ஈழத் தமிழர் விடுதலைக்கான நெடுந்தூர நடைப்பயணம் 13,14 மற்றும் 15நாள் நிகழ்வுகள்!

28-01-2011 வெள்ளிக்கிழமை நெடுந்தூர நடைப்பயண வீரர்கள் அதிகாலை 05:30 மணிக்கு தேனீர் அருந்திவிட்டு பிடிகுருலா நோக்கி நடக்க ஆரம்பித்தனர். சரியாக 08:35 மணிக்கு பிடிகுருலா நகரத்தில் கால் பதித்தனர். பிடிகுருலா நகரத்தில் சி.பி.எம். என்ற பத்திரிகையிலிருந்து வந்திருந்தார்கள். அவர்களுக்கு 10நிமிடம் ஒதுக்கப்பட்டு பத்திரிகையாளர் பேட்டி எடுத்தார்.

நடைபயணத்தை தலைமையேற்று நடத்தும் உயர்திரு. ஞா.ஞானராஜா அவர்களும் திரு. சி. தயாபரன் (டேவிட்) அவர்களும், சீ. வசீகரன் அவர்களும் பேட்டி கொடுத்தார்கள். பேட்டி முடிந்ததும் காலை உணவை நடைபயண வீரர்கள் பிடிகுருலாவிலே முடித்துக் கொண்டார்கள்.

காலை உணவை முடித்துக் கொணடு புறப்பட்ட நடைபயணம் ப்ரக்மனபள்ளி என்ற இடத்தைக் கடந்து சிறிது தூரத்தில் மதியம் 12:00 மணிக்கு மதிய உணவிற்காக இடைநிறுத்தம் செய்தார்கள். சற்று ஓய்வு எடுத்தக்கொண்டு மாலை 04:00 மணிக்கு தொடர்ந்த நடைபயணம் அஜனிபுலம், சாம்பசிவபேட்டா என்ற இடங்களைக் கடந்து டச்சபள்ளி என்ற இடத்தில் இரவு 08:00 மணிக்கு இரவு முகாம் அமைத்தார்கள்.

இரவு 08:00 மணி வரை 37 கிலோ மீற்றர் தூரத்தைக் கடந்தனர். மொத்தமாக 470 கிலோ மீற்றர் தூரத்தைக் கடந்திருந்தனர்.

29-01-2011 சனிக்கிழமை 14வது நாள் அதிகாலை 05:30 மணிக்கு டச்சபள்ளியிலிருந்து தொடர்ந்த நடைபயணம் விஷ்ணுபுரம் என்ற இடத்தில் காலை 08:40 மணிக்கு நடைபயண வீரர்கள் காலை உணவை முடித்துக்கொண்டு தொடர்ந்த நடைபயணம் மதியம் 12:30 மணியளவில் கொண்ராபொல் என்ற இடத்தில் முகாம் அமைத்தனர். அங்கே மதிய உணவையும் வீரர்கள் தங்களது உடுப்புகளை கழுவி சுத்தம் செய்து கொண்டனர். மதியத்திற்கு மேல் ஓய்வு கொடுக்கப்பட்டிருந்தது.

29-01-2011 சனிக்கிழமை நடைபயண வீராகள் 24.8 கிலோ மீற்றர் தூரத்தை கடந்தார்கள். மொத்தமாக 494.8 கிலோ மீற்றர் தூரத்தைக் கடந்துள்ளார்கள்.

30-01-2011 ஞாயிறு 15வது நாள் நடைபயண வீரர்களுக்கு முழு ஓய்வு கொடுத்து மருத்துவ சோதனை முகாம் நடத்தப்பட்டது. இதில் கும்மிடிபூண்டி அகதிகள் முகாமைச் சேர்ந்த திரு. மைக்கேல் என்ற நடைபயண வீரருக்கு விதை வீக்கம் ஏற்பட்டிருந்ததால் அவருக்கு மருத்துவம் செய்து ஓய்வு கொடுக்கப்பட்டது.

மேலும் ஒரிசாவிலிருந்து வந்திருந்த திரு. லோகநாதன் மற்றும் திரு. சிவலிங்கம் என்ற இருவருக்கும் நுழம்பு கடித்து டைபாய்டு காய்ச்சலால் அவதிப்பட்டனர். அந்த வருத்தத்தோடுதான் இரண்டு நாட்களாக நடைபயணத்தை மேற்கொண்டனர். அவர்களுக்கும் மருத்துவ பரிசோதனை செய்து மருந்துகள் கொடுக்கப்பட்டு இரண்டு நாட்கள் ஓய்வெடுக்கும்படி மருத்துவ ஆலோசனை சொல்லப்பட்டது. மீதமுள்ள அனைத்து நடைபயண வீரர்களும் நல்ல உடல் தகுதியோடு இருக்கிறார்கள் என்று மருத்துவர்களால் பரிந்துரைக்கப்பட்டது.

உடல்தகுதியில்லாத இந்த மூன்று நபர்களைத் தவிர அனைத்து வீரர்களும் நாளை 31-01-2011 திங்கட்கிழமை அதிகாலை தங்களது நெடுந்தூர நடைபயணத்தை தொடர்ந்து மேற்கொள்வார்கள்.

இவ்வண்ணம்,

திரு. அகதா

நடைபயண தலைமைக் குழு