ஈழத் தமிழர் விடுதலைக்கான நெடுந்தூர நடைப்பயணம் 11வது மற்றும்12 வது நாள் நிகழ்வுகள்!

25-01-2011 புதன் கிழமை காலை 06:45 மணிக்கு அடங்கி சாலையிலிருந்து புறப்பட்ட நெடுந்தூர நடைப்யயணம் 08:30 மணியளவில் அடங்கி நகரத்தை சென்றடைந்தது. ஒன்பது மணிக்கு காலை உணவை முடித்துக் கொண்ட நடைபயண வீரர்கள் குடிப்பாடு என்ற இடத்தை நோக்கி நகர்ந்தனர்.

25-01-2011 செவ்வாய் அன்று அடங்கி சாலையில் நடைபயண வீரர்கள் தங்கியிருக்கும் போது அருகில் உள்ள கிராமத்திலிருந்து ஒருவர் வந்தார். தன்னுடைய பெயர் சங்கர் என்றும் தான் மதுரை பக்கத்தில் உள்ளவர் என்றும் ஆந்திராவில் கடந்த 38 ஆண்டுகளாக முறுக்கு வியாபாரம் செய்து வருவதாகவும் தெரிவித்தார். ஆந்திரா தொலைக்காட்சி மற்றும் செய்தித்தாள்களில் படித்து எங்களைப் பற்றி அறிந்துகொண்டதாகவும் தெரிவித்தார். மிகுந்த பாசத்துடன் பழகிய அவர் நடைபயண வீரர்கள் இரவு உணவு சாப்பிடுவதைப் பார்த்தார். உங்களுடைய கஸ்ரங்கள் எனக்குத் தெரிகிறது என்று பாசத்துடன் பேசிவிட்டு சென்றார். சிறிது நேரத்தில் 2 மூடை அரிசியுடன் திரும்பவும் முகாமிற்கு வந்தார். நடைபயண தலைமைக் குழுவின் தலைவர் மங்களராஜா அவர்களிடம் கையளித்து, தங்களுடைய நடைபயணம் வெற்றிபெற வாழ்த்துக்கள் கூறி விடைபெற்றுச் சென்றார்.

தொடர்ந்து குடிப்பாடி நோக்கி நகர்ந்த நடைபயண வீரர்களுக்கு 12:30 மதிய உணவு வழங்கப்பட்டது. மீண்டும் மாலை 04:00 மணிக்குப் புறப்பட்ட நடைபயண வீரர்கள் குடிப்பாடு என்ற இடத்தைக் கடந்து இரவு 07:30 மணிக்கு பாவநாசி சேருவா (ஏரி) என்ற இடத்தில் இரவு முகாம் அமைத்தனர்.

ஒவ்வொரு இடத்தையும் கடக்கும் போது ஆந்திர மக்கள் நடைபயண வீரர்களுக்கு மிகவும் ஆதரவு காட்டி வருகிறார்கள். நடைபயண வீரர்கள் எதிர்நோக்கும் சிரமங்களை ஆந்திர பத்திரிகைகள் மூலம் தெரிந்துகொண்டு, அவர்கள் தாங்களாகவே வந்து உதவிகள் செய்கின்றனர். பல அரசியல் கட்சிகளைச் சேர்ந்தவர்களும் தொலைபேசியில் தொடர்பு கொண்டு உங்களுடைய பிரச்சினைக்கு நீங்கள் எடுக்கும் முயற்சிகள் வெற்றிபெற நாங்கள் நிச்சயம் ஆதரவு தருவோம் என்று தெரிவித்து வருகின்றனர்.

அதுமட்டுமல்லாது உதவிகளும் செய்கின்றனர். உயர்திரு. கோவர்த்தனா என்ற சிலுக்குவார் பேட்டை சேர்ந்த பெரியவர் ஒருவர் தாமாகவே முன்வந்து 50 மூடை அரிசியை வழங்கி தமிழர்கள் விடிவு பெற நீங்கள் எடுக்கும் முயற்சிகள் வெற்றி பெற இறைவனிடம் வேண்டுவதாகவும் தெரிவித்தார்.

