ஈழத் தமிழர் விடுதலைக்கான நெடுந்தூர நடைபயணம் - 9வது மற்றும் 10வது நாள் நிகழ்வுகள்!

23-01-2011 ஞாயிறு மதியத்தோடு நடைபயணத்தை நிறுத்தி ஓய்வெடுத்த நடைபயண வீரர்கள் 24-01-2011 காலை 06:30 மணிக்கு ஓங்கோல் தேசிய நெடுஞ்சாலையில் நடைபயணத்தைத் தொடர்ந்தார்கள். செரிசைல்லா, ராஜூபாலம் என்ற இடங்களை கடந்து வருகையில் 09:00 மணியளவில் காலை உணவிற்காக இடைநிறுத்தம் செய்யப்பட்டது.

உணவு இடைவேளை முடிந்தவுடன் பத்திரிகையாளர் சந்திப்பு நடந்தது. ஆந்திர பத்திரிகையாளர்களும் தொலைக்காட்சி நிறுவனங்களும் தினமும் நடைபயண வீரர்களைச் சந்தித்து தொடர்ந்து செய்திகளை பிரசுரித்து வருகின்றனர். இவை நடைபயண வீரர்களுக்கு மேலும் மேலும் உற்சாகத்தைக் கொடுத்துள்ளது.

பத்திரிகையானர்கள் சந்திப்பு முடிந்தவுடன் புறப்பட்ட நடைபயணம் கரீட் என்ற கிராமத்தைத் தாண்டியபோது பொதுமக்கள் மிகுந்த வரவேற்புக் கொடுத்தார்கள். நடைபயணம் வெற்றிபெற வாழ்த்துக்கூறினார்கள்.

பத்துநிமிட இளைவேளைக்குப் பிறகு புறப்பட்ட நடைபயணம் செங்கரயாகொன்டா என்ற இடத்தைக் கடந்து வருகின்ற வேளை மதியம் 12:00 மணியளவில் வீரர்களுக்கு குளிர்பானம் கொடுக்கப்பட்டது. இடைவேளையை தொடர்ந்து தொடர்ந்த நடைபயணம் 12:30 மணியளவில் கலிகிவயி என்ற இடத்தில் மதிய உணவிற்காக இடைநிறுத்தப்பட்டது.

நேற்று(23-01-2011) மதியத்துடன் நடைபயண வீரர்கள் முகாமிட்டதால் 22 கிலோ மீற்றர் தூரத்தையே அன்று கடந்திருந்தனர். அதனால் இன்று (24) நேற்றைய தூரத்தையும் கடக்க வேண்டும் என்று வேகமாக நடந்தனர். குழுத் தலைவர் மெதுவாக செல்ல வேண்டும் என்று கேட்டுக்கொண்டும் வீரர்கள் வேகமாக நடந்தனர்.

மதிய உணவு மற்றும் ஓய்வை எடுத்துக் கொண்ட நடைபயண வீரர்கள் மாலை 03:45 மணிக்கு மீண்டும் நடக்கத் தொடங்கினர். பித்ரிகுண்டா, தங்குதூர் சோதனை நிலையம், ஓங்கோல் சோதனை நிலையம், நாயுடு பாலம், சுரரெட்டிபாலம் வழியாக இரவு 08:30 மணியளவில் ஓங்கோல் தேசிய நெடுஞ்சாலையில் இரவு ஓய்வுக்காக முகாம் அமைத்தனர்.

இன்று நெடுந்தூர நடைபயண வீரர்கள் சரியாக 44 கிலோ மீற்றர் தூரத்தைக் கடந்திருந்தனர். மொத்தமாக 24-01-2001 திங்கள் இரவு வரை 323 கிலோ மீற்றர் தூரத்தைக் கடந்திருந்தனர்.

பத்தாவது நாளான நேற்று (25-01-2011, செவ்வாய்) ஓங்கோல் தேசிய நெடுஞ்சாலையில் முகாமிட்டிருந்த நடைபயண வீரர்கள் தேனீர் அருந்திவிட்டு காலை 07:00 மணியளவில் நடக்க ஆரம்பித்தனர்.

நடைபயண வீரர்களுக்கு மிகவும் சிறப்பான உணவு வகைகள் எதுவும் கொடுக்கப்படவில்லை, நடைபயண தலைமைக் குழுவினருக்கு பொருளாதாரப் பிரச்சினை காரணமாக அவர்களுக்கு தகுதியான அளவுதான் உணவாக தருகிறார்கள். நல்ல உணவு கொடுக்க முடியவில்லையே என்று நடைபயண தலைமைக்குழுவில் உள்ளவர்கள் மிகவும் கவலையடைகிறார்கள்.

ஆயினும் வீரர்கள் சாப்பாட்டை ஒரு பொருட்டாக நினைக்கவில்லை. எங்களுக்கு நடக்கும் போது தேனீரும் பாணும் கொடுத்தாலே போதும், எப்படியாவது நடைபயணம் வெற்றிபெற வேண்டும், நாங்கள் முகாமில் சிறப்பான உணவு வகைகள் எதுவும் சாப்பிட்டதில்லை. அதனால் எங்களுக்கு எந்த உணவையும் சாப்பிட்டுப் பழக்கம்தான் ஆகையால் நீங்கள் யோசிக்க வேண்டாம், நடைபயணம் வெற்றிபெரும், நாங்கள் இன்னும் 5000 கிலோ மீற்றர் துரத்தையும் நடந்து செல்வோம் என்று தங்களது மன உறுதியை நடைபயண குழுத் தலைவரிடம் வெளிப்படுத்தினர்.

