1983 நினைவுகளும் நாம் செய்ய வேண்டியவையும்

இலங்கையின் சமகால வரலாற்றின் கறைபடிந்த அத்தியாயமான ஜூலை 83 படுகொலைகள் நிகழ்ந்து 27 ஆண்டுகள் உருண்டோடி விட்டன. வழமைபோல் கண்ணீர் விடுவதிலோ, சுயபச்சாத்தாபத்தில் மூழ்குவதிலேயோ காலத்தை கடத்தாமல் ஆக்கபூர்வமான முறையில் சிந்திக்க வேண்டு;ம். 1983 இன வன்முறையின் பின்னர் குறிப்பாக தமிழ் பேசும் மக்களும் இந்த நாட்டின் அனைத்து இன சமூகங்களும் சிந்தியுள்ள ரத்தத்தையும் இழப்புக்களையும் நாம் சிந்தித்துப் பார்க்க வேண்டும்.

83 இன வன்முறையை சொல்லி சொல்லியே வன்முறையையும், குரோதத்தையும் வளர்க்காமல் இனிமேலும் இத்தகைய கொடூரங்கள் நிகழாமல் பார்த்துக் கொள்வதும் ஆக்கபூர்வமாக செயற்பட முனைவதுமே இப்போதுள்ள முதலும் முக்கியமான தேவையுமாகும். இலங்கையில் இன சமூகங்களிடையே எவ்வாறு ஜனநாயக ரீதியாக உறவுகளை நிலைநாட்டுவது, சந்தேகங்கள், ஐயங்களை நீக்குவது, சமாதான சகவாழ்வை நிலைநாட்டுவது பற்றி சிந்திப்பதே மக்கள் சமூகம் பற்றிய அக்கறையுள்ளவர்கள் செய்யக்கூடிய காரியமாகும்.

அகதிகளான மக்கள் சுயமரியாதை கௌரவத்துடன் தமது சொந்த இடங்களில் வாழ்வதற்கான ஏற்பாடுகளை செய்வது. வறுமையில் உழலும் மக்களின் வாழ்வை மேம்படுத்த முயற்சிப்பது தீண்டாமை, பெண்ணடிமைத்தனம் போன்றவற்றை ஒழித்துக்கட்டுவது. சமூகத்தின் சகல தளங்களிலும் ஜனநாயகம் மனித உரிமைகளை நிலைநாட்டுவது. வன்முறை ஒழிந்த அச்சுறுத்தல் இல்லாத சுதந்திர வாழ்வை உறுதிப்படுத்துவது என்பனவே இப்போது வரலாறு எம்மீது சுமத்தியுள்ள கடமையாகும்.

பகைமையையும் காழ்ப்புணர்வையும் பெருமிதவாத உணர்வுகளையும் நாம் முதலில் களைந்தெறிய வேண்டும். கடந்த கால் நூற்றாண்டுகளாக எமக்குக் கிடைத்த அனுபவ பாடங்களை கருத்திற்கெடுத்து நாம் செயற்பட வேண்டும். குறிப்பாக தமிழ் அரசியல் தலைமைகள் மலையக, முஸ்லீம் அரசியல் தலைமைகளுடன் கலந்து பேசி நல்லுறவை ஏற்படுத்திக் கொள்ள வேண்டும். சிங்கள மக்கள் மத்தியில் உள்ள முற்போக்கு ஜனநாயக சக்திகளுடன் உறவுகளை பலப்படுத்த வேண்டும். இவ்வாறான பரந்தவொரு கலந்துரையாடல் களம் உருவாக்கப்பட்டு இனப்பிரச்சனை உட்பட நாட்டின் சமூக பொருளாதார வாழ்வை கட்டியெழுப்புவதற்கான முயற்சிகளில் ஈடுபட வேண்டும்.

எமது நாட்டில் மனிதர்களால் உருவாக்கப்பட்ட அராஜக கலாச்சாரத்தையும், எமது நாடும் உலகமும் எதிர்நோக்கும் இயற்கையின் சவால்களில் இருந்து மனிதகுலத்தை பாதுகாப்பதற்கான எமது பங்கையும் ஆற்றத்தலைப்பட வேண்டும். காலத்தையும் நேரத்தையும் கீறல் விழுந்த ரெக்காட் போல் பழங்கதைகள் பேசி காலத்தை கழிக்காமல் காரிய சாத்தியமான வழியில் செயற்பட தலைப்பட வேண்டும்.

எம்மவர்கள் செயல் ரீதியாக அல்லாமல் சொற்சிலம்பமாடுவதில் விண்ணர்கள் என்ற குற்றச்சாட்டு பரவலாக உண்டு. கூட்டத்தில் கூடிநின்று கூடிப்பிதற்றலன்றி நாட்டத்தில் கொள்வோம் . எமது மக்களுக்கு நல்வாழ்வொன்றை கட்டியெழுப்புவதற்கு என்னவெல்லாம் செய்ய முடியுமோ அதற்காக உணர்ச்சிகளுக்கு இடமளியாமல் ஆக்கபூர்வமாக செயற்படுவோம்.

இத்தகைய செயன்முறையே ஜூலை 83 போன்ற சம்பவங்கள் மீண்டும் நிகழாமல் இருப்பதற்கும் இன சமூகங்களிடையே சந்தேகங்களை இல்லாதொழிப்பதற்கும் எமது மக்களுக்கு செழிப்பான வாழ்வொன்றை உருவாக்குவதற்கும் உதவும்.

தி. ஸ்ரீதரன்

பொதுச்செயலாளர்

பத்மநாபா ஈ.பி.ஆர்.எல்.எப்