மேலும் பிடிகுருவா என்ற இடத்தில் உள்ள தலைமை ஆசிரியர் ஒருவர் தானும் 10 மூடை அரிசியை தங்கள் இடத்தைக் கடக்கும் போது பெற்றுக் கொள்ளுங்கள் என்று அவருடைய இடத்தைக் கடந்து செல்லும் முன்பே வந்து உறுதி வழங்கிவிட்டு வாழ்த்துச் சொன்னார். இவ்வாறு ஆந்திர மக்கள் அபரிதமான அன்பு காட்டுகிறார்கள் நடைபயண வீரர்கள் மீதும், பாதிக்கப்பட்ட ஈழத் தமிழர்கள் மீதும்! அவர்கள் ஈழத் தமிழர்களின் வரலாற்றை அறிந்துகொள்வதற்காக தெலுங்கு மொழியில் அச்சு செய்யப்பட்ட பிரசுரங்கள் வழங்கப்படுகின்றன.

26-01-2011 புதன்கிழமை நடைபயண வீரர்கள் சரியாக 39 கிலோ மீற்றர் தூரத்தைக் கடந்தனர். மொத்தமாக 395 கிலோ மீற்றர் தூரத்தைக் கடந்திருந்தனர்.

27-01-2011 வியாழன் அன்று காலை 06:45 மணியளவில் பாவநாசிசேருவு என்ற ஏரிக்கரையிலிருந்து புறப்பட்ட நடைபயண வீரர்கள், வென்முகபாலம் என்ற இடத்தில் காலை 09:00 மணிக்கு காலை உணவை முடித்துக்கொண்டனர். நடைபயணத்தின் போது அவ்வப்போது தேனீர், குளிர்பானம் மற்றும தண்ணீர் கொடுக்கப்பட்டு வருகிறது.

காலை உணவை முடித்துக்கொண்டு புறப்பட்ட நடைபயண வீரர்கள் மதியம் 01:00 மணிக்க பிடிகுருலா என்ற இடத்தை சென்றடைந்தனர். அங்கே மதிய உணவை முடித்துக்கொண்டனர். அங்கிருந்த மாலை 04:10 மணிக்குப் புறப்பட்ட நடைபயண வீரர்கள் சாந்தக்குடிபாடு என்ற இடத்தைக் கடந்து இரவு 07:45 மணிக்கு நிகரிகாலு என்ற இடத்தில் இரவு முகாம் அமைத்தனர்.

இன்று நடைபயண வீரர்கள் 38 கிலோமீற்றர் தூரத்தையும் மொத்தமாக 433 கிலோ மீற்றர் தூரத்தைக் கடந்திருந்தனர்.

நடைபயண வீரர்கள் ஆந்திர மக்கள் கொடுக்கும் உற்சாக மிகுதியினால் களைப்புத் தெரியாமல் சராசரி தூரத்தை தினமும் கடந்து செல்கின்றனர். என்றாலும் ஒரு சில நடைபயண வீரர்களுக்கு கால் வலி ஏற்படுவதாக தெரிவித்தார்கள். அவர்களை ஒரு நாள் ஓய்வு கொடுக்கலாம் என்றதும் அந்த வீரர்கள் தேவையில்லை நாங்கள் நடப்போம் என்று தெரிவித்து நடந்து வருகின்றனர். இருந்தாலும் அனைவருக்கும் மருத்துவ பரிசோதனை மீண்டும் செய்ய வேண்டும் என்று நடைபயண குழுத் தலைவர் திரு. மங்களராஜா அவர்கள் ஈழ தேசிய ஜனநாயக விடுதலை முன்னணியின் தலைவர் ஞா.ஞானசேகரன் அவர்களிடம் கேட்டுக்கொண்டார்.

நடைபயணக் குழுவோடு மருத்துவக் குழுவும் சென்றுள்ளது. மருத்துவர் ஒருவரும் இருக்கிறார். என்றாலும் சென்னையிலிருந்து சிறப்பு மருத்துவர் இருவரை அனுப்பி வைப்பதாக ஈ.என்.டி.எல்.எப். தலைவர் ஞா.ஞானசேகரன் அவர்கள் தெரிவித்துள்ளார்.

சி.வசீகரன்

நடைபயண தலைமைக் குழு