ஈழத் தமிழர் விடுதலைக்கான நெடுந்தூர நடைபயணத்தின் நான்காம் நாள் நிகழ்வு!

19-01-2011 புதன் கிழமை காலை தேனீர் அருந்திவிட்டு 07:15 மணியளவில் நாயுடு பேட்டை நோக்கி புறப்பட்ட ஈழத் தமிழர் விடுதலைக்கான நெடுந்தூர நடைபயணம் 09:00 மணிக்கு காலை உணவிற்காக இடைநிறுத்தப்பட்டது.

நேற்று உறுதியளித்துச் சென்ற ஆந்திர பத்திரிகைகள் அனைத்தும் படத்துடன் நடைபயணத்தின் நோக்கத்தை விபரமாக பிரசுரித்திருந்தன. அத்தனை செய்திகளையும் நடைபயண வீரர்கள் அனைவருக்கும் தெலுங்கு மொழி தெரிந்த நபர் மூலம் வாசித்துக் காட்டப்பட்டது. நடைபயண வீரர்கள் அனைவரும் மிகுந்த உற்சாகமடைந்தார்கள்.

10:00 மணிக்கு மீண்டும் தொடர்ந்த நடைபயணம் “துருவார சத்திரம்” என்ற இடத்தை நோக்கி நகர்ந்தது. நடைபயணம் நகர்ந்துகொண்டிருக்கும் போதே ஆந்திராவில் உள்ள அனைத்துத் தொலைக்காட்சிச் சேனல்களும் நடைபயணத்தை வீடியோ எடுத்து தலைமை தாங்குபவர்களிடம் பேட்டியும் எடுத்துவிட்டுச் சென்றன. இதனால் நடைபயண வீரர்கள் மிக உற்சாகமாக நேர்த்தியாக நடந்து சென்றார்கள். காவல்துறையினரே மிகவும் ஆச்சரியப்படுகிற அளவுக்கு, காவல்துறையினருக்கு எந்தவித சிரமமும் கொடுக்காமல் மிக நேர்த்தியாக நடந்து சென்றார்கள்.

நெடுந்தூர நடைபயணம் மதியம் ஒரு மணிக்கு “துருவார சத்திரம்” என்ற இடத்தை சென்றடைந்தது. அங்கு அனைவருக்கும் மதிய உணவு பரிமாரப்பட்டது. மதிய உணவை எடுத்துக்கொண்ட வீரர்கள் சற்று ஓய்வெடுக்கும் நிலையில் இருந்தனர். ஆனால் சிறிது நேரத்தில் பொதுமக்கள் வந்து நடைபயண வீரர்களை பார்த்து வாழ்த்துக்கூறிச் சென்றனர். வீரர்களுக்கு ஒன்றும் புரியவில்லை.

காலையில் படம்பிடித்த தொலைக்காட்சி சேனல்கள் அனைத்தும் அதை (ஜெமினி தொலைக்காட்சி உள்பட அனைத்துத் தொலைக்காட்சிகளும்) ஒரு மணியளவில் ஒலிப்பரப்புச் செய்துள்ளது. அதைப் பார்த்த அந்த மக்கள் நமது இடத்தில்தான் கடந்து செல்கிறார்கள் என்றுதான் அனைவரும் பார்ப்பதற்காக வந்துள்ளார்கள் என்பது அவர்கள் கூறிய பிறகுதான் தெரிய வந்தது.

தொலைக்காட்சி செய்திகள் வந்ததைக் கேள்விப்பட்டதாலும், பொதுமக்கள் வந்து வாழ்த்து கூறியதாலும் உற்சாகமடைந்த வீரர்கள் மாலை 4.00 மணிக்கு மிக சந்தோசமாக “பெத்தப்பரி” என்ற இடத்தை நோக்கி பயணத்தைத் தொடர்ந்தார்கள்.

ஆந்திராவில் “ஈநாடு”, “சாக்சி” போன்ற பிரபல பத்திரிகைகள் உள்பட அனைத்துப் பத்திரிகைகளும் மற்றும் “ஜெமினி” டிவி போன்ற பிரபலமான அனைத்துத் தொலைக்காட்சிகளும் ஈழ தேசிய ஜனநாக விடுதலை முன்னணியினர் மேற்கொள்ளும் நடைபயணத்தின் நோக்கத்தை விரபரமாக உலகறியச் செய்துள்ளமைக்கும் பொதுமக்கள் தொடந்து வழங்கி வரும் ஆதரவுக்கும், தேசிய நெடுஞ்சாலையில் நகரும் நடைபயணத்திற்கு மிக சிரமங்களுடன் பாதுகாப்பை வழங்கி வரும் ஆந்திர காவல்துறையினருக்கும் ஈழ தேசிய ஜனநாய விடுதலை முன்ணியின் தலைவர் ஞா.ஞானசேகரன் அவர்கள் நன்றினை தெரிவித்துள்ளார். தொடர்ந்து ஆதரவு வழங்கும்படியும் கேட்டுக்கொண்டுள்ளார்.

அதேப் போன்று இலங்கையில், “வீரகேசரி” “உதயன்” போன்ற பத்திரிகைகள் உள்பட முதல் பக்கத்தில் இந்த நடைபயணத்தின் நோக்கத்தைப் பிரசுரித்து சோர்வடைந்திருக்கும் ஈழத் தமிழ் மக்களுக்கு இன்னும் ஈழப் போர் வீரர்கள் சோர்வடையவில்லை என்பதைத் தெரியப்படுத்தி வரும் பத்திரிகைத் துறையினருக்கும் ஞா.ஞானசேகரன் அவர்கள் நடைபயண வீரர்கள் சார்பாக நன்றியினை தெரிவித்துள்ளார். தொடர்ந்து ஆதரவு வழங்கும்படியும் ஈ.என்.டி.எல்.எப். தலைவர் ஞா.ஞானசேகரன் அவர்கள் கேட்டுக்கொண்டுள்ளார்.

நேற்று நடைபயண வீரர்கள் வெப்பத்தின் கடுமையாலும், கால்கள் சோர்வடைந்திருந்ததாலும் நடைபயண தலைமைக் குழுவினர் 30 கிலோ மீற்றர் தூரமே பயணம் செய்ய வேண்டும் என்று தீர்மானித்திருந்தனர். ஆனால் மீடியாக்களும், பொதுமக்களும் கொடுத்த உற்சாகத்தின் மிகுதியால் கடும் வெப்பத்தையும் கால்களின் சோர்வையும் பொருட்படுத்தாமல் 42 கிலோ மீற்றர் தூரத்தை நடைபயண வீரர்கள் கடந்துள்ளனர். நேற்றுடன் மொத்தமாக 160 கிலோ மீற்றர் தூரத்தைக் கடந்துள்ளனர்.

“பெத்பப்பரி” என்ற இடத்தை நோக்கி நகர்ந்த நெடுந்தூர நடைபயணம் சரியாக 06:30 மணிக்கு தேனீர் இடைவேளையை முடித்துக்கொண்டு தொடர்ந்தது. இரவு 09:00 மணியளவில் “பெத்தப்பரி” யை நடைபயணம் சென்றடைந்தது. அங்கு இரவு உணவையும் ஓய்வையும் எடுத்துக்கொண்டார்கள்.

இன்று காலை (20-01-2011 வியாழன் ) 06:55 மணியளவில் ஈழத்தின் தேசிய கீதத்திற்கு மரியாதை செலுத்துpவிட்டு (ஒவ்வொரு நாளும் பயணம் தொடங்கும் போதும், முடிவின் போதும் தேசிய கீதம் ஒலிக்கப்படுகிறது) நெல்லூரை நோக்கி நடைபயணத்தை மேற்கொண்டனர்.

ஈழ தேசிய ஜனநாய விடுதலை முன்னணி

(ஈ.என்.டி.எல்.எப்.)

குறிப்பு: ( இந்த நடைபயணத்தின் வீடியோ காட்சிகள் 19-01-2011 புதன் முதல் http://www.liberationmarch.com/videos.php    என்ற தொடர்பில் காணலாம்.)