ஏறக்குறை 400 கிலோ மீற்றர் தூங்களைக் கடந்துள்ளதால் சென்னையிலிருந்து பார்வையாளர்கள் வந்து பார்த்துவிட்டுப் போவதற்கும் மிகவும் சிரமமாக இருக்கும். எங்களது பொருளாதாரப் பிரச்சினை எங்கள் நடைபயண வீரர்களுக்கு நன்கு தெரியும். நடைபயண வீரர்கள் பெரும்பான்மையினர் நாங்கள் 2 மாதங்கள் நடக்க வேண்டும் என்று முன்பே தீர்மானம் எடுத்து, எங்களது நிலைமையை தெரிந்துகொண்டு, முன்பே அதிக நேரம் கடினமாக உழைத்து வீட்டிற்குத் தேவையானதை ஓரளவுக்குக் கொடுத்துவிட்டுத்தான் நடந்து வருகின்றனர்.

பல வீரர்கள் குடும்பத்தில் கஸ்டங்கள்தான். எதையும் பொருட்படுத்தாமல்தான் நாங்கள் குடும்பத்தைப் பார்த்துக்கொள்கிறோம் நீங்கள் சென்று வாருங்கள் என்று தெரிவித்துதான் தங்கள் குடும்பத்தின் தலைவரை பெண்கள் இந்த நடைபயணத்தில் சென்று வர அனுப்பிவைத்துள்ளனர்.

முகாம்களிலிருந்து போட்டிப்போட்டுக்கொண்டு வருவதற்கு இளைஞர்கள், மற்றும் மாணவர்கள் தயாராகத்தான் இருந்தார்கள் என்றாலும் நடைபயணக்குழுவின் பொருளாதாப்பிரச்சினை காரணமாக குழுத் தலைவர் அவர்கள் அத்தனைபேரையும் நிராகரித்துவிட்டார். அவர்களை டெல்லிக்கு அழைத்துச் செல்வதாக உறுதியளித்து அனுப்பி வைத்தார்.

நடைபயண வீரர்கள் ஒவ்வொருவரும் தங்களது குடும்பப் பிரச்சினைகளின் மத்தியில்தான் மனஉறுதியுடன் இந்த நடைபயணத்தை மேற்கொள்கின்றனர். நடைபயண வீரர்களின் குடும்பத்தினர் தொலைபேசியின் மூலம் தொடர்புகொண்டு எங்களைப்பற்றி பற்றி கவலைகொள்ள தேவையில்லை நாங்கள் நன்றாக இருக்கிறோம், பிள்ளைகள் கொம்யூட்டரில் நீங்கள் நடக்கிறதைப் பார்த்து “அப்பா சுதந்திரப் போராட்ட வீரர்” என்று சொல்லி பெருமைப்படுகிறார்கள் என்று நடைபயண வீரர்களுக்கு தெரிவித்து உற்சாகப்படுத்துகின்றனர்.

காலையிலிருந்து ஒவ்வொரு வீரர்களுக்கும் குடும்பத்தினர் தொலைபேசியில் தொடர்புகொண்டு புறப்பட்டுவிட்டீர்களா? எவ்வளவு தூரம் சென்றிருக்கிறீர்கள்? உணவை குறைத்துச் சாப்பிடுங்கள், இரவு நேரம் அதிக தூரம் நடவுங்கள் என்று ஆலோசனையும் சொல்லி வீரர்களுக்கு மனஉறுதியை கொடுத்து வருகின்றனர். உண்மையில் அவர்கள்தான் வீரர்கள்!

நாங்கள் காலை 08:40 மணியளவில் ஓங்கோல் நகரத்தை சென்றடைந்தோம். பின் தேசிய நெடுஞ்சாலையில் பயணித்து 09:30மணிக்கு காலை உணவையும், வெங்ட்ராயபுரம், பெத்தகோத்தப்பள்ளி வழியாக சீதாராம்புரம் என்ற இடத்தில் மதிய உணவிற்காக நடைபயணம் இடைநிறுத்தப்பட்டது.

மாலை 04:20 மணிக்கு மீண்டும் புறப்பட்ட எங்களது நடைபயணம் மடிப்பாடு, மண்டம்பள்ளி, மெடராமெட்லா என்ற இடங்களைக் கடந்து அடங்கி என்ற இடத்தில் இரவு 08:00 மணிக்கு இரவு ஓய்வுக்காக முகாம் அமைத்தோம்.

இன்று இரவு எட்டுமணி வரை 34 கிலோ மீற்றர் தூரத்தைக் கடந்தோம். 25-01-2011 செவ்வாய் இரவு 8மணி வரை மொத்தமாக 356கிலோ மீற்றர் தூரத்தைக் கடந்துள்ளோம்.

நன்றி!

சி.தயாபரன் (டேவிட்)

நிதி பொறுப்பு

நடைபயணம் தலைமைக் குழு

கைபேசி எண்: 00919490826037