பாராளுமன்ற அரசியலிலிருந்து ஆனந்த சங்கரி ஓய்வு

55 வருட அரசியல் வாழ்விலி ருந்தும் பாராளுமன்ற அரசியலி ருந்தும் ஒதுங்கிக் கொள்வதாக தமிழர் விடுதலைக் கூட்டணியின் தலைவர் வீ. ஆனந்தசங்கரி அறிவித்துள்ளார். 1952 ம் ஆண்டில் தனது அரசியல் வாழ்க்கையை ஆரம்பித்து 59 ம் ஆண்டிலிருந்து தீவிர அரசியலில் ஈடுபட்டு மக்களுக்கு சலிக்காது தொண்டாற்றி வந்ததாகவும், இந்த வாழ்க்கையிலிருந்து ஒதுங்கிக் கொள்ளத் தீர்மானித்திருப்பதாகவும் ஆனந்தசங்கரி வெளியி ட்டிருக்கும் அறிக்கையில் குறிப்பிட்டுள்ளார்.

அவர் விடுத்திருக்கும் அறிக்கையில் மேலும் குறிப்பிடப்பட்டுள்ளதாவது, ஏறக்குறைய 60 ஆண்டுகளின் பின் கடந்து வந்த பாதையை திரும்பி பார்க்கும்போது எனக்கு வெறுமைபோல் தோன்றுகிறது. சமூக சேவையில் இருந்த ஈடுபாடே என்னை அரசியல்வாதி ஆக்கியது. அரசியலூடாகவே சமூக சேவை செய்வது இலகுவாக இருந்ததால், ஓயாமல் ஓடி உழைத்தேன். உண்மையை உரத்துக் கூறினேன் உண்மையாகவே நடந்தேன் சமூகம் என்னை ஏற்று பதவிகளை தந்தது.

கிராம சபைத் தலை வராக, பட்டன சபைத் தலைவராக, பாராளுமன்ற உறுப்பினராக உயர வைத்தும் பார்த்தது. தந்தை செல்வா அஹிம்சாவாதி, அவர் வழி அஹிம்சை வழி, அவர் இன ஒற்றுமையையும், எமது மக்களின் விடு தலையையும் விரும்பினார். அவர் விருப்பத்தை நிறைவேற்ற அவர் விட்டுச் சென்ற பணியில் நிரந்தரமாக ஈடுபட உத்தேசித்து, அமரர் அமிரின் தலைமையில் ஏனைய பலரின் பங்கெடுப்போடு அரசியல் பணி அதி தீவிரமாக நடந்தது.

இன்று அவர்கள் அனைவரும் மறைக்கப்பட்ட, மறக்கப்பட்ட நிலையில், தமிழர் விடுதலைக் கூட்டணியின் பெருந் தலைவர்களுடன் இணைந்து பணியாற்றிய நான், முறைப்படி அக்கட்சியின் செயலாளர் நாயகமாக உயர்ந்தும், சந்தர்ப்ப சூழ்நிலை களால் என்னால் தந்தை செல்வாவின் கனவை நிறைவேற்ற முடியவில்லை. என்பதை எனது இந்த 81 வது பிறந்த தினத்தில் எண்ணிப் பார்க்கின்றேன்.

யுத்தம் ஏற்பட்டு பல்லாயிரக் கணக்கான மக்கள் பலியானதுதான் உண்மை. யுத்தத்தால் பாதிக்கப்பட்ட மக்களுக்காக மக்களின் அங்கீகாரத்துடன் ஒரு பதவியில் அமர்ந்து அவர்களுக்கு சேவை செய்யலாம் என்ற எண்ணத்தினால்தான் யாழ் மாநகர சபைத் தேர்தலிலும், வடமாகாண சபைத் தேர்தலிலும் போட்டியிட்டேனே தவிர, பதவி மோகத்தினால் அல்ல. மக்களின் நலனை கருதியே அத்தேர்தல்களில் போட்டியிட்டேன். அதையும் திட்டமிட்டு பொய்ப் பிரசாரங்கள் மூலம் என்னை தோற்கடித்தனர்.

அதனால் இனி எதிர் காலத்தில் நடக்கும் எந்தத் தேர்தலிலும் போட்டியிடப் போவதில்லை என தீர்மானத்துள்ளேன். உயர்ந்த இலட்சியத்தை அடைவதற்காக தந்தை செல்வாவினால் உருவாக்கப்பட்ட தமிழர் விடுதலைக் கூட்டணியை பலப்படுத்தி தந்தை செல்வாவின் கனவை நனவாக்குவதற்கும், யுத்தத்தால் எல்லாவற்றையும் இழந்து நிற்கும் எமது மக்களின் நல் வாழ்விற்காகவும் எனது எஞ்சிய காலத்தை செலவு செய்யத் திட்டமிட்டுள்ளேன். எனது எதிர்காலத் திட்டம் பற்றி விரைவில் விரிவான அறிக்கையொன்றை வெளியிடுவேன் என்று அதில் மேலும் குறிப்பிடப்பட்டுள்ளது.