகுகளில் ஒருவர் வீதம் ஏறினர். கடனாக படகுகளைப் பெற்றவர்களிடம் எங்களது கடற்பகுதிகளில் இறால் மீன் பிடிக்கும் வலையைக் கொண்டு எல்லாவிதமான சிறியவகை மீன்களையும் அள்ளிச் செல்கின்றனர் தமிழக மீனவர்கள் என்று கூறி அந்த மீனவர்களைக் கைது செய்து வரவேண்டும் என்று படகுகாரர்களிடம் கூறியுள்ளனர். அரசாங்கத்தின் உத்தரவின் பேரில்தான் இதனைச் செய்கிறோம் என்று மீனவர்கள் சிலரை இழுத்துச் சென்றுள்ளனர்.

கடனாக வாங்கிய படகை எந்த நேரத்திலுமு; அரசாங்கம் பறிக்கலாம் என்ற பயத்தினால் அமைச்சர் டக்கிளஸ் தேவானந்தாவிடமும் தொலைபேசியில் கேட்டுள்ளனர். சென்றுவாருங்கள் பிரச்சினை இல்லை என்று அமைச்சர் கூறியதைத் தொடர்ந்து சிவில் உடையில் மீனவர்கள் போன்று உடையணிந்திருந்த கடற்படையினருடன் படகுகளை ஓட்டிச் சென்றுள்ளனர் மீனவர்கள்.

இச்செயல் முழுக்க முழுக்க சிங்கள அரசின் சதிச்செயலே! யாழ்ப்பாணத் தமிழர்கள் தமிழக மீனவர்களைக் கைது செய்து போலீசில் ஒப்படைத்தால் அந்த மீனவர்களை உடனேயே திருப்பி அனுப்பியிருக்க வேண்டும் இலங்கை அரசு.

அதுவும் அல்லாமல் யாழ்ப்பாணத் தமிழர்களுக்கு இப்படி ஓர் அதிகாரத்தை சிங்கள அரசு எந்தக் காலத்திலும் வழங்கியது கிடையாது. இலங்கைத் தமிழர்கள் எந்தவித உரிமையும் இல்லாமல் அடிமைகளாகத்தான் வாழ்கிறார்கள் ஈழத்தில்.

அந்த அடிமைகளில் சிலரைப் பயன்படுத்தித்தான் இந்தக் கடத்தல் வேலையைச் செய்து தமிழகத்துக்கும் ஈழத் தமிழர்களுக்கும் பகையை உண்டுபண்ண சிங்கள அரசு முயற்சி மேற்கொண்டுள்ளது. சில அடிமைத் தமிழர்களைக் கொண்டு இலங்கைப் பத்திரிகைகளுக்கும் பேட்டி கொடுத்துள்ளது சிங்கள அரசு.

இது விடயத்தில் இந்தியா சரியான முடிவினை எடுக்க வேண்டும். ஈழத் தமிழர்களை இந்தியாவிடமிருந்து பிரித்துவிடும் இச் சதிச் செயலை இந்தியா அனுமதிக்கக் கூடாது என்று கேட்டுக் கொள்கிறோம்.

இவ்வண்ணம்,

விவேகானந்தன் தேவராஜா

மத்தியக்குழு உறுப்பினர்

ஈழ தேசிய ஜனநாயக விடுதலை முன்னணி

(ஈ.என்.டி.எல்.எப்.)