ஈழத் தமிழர் விடுதலைக்கான நெடுந்தூர நடைபயணம் - ஐந்தாவது நாள் நிகழ்வுகள்!

(நெடுந்தூர நடைபயணத்தில் கலந்து கொள்பவர்களை ஊக்குவிக்க, வாழ்த்துச் சொல்ல, மற்றும் அவர்களது கஸ்ரங்களை அறிந்துகொள்ள தொடர்புகொள்ள வேண்டிய கைபேசி எண்: 00919490826037. இந்த கைபேசி எண் நெடுந்தூர நடைபயணத்தின் தலைமைக்குழுவில் நிதி மற்றும் கட்டுப்பாட்டிற்குப் பொறுப்பு வகிக்கும் உயர்திரு. தயாபரன் (டேவிட்) அவர்களிடம் இருக்கும்)

ஐந்தாவது நாள் பயணம் 45 கிலோ மீற்றர்களைக் கொண்டதாக இருந்தது. சூலூர் பேட்டை (ஆந்திரா) தாண்டி நான்காவது கிலோ மீற்றரில் புறப்பட்ட நடைபயண வீரர்கள், நாயுடு பேட்டை தாண்டி 15 கிலோ மீற்றரில் ஓர் வயல்வெளியில் இரவு தங்கினர்.

பகல்வேளை தண்ணீர் ஏற்றி வந்த ட்றக்ரரின் பின்பகுதி ரயரில் பெயரின் உடைந்ததால் தண்ணீர் இன்றி தவித்தனர் நடைபயண வீரர்கள். ஆறுமணித்தியாலத்தின் பின்னர் சக்கரம் சரிசெய்யப்பட்டு இரவு உணவுக்கு முகாமை அடைந்தது தண்ணீர் வாகனம்.

நெடுஞ்சாலையில் பயணித்த போது பத்திரிகையாளர்களும், தொலைக்காட்சிக் குழுவினரும் வழிமறித்து பேட்டி எடுத்து ஒலிபரப்புச் செய்ததுடன் அனைத்துத் தெலுங்கு பத்திரிகைகளிலும் மறுநாள் பிரசுரித்திருந்தனர். எங்களது கோரிக்கைகள் நிறைவேற வாழ்த்துச் சொன்னார்கள் பத்திரிகைகள்.

தெலுங்கில் அச்சிடப்பட்ட பிரசுரங்களை வினியோகித்தோம்.

சென்னையிலிருந்து எங்களைப் பார்ப்பதற்கென திரு. அழகுராஜா உமாபதி அவர்களும் அவர்களது நண்பர்களான திரு. சோபன் அவர்கள், திரு. விஜி அவர்கள், திரு. ரூபன் அவர்கள், திரு. மோகன் அவர்கள் மற்றும் சில நண்பர்களும் வந்திருந்தனர். இன்றைய மதிய மற்றும் இரவு உணவுகளை சென்னையிலிருந்து தயாரிக்கப்பட்ட உணவை சூட்டை தாங்கும் பாத்திரத்தில் எடுத்து வந்து வழங்கினர். உணவு தயாரிக்கும் இடத்தில் எங்களது அமைப்பைச் சேர்ந்தவர்கள் பாதுகாப்பிற்காக நியமிக்கப்பட்டிருந்தனர்.

திரு. அழகுராஜா உமாபதி அவர்களும் அவர்களது நண்பர்களும் கடந்த ஒரு வாரகாலமாக தொடர்ந்து வந்து எங்களைப் பார்த்து பல உதவிகளும் செய்து நடைபயண வீரர்களை ஊக்கப்படுத்தி வருகின்றனர். தொடர்ந்து தங்களால் ஆன உதவிகளை செய்வோம் என்று உறுதியளித்துள்ளனர்.

அதே போன்று திரு. பாலன் (கனடா)அவர்களும், அவர்களது நண்பர்களும் தினமும் எங்களை வந்து பார்த்து பல உதவிகளும் செய்து வருகிறார்கள். குறிப்பாக, ஒவ்வொரு மாநிலத்திற்குமான அந்தந்த மொழிகளில் மொழிமாற்றம் செய்த பேனர்களையும் பிரசுரங்களையும் ஒரு குழுவாக இணைந்து தயாரித்து எங்களுக்குக் கொடுத்து வினியோகிக்கிறார்கள். மேலும் இந்தியிலான பிரசுரங்களையும் பேனர்களையும் அவரே தயாரித்துத் தருவதற்கான வேலைகளில் ஈடுபட்டுள்ளார்.

இவர்கள் மட்டுமல்லாது பலபேர் பல வழிகளில் எங்களுக்கு உதவிகள் செய்துள்ளனர், செய்து வருகின்றனர் அவர்களையும் நாங்கள் ஒவ்வொருவராக நினைவுபடுத்துவோம். அவர்களும் தொடர்ந்து உதவிகள் செய்வதாக தெரிவித்துள்ளனர்.

உதவியாளர்கள் ஈழ தேசிய ஜனநாயக விடுதலை முன்னணியினரின் இந்த உயரிய நோக்கமுடைய நடைபயணமும் கோரிக்கைகளும் நிச்சயமாக நிறைவேற வேண்டும், அதற்கான உயர்திரு. ஞா.ஞானசேகரன் அவர்கள் மேற்கொள்ளும் அத்தனை முயற்சிகளுக்கும் உறுதுணையாக இருப்போம் என்றும் உறுதியளித்துள்ளனர்.

மேலும் இலண்டன் ரி.பி.சி. ஒலிபரப்புச் சேவைக்கும் அதன் படைப்பாளர் உயர்திரு. வீ. இராமராஜ் அவர்களுக்கும் நாங்கள் மிக்க நன்றி சொல்ல கடமைப்பட்டிருக்கிறோம். எங்களையும் எங்களது கோரிக்கைகளையும் இருட்டடிப்புச் செய்ய வேண்டும் என்று எதிரிகள் நினைத்திருந்த வேளைகளில் ஈழ தேசிய ஜனநாயக விடுதலை முன்னணியின் கொள்கைகளையும் கோரிக்கைகளையும் உலகறியச் செய்தவர். நாங்கள் மேற்கொள்ளும் இந்த நெடுந்தூர நடைபயணத்தின் ஆரம்பநாள் முதல் எங்களுக்கு மிகுந்த ஆதரவு வழங்கி வருகிறார். தொடர்ந்தும் ஆதரவு வழங்குவதாகவும் உறுதியளித்துள்ளார்.

இதேவேளை, தமிழ் சி.என்.என். தமிழ்ச் சேவையும் “உங்களுடைய கோரிக்கை நியாயமானதே, நாங்களும் தொடர்ந்து உங்களுக்கு ஆதரவு தருவோம்” என்று உறுதியளித்துள்ளார்கள் அவர்களுக்கும் எங்களது நன்றியை தெரிவித்துக்கொள்கிறோம்.

முதல் இரண்டு நாட்களும் கால்வலியால் அவதிப்பட்டவர்கள் அவர்களது மனவலிமையால் கால்வலியை மறந்துவிட்டனர். நாங்கள் திட்டமிட்டபடி 35 கிலோமீற்றர் வரைதான் சராசரியாக நடக்க முடியும் என்றிருந்ததை எங்களது நடைபயண வீரர்கள் மாற்றி 45 முதல் 48 கிலோ மீற்றர்களைக் கடந்துள்ளனர். ஆயினும் நாற்பது கிலோ மீற்றர் தூரத்தைத் தாண்டக்கூடாது என்று இப்போது தீர்மானித்துள்ளோம். காரணம் ஒரே வீரர்கள்தான் இந்த 2500 கிலோ மீற்றர் தூரத்தைக் கடக்க வேண்டியுள்ளது. இவர்களது கணுக்கால், முழங்கால், இடுப்புப் பகுதிகள் தேய்வடைந்துவிடக் கூடாது. வேகமாக நடந்தால் தேய்மானம் அதிகமாக இருக்கும். எனவே வேகத்தைக் கட்டுப்படுத்தியுள்ளோம்.

தொடர்ந்து தினமும் நடைபயணம் பற்றிய விபரங்களை தெரியப்படுத்துகிறோம்.

இவ்வண்ணம்,

மங்களராஜா(viji)

தலைவர்,

நெடுந்தூர நடைபயணக் குழு