ஈழத் தமிழர் விடுதலைக்கான நெடுந்தூர நடைபயணம் - 34வது நாளாவது நாளின் துயரச்சம்வத்தின் விவரம்!

ஈழத் தமிழர் விடுதலைக்கான நெடுந்தூர நடைபயணத்தின் 34வது நாளான நேற்று 18-02-2011 வெள்ளிக்கிழமை இரவு 07:30 மணியளவில் நாக்பூர் மாநகரத்துக்கு 15கிலோ மீற்றர் தூரத்திற்கு முன்னால் நடைபயண வீரர்கள் இரவு முகாம் அமைத்தனர். இரவு 07:40 மணியளவில் நடைபயண வீரர்களுக்கு மருந்துகள் கொடுப்பதற்கு பொறுப்பாக இருந்த லேனாவிளக்கு, புதுக்கோட்டை அகதிகள் முகாமைச் சேர்ந்த திரு. சந்திரதாஸ் சுதர்சன் அவர்களும் நடைபயணக்குழுவின் லொறி ஓட்டுனரான தமிழகத்தின் ஈரோடு என்ற இடத்தைச் சேர்ந்த திரு. ரஞ்சித் அவர்களும் குறைவாக இருந்த மருத்துகள் வாங்குவதற்காக மோட்டார் சைக்கிளில் மருந்து கடைக்குச் செல்லும் வழியில் எதிர்பாராத விதமாக எதிரே வந்த மாருதி வேனுடன் மோதுபட்டு விபத்து ஏற்பட்டது.

விபத்தில் காயமடைந்த இருவரும் நாக்பூரில் உள்ள ஒரு தனியார் மருத்துவமனையில் அனுமதிக்கப்பட்டனர். இதில் திரு. சுதர்சன் அவர்கள் தலையில் பலமான காயம் ஏற்பட்டதால் சிகிச்சை பலனின்றி இன்று மரணமடைந்தார். இவர் லேனாவிளக்கு, புதுக்கோட்டை அகதிகள் முகாமைச் சேர்ந்த மனோன்மனி சந்திரதாஸ் தம்பதியரின் இளைய புதல்வர் ஆவார். இவருக்கு ஒரு சகோதரரும் மூன்று சகோதரிகளும் உள்ளனர்.

திரு. சுதர்சன் அவர்கள் நடைபயண வீரர்களுக்கு மருத்துவர்கள் எழுதிக்கொடுக்கும் மருந்துகளைக் கொடுப்பதற்கு பொறுப்பாக இருந்தார். இடைபட்ட நேரங்களில் வீடியோ எடுப்பதற்கும், துண்டு பிரசுரங்களை பொதுமக்களுக்கு வினியோகிப்பதற்கும் உதவியாக இருந்தார். மிகவும் சுறுசுறுப்பான இளைஞர். நடைபயணக் குழுவினருக்கு செல்லப்பிள்ளையாக இருந்தார்.

சம்பவத்தைக் கேள்விப்பட்டதும், ஈழ தேசிய ஜனநாயக விடுதலை முன்னணியின் முக்கிய தலைவர்கள் சம்பவ இடத்திற்கு விரைந்துள்ளனர். சம்பவம் நடந்த இடத்திற்கு காவல்துறையினர் உடனே வந்துவிட்டனர். விபத்து நடந்த மாருதிவேன், ஓட்டுனரை கைது செய்து காவல் நிலையத்தில் வைத்துள்ளனர். விபத்துக்குள்ளான மாருதி வேனையும் கைப்பற்றி வைத்துள்ளனர். மருத்துவமனையில் இன்று மருத்துவ பரிசோதனை செய்யப்பட்டு விபத்து என்று மருத்துவர்கள் காவல்துறையினருக்கு சான்றிதழ் கொடுத்துள்ளனர்.

திரு. சுதர்சன் அவர்களின் உடல் இன்று காலை நாக்பூரில் நடைபயணக் குழுவினரால் இறுதி மரியாதை செய்யப்பட்டு, லேனாவிளக்கு, புதுக்கோட்டை அகதிகள் முகாமான அவரது வாழ்விடத்திற்கு விமானத்தில் கொண்டு செல்வதற்கு நடைபயணக் குழுவினர் ஏற்பாடுகள் செய்துகொண்டிருக்கின்றனர். லொறி ஓட்டுனரான திரு. ரஞ்சித் அவர்களும் நேற்று ஆபத்தான நிலையில்தான் இருந்தார். இன்று அவர் ஆபத்தான நிலையிலிருந்து மீண்டு விடுவார் என்று மருத்துவர்கள் தெரிவித்தனர்.

திரு. சுதர்சன் அவர்களின் மரணச் செய்தி அவரது குடும்பத்தாருக்கு இன்று தெரிவிக்கப்பட்டுள்ளது.

ஈழத் தமிழர்களின் மீது இறைவனுக்கு இன்னும் இரக்கம் வரவில்லையோ....

விவரங்கள் தொடரும்....

ஈழ தேசிய ஜனநாயக விடுதலை முன்னணி

 ஈ.என்.டி.எல்.எப்.