மட்டக்களப்பு மாவட்ட தமிழ் தேசிய கூட்டமைப்பின் அரசியல் அறியாமையே

கிழக்கு மாகாண சபையில் முதல் அமைச்சர் பதவி தமிழர் ஒருவருக்கு வழங்கவில்லை என்று அரசாங்கத்தை குற்றம் சுமத்துவது அதிலும் ஐக்கிய தேசிய கட்சி ஏமாற்றி விட்டது என்று கூறுவது மட்டக்களப்பு மாவட்ட தமிழ் தேசிய கூட்டமைப்பு பாராளுமன்ற உறுப்பினர்களான பா. அரியநேத்திரன் சீ. யோகேஸ்வரன் ஆகியோர்களின் அரசியல் அறியாமையே ஆகும் என்று ஐக்கிய தேசிய கட்சியின் கல்குடா தொகுதி அமைப்பாளர் ஆ.ஜெகன் தெரிவித்துள்ளார். கிழக்கு மாகாண சபை முதலமைச்சர் விடயம் தொடர்பாக விடுத்துள்ள ஊடாக அறிக்கையிலேயே இவர் இவ்வாறு தெரிவித்து உள்ளார்.

இவரின் அறிக்கை வருமாறு:-

“ தற்போது கிழக்கு மாகாண சபையில் ஐக்கிய மக்கள் சுதந்திர முன்னணிக்கு -14 ஆசனங்களும் தமிழ் தேசிய கூட்டமைப்புக்கு -11 ஆசனங்களும், ஸ்ரீலங்கா முஸ்லிம் காங்கிரஸுக்கு - 07 ஆசனங்களும், ஐக்கிய தேசிய கட்சிக்கு - 04 ஆசனங்களும், தேசிய சுதந்திர முன்னணிக்கு - 01 ஆசனமும் ஆக மொத்தமாக 37 ஆசனங்கள் உள்ளன.

தற்போது ஐக்கிய மக்கள் சுதந்திர முன்னணிக்கு ஸ்ரீலங்கா முஸ்லிம் காங்கிரஸ் ஆதரவு வழங்குவதாக தீர்மானம் எடுத்து விட்டது.

இந்நிலையில் ஐக்கிய தேசிய கட்சிக்கு 04 ஆசனங்கள் மாத்திரமே உள்ளபோது தமிழ் தேசிய கூட்டமைப்புடன் இணைகின்றபோது 15 ஆசனங்கள் ஆகின்றன.

கிழக்கு மாகாண சபையில் ஆட்சி அமைப்பதற்கு 19 ஆசனங்கள் தேவையாக இருக்கின்றபோதுபோது ஐக்கிய தேசிய கட்சி எவ்வாறு கிழக்கு மாகாண சபையில் ஆட்சி அமைக்க முடியும்?

ஆட்சி அமைக்க முடியாமல் உள்ள ஐக்கிய தேசிய கட்சி எவ்வாறு முதலமைச்சர் பதவியை தமிழ் தேசிய கூட்டமைப்புக்கு வழங்க முடியும்?

இது இவர்களுக்க தெரியாதா. தெரியாதவர்கள் போல் நடிக்கின்றனரா?

தமிழ் தேசிய கூட்டமைப்பை பொறுத்த வரையில் ஐக்கிய தேசிய கட்சியும், ஐக்கிய மக்கள் சுதந்திர முன்னணியும் சிங்கள இனவாத கட்சிகள்தான். அப்படி இருக்கையில் 07 ஆசனங்களைக் கொண்ட ஸ்ரீலங்கா முஸ்லிம் காங்கிரஸ் ஐக்கிய மக்கள் சுதந்திர முன்னணியுடன் சேர்ந்து முதலமைச்சர் பதவியை பெற்றுக் கொள்ள முடியுமானால் 11 ஆசனங்களைக் கொண்ட தமிழ் தேசிய கூட்டமைப்பிற்கு ஏன் ஐக்கிய மக்கள் சுதந்திர முன்னணியுடன் இணைந்து முதலமைச்சர் பதவியை பெற முடியாமல் போனது?

அவ்வாறு பெற முடியாது என்றால் இப்போது ஏன் ஸ்ரீலங்கா முஸ்லிம் காங்கிரஸுடன் சேர்ந்து கொண்டு ஐக்கிய மக்கள் சுதந்திர முன்னணியில் இணைந்துள்ளீர்கள்?

இப்போது நீங்கள் தமிழ் தேசிய கூட்டமைப்பா?. அல்லது தமிழ் முஸ்லிம் சிங்கள கூட்டமைப்பா?. நீங்கள் யார் என்றும் அல்லது உங்களது கொள்கைதான் என்னவென்றும் மக்களுக்கு தெளிவுபடுத்த வேண்டும்.

2008 ஆம் ஆண்டு மாகாண சபை தேர்தலின் போது நீங்கள் என்ன கூறினீர்கள்? எங்கு இருந்தீர்கள்? வட- கிழக்கு இணைந்த மாகாண சபைத் தேர்தலில்தான் போட்டியிடுவதாக கூறியிருந்தீர்கள். தனித்தனி மாகாணத்தை பிரித்து போட்டியிடுவதற்கு ஒரு போதும் இடமளிக்க போவதில்லை என்று கூறியிருந்தீர்கள்.

2012 ஆம் ஆண்டு ஏன் கிழக்கு மாகாண சபையில் போட்டியிட்டிர்கள்? அன்று கூறியது என்ன?. தமிழ், தமிழ் என்று பேசும் நீங்கள் 2010 ஆம் ஆண்டு அம்பாறையில் பாராளுமன்ற தேர்தலில் பியசேன கமகே என்னும் சிங்களவர் ஒருவரை தமிழ் தேசி கூட்டமைப்பில் இணைத்து வெற்றி பெறச் செய்தீர்கள்.

அவர் பின்பு ஐக்கிய மக்கள் சுதந்திர முன்னணியுடன் இணைந்து கொண்டார். 2012 ஆம் ஆண்டு கிழக்கு மாகாண சபை தேர்தலில் எங்களுக்கு வாக்களியுங்கள், முஸ்லிம் ஒருவர் முதலமைச்சராக வந்து விடுவார், வேறு எந்த கட்சிக்கும் வாக்களிக்க வேண்டாம் என்று மக்களிடம் கூறி வாக்குகளை பெற்றீர்கள். நீங்கள் தேர்தலை முடித்த பிறகு நீங்களாகவே ஹக்கிமிடம் என்ன கூறினீர்கள்? ஸ்ரீலங்கா முஸ்லிம் காங்கிரஸுக்கு முதலமைச்சர் பதவியும், வட மாகாண சபையில் ஒரு போனஸ் ஆசனமும் தருகின்றோம் என்று உறுதியளித்தீர்கள். இதுதான் உங்களின் கொள்கையும் சாணக்கியமும்.

இதை மக்கள் உணர்ந்து கொள்வார்கள். தற்போது நீங்கள் ஸ்ரீலங்கா முஸ்லிம் காங்கிரஸிடம் 02 அமைச்சர் பதவிகளை கேட்டு கெஞ்சி நிற்கின்றீர்கள். 07 ஆசனங்களை கொண்ட ஸ்ரீலங்கா முஸ்லிம் காங்கிரஸ் ஐக்கிய மக்கள் சுதந்திர முன்னணியில் இணைந்து முதல் அமைச்சர் பதவியை பெற்றுக் கொள்கின்றபோது 11 ஆசனங்களைப் பெற்ற உங்களுக்கு ஐக்கிய மக்கள் சுதந்திர முன்னணியுடன் இணைந்து ஏன் முதல் அமைச்சு பதவியைப் பெற்றுக் கொள்ள முடியவில்லை?

சம்பந்தன் ஐயா ஆதங்கத்துடன் ஐக்கிய மக்கள் சுதந்திர முன்னணியுடன் இணைந்தது கிழக்கு மாகாண சபை உறுப்பினர்களின் தனிப்பட்ட முடிவு என்றும் கட்சி தலைமைப் பீடம் எடுத்த முடிவு இல்லை என்றும் கூறுகிறார்.

அப்படியானால் கிழக்கு மாகாண சபை உறுப்பினர்களின் கட்சி தலைமைப் பீடத்துக்கு கட்டுப்படவில்லையா? இது ஆச்சரியமாக இருக்கிறது. மத்திய அரசாங்கத்தில் ஒரு தலைமைத்துவம் மாகாண சபையில் ஒரு தலைமைத்துவமா? மாகாண சபையில் இப்போது ஐக்கிய மக்கள் சுதந்திர முன்னணியுடன் சேர்ந்து ஆட்சி அமைத்த உங்களுக்கு ஏன் மத்திய அரசாங்கத்தில் அமைச்சு பதவிகளை பெற்று மக்களுக்கு உதவி செய்ய முடியாது.

ஏன் என்றால் பதவி போட்டி உங்களுக்கிடையே தற்போது நிலவுகிறது. தமிழ் மக்களுக்கு உதவி செய்வதற்காக விருப்பமும் இல்லையென்றே எண்ணத் தோன்றுகிறது.

எமது மக்கள் எதிர்காலம் தொடர்பாக நன்கு சிந்திக்க வேண்டிய தேவையுள்ளது. பிள்ளையானுக்கு விவசாய அமைச்சுப் பதவி கிடைக்கவுள்ளதை அறிந்த தமிழ் தேசிய கூட்டமைப்புக்கு அப்பதவியை தடுப்பதுதான் நோக்கமாகும். இதற்க்காக ஸ்ரீலங்கா முஸ்லிம் காங்கிரஸிடம் அமைச்சுப் பதவிக்காக பிச்சை கேட்கும் நிலைமைக்கு தள்ளப்பட்டுள்ளனர்.

மக்கள் ஒன்றை மட்டும் உணர வேண்டும் பிள்ளையான் துரோகி என்றால் தமிழ் தமிழ் தேசிய கூட்டமைப்பிலுள்ள ஜனா, பிரசன்னா, துரைரட்ணம் போன்றவர்கள் யார்?. இவர்கள் தற்போது எந்த கட்சியை சேர்ந்தவர்கள்? இவர்கள் ஆரம்ப காலத்தில் என்ன செய்தார்கள்? வட மாகாணத்தில் மட்டும் எல்லா கட்சிகளிலும் உறுப்பினர்கள் இருக்க வேண்டும். ஆனால் மட்டக்களப்பில் மட்டும் ஒரு கட்சி மாத்திரம்தான் இருக்க வேண்டும் என்று நினைப்பது சரியா?.

தமிழ் தேசிய கூட்டமைப்பின் தலைமை மட்டக்களப்பை புறக்கணிக்கிறது. தமிழ் தேசிய கூட்டமைப்புக்கு கிழக்கு மாகாண சபையில் அதிக ஆசனங்களை பெற்றுக் கொடுத்தது மட்டக்களப்பு மாவட்டமாகும். விருப்பு வாக்குகள் அதிகம் பெற்றுக் கொடுத்ததும் இப்பிரதேசத்தையே சாரும். அப்படி இருக்கையில் திருகோணமலை மாவட்ட தமிழ் தேசிய கூட்டமைப்பு உறுப்பினர் தண்டாயுதபாணிக்கு எதிர்கட்சி தலைவர் பதவி ஏன் வழங்க வேண்டும்?இதைப் பற்றி புத்திஜீவிகள், பொதுமக்கள் சிந்திக்க வேண்டும்.

கிழக்கு மாகாண சபை உறுப்பினர் தயாகமகேயின் உதவியுடன் மாகாண சபையில் ஆட்சி அமைக்க வாய்ப்பு கிடைத்தது.

அதாவது தயாகமகேக்கு முதலமைச்சர் பதவி வழங்கினால் ஐக்கிய மக்கள் சுதந்திர முன்னணியில் இருந்து 04 உறுப்பினர்கள் ஐக்கிய தேசிய கட்சிக்கு வருவதாக இணக்கம் தெரிவித்தார்கள்.

19 ஆசனங்களைக் கொண்டு ஆட்சி அமைத்திருக்க முடியும். தமிழ் தேசிய கூட்டமைபுக்கு 03 அமைச்சு பதவியும், 01 தவிசாளர் பதவியும், 03 மாதங்களுக்கு பின் முதலமைச்சர் பதவியும் கிடைத்திருக்கும்.

இதற்கு தமிழ் தேசிய கூட்டமைப்பில் உள்ள 11 மாகாண சபை உறுப்பினர்கள் இணக்கம் தெரிவித்தனர். சம்பந்தன் ஜயா பிரதமர் ரணில் விக்கிரமசிங்கவிடம் பேசியிருந்தால் நிலைமை சுமுகமாக தீர்க்கப்பட்டிருக்கும். ஆனால் சம்பந்தன் ஐயா இது சம்பந்தமாக பேச மாட்டேன் என்று கூறி விட்டார்.

ஏன் என்றால் அவரை யாரும் மிஞ்சி விடக் கூடாது என்பதே ஆகும். எனவே மக்களாகிய நீங்கள் நன்றாக சிந்தியுங்கள். பொய் பிரச்சாரங்களை நம்ப வேண்டாம். எங்களுடைய மட்டக்களப்பு மக்கள் பொருளாதார ரீதியாக பாதிக்கப்பட்டு இருக்கிறார்கள்.

இதை நாங்கள் உணர வேண்டும். மக்களுக்காக சேவை செய்பவர்களை மக்கள் இனம் காண வேண்டும். எமது மாவட்டத்தை கட்டியெழுப்ப வேண்டும். ”

அமைதி சமாதானம் ஜனநாயகம்

www.sooddram.com