யாழ்ப்பாணத்தில் தியாகிகள் தினம்

பத்மநாபா ஈழ மக்கள் புரட்சிகர விடுதலை முன்னணியின் யாழ் பிராந்திய அலுவலகத்தில் இன்று பிற்பகல் 3.00 மணியளவில் தியாகிகள் தின நிகழ்வுகள் இடம்பெற்றது. தமிழ் மக்களின் விடிவிற்கான போராட்டத்தில் தம் உயிரை அர்ப்பணித்த கட்சித் தோழர்கள், சகோதர இயக்கங்களின் போராளிகள், பொதுமக்கள் ஆகியோரை நினைவு கூரும் தியாகிகள் தின நிகழ்வுகளில் தோழர்கள், ஆதரவாளர்கள், உயிரிழந்த தோழர்களின் பெற்றோர்கள், உறவினர்கள், நண்பர்கள், நலன்விரும்பிகள் பலரும் கலந்துகொண்டனர். பத்மநாபா ஈ.பி.ஆர்.எல்.எப் இன் யாழ் பிராந்திய செயலாளர் தோழர் மோகன் தலைமையில் நடைபெற்ற இந்த நிகழ்வில் கட்சியின் பொதுச்செயலாளர் தி.ஸ்ரீதரன் உயிர் நீத்த தோழர்களின் உருவப்படத்துக்கு விளக்கேற்றி அஞ்சலி செலுத்தி நிகழ்வை ஆரம்பித்து வைத்தார்.

இதனைத் தொடர்ந்து மரணித்த தோழர்களின் உருவப்படத்திற்கு தோழர்களின் தாயார் பிரான்சிஸ் விமலாதேவி உயிர்நீத்த தோழர்களின் சகோதரி பாலசுப்பிரமணியம் ஈஸ்வரி ஆகியோர் மலர்மாலை அணிவித்தனர்.

தோழர் மோகன் அவர்கள் தனது தலைமை உரையில் கட்சியின் ