ஈழத் தமிழர் விடுதலைக்கான நெடும்பயணத்தின் முதல்நாள் நிகழ்வு!

16-01-2011 ஞாயிறு அன்று காலை 11:30 மணியளவில், அமரர் இராஜீவ்காந்தி நினைவு மண்டபத்திலிருந்து, திரு. மங்களராஜா அவர்களின் தலைமையில் புறப்பட்ட நெடும்பயணம் சரியாக 15 கிலோ மீற்றர் தூரத்தில் நெடும்பயண வீரர்கள் அனைவரும் மதிய உணவை எடுத்துக்கொண்டனர். மதிய உணவை முடித்துக்கொண்டு புறப்பட்ட நெடும் பயணத்தின் முன்னாள் சென்ற வாகனத்தில் ஈழ தேசிய ஜனநாயக விடுதலை முன்னணியால் உருவாக்கப்பட்ட ஈழ விடுதலைப் பாடல் ஒலிப்பரப்பப்பட்டது.

ஈழ விடுதலைப் பாடல்களைக் கேட்டுக்கொண்டே வீரர்கள் உணர்ச்சிப் பொங்க மிக வேகமாக நடைபயணத்தை மேற்கொண்டனர். அவர்கள் வேகமாக நடந்ததால், அவர்களது காலில் உள்ள சப்பாத்து ஒவ்வாமை பிரச்சினையினால் வீரர்களது காலில் காயங்கள் ஏற்பட்டது. இப்படி 25 வீரர்களுக்கும் மேல் பாதிக்கப்பட்டு அவதிப்பட்டனர்.

நடைபயண வீரர்களில் பெரும்பாண்மையினர் அகதி முகாம்களில் தங்கியிருப்பவர்கள். சப்பாத்தைப் பயன்படுத்தி ஏறக்குறைய 20 வருடங்களுக்கு மேல் ஆகிறது என்று தெரிவித்தார்கள். அவர்கள் தங்களது சப்பாத்துக்களைக் கழற்றி கையில் எடுத்துக்கொண்டு கிட்டத்தட்ட 20 கிலோ மீற்றர் தூத்திற்கும் மேல் காலில் எதுவும் இல்லாமல் நடந்து வந்தார்கள்.

சரியாக 5 மணியளவில் சிற்றுண்டியும், தேனீரும் வழங்கப்பட்டது. சமையலுக்காக தெரிவு செய்ப்பட்டவர்கள் சரியான நேரத்திற்கு உணவை சுவையுடன் தயாரித்துக் கொடுத்தார்கள். இரவு 8:30 மணியளவில் இரவு உணவு தயாரானதும், திரு. மங்களராஜா அவர்கள் அனைவரும் இரவு உணவு எடுத்துக்கொள்ளலாம் என்று தெரிவித்தும், வீரர்கள் உற்சாகத்துடன் இப்போது உணவு சாப்பிட்டால் நடக்க முடியாது, ஆகையினால் இரவு தங்கவேண்டிய இடம் வரை நடந்தவுடன் உணவை எடுத்துக்கொள்ளலாம் என்று தெரிவித்தார்கள்.

இரவு தங்கவேண்டிய முகாமிலிருந்து 20 கிலோ மீற்றர் தூத்திற்கு முன்னாலிருந்து தங்குமிடம் வரை உள்ள சாலை மிகவும் பழுதடைந்திருந்தன, பனி மூட்டம் மிக அதிகமாகக் காணப்பட்டு, கடும் குளிர் வாட்டியது. அதனால் வீரர்களின் வேகம் குறைந்தது. அதனால் இரவு 12மணியளவில்தான் நடைபயண வீரர்கள் தங்குமிடத்திற்கு வந்து சேர்ந்தார்கள்.

இப்படி முதல் நாளில் மோசமான காலநிலையிலும் 58 கிலோ மீற்றர் தூரத்தைக் கடந்து முகாம் வந்து சேர்ந்த நடைபயண வீரர்களில், கும்மிடிபூண்டி முகாமைச் சேர்ந்த திரு. சுரேஸ் அவர்கள் நடந்து வந்த களைப்பில் மயக்க நிலையை அடைந்தார்கள். மருத்துவக் குழுவினர் உடனடியாக அவருக்கு சிகிச்சையளித்து சாதாரண நிலைக்குக் கொண்டு வந்தனர்.

ஈழத் தமிழர் விடுதலைக்கான நடைபயணம்  தொடங்கிய இடமான ஸ்ரீ பெரும்பதூரில் அமைந்துள்ள அமரர் இராஜீவ்காந்தி அவர்களின் நினைவுமண்டபத்திலிருந்து தமிழ்நாடு எல்லையை கடக்கும் வரை தமிழக காவல்துறையினர் மிகவும் பொறுப்பான பாதுகாப்பை வழங்கினர். அவர்களும் நடைபயண வீரர்களுடன் முன்னாலும் பின்பக்கமும் தொடர்ந்து வந்து கடுங்குளிரிலும் உச்சநிலைப் பாதுகாப்பை வழங்கினார்கள்.

நடைபயண வீரர்களும் பொதுமக்களுக்கு இடையூறு கொடுக்காமல் சட்ட ஒழுங்கை கடைபிடித்து பயணத்தை மேற்கொண்டனர். வழிநெடுகிலும் பொதுமக்கள் தங்கள் ஆதரவை தெரிவித்தனர்.

தமிழக காவல்துறையினருக்கு ஈழத் தமிழ் மக்கள் சார்பாகவும், நெடும்பயண வீரர்கள் சார்பாகவும், ஈழ தேசிய ஜனநாயக விடுதலை முன்னணி (ஈ.என்.டி.எல்.எப்.) சார்பாகவும் நடைபயணக் குழுத் தலைவர் திரு. மங்களராஜா அவர்களும் நடைபயணத்தை கட்டுப்பாட்டுடனும் ஒழுக்கத்துடனும் நடத்தும் திரு. ஞானராஜா அவர்களும் தமிழக காவல்துறையினருக்கு நன்றியை தெரிவித்தனர்.

இன்று (17-01-2011) ஓய்விலிருந்த நெடும்பயண வீரர்கள் காலை 9 மணியளவில் மிக உற்சாகத்துடன், நேற்று மயக்கநிலையை அடைந்த திரு. சுரேஸ் அவர்கள் உள்பட அனைவரும் சத்தியவேடு நோக்கி நெடும்பயணத்தை தொடங்கினார்கள்.

E.N.D.L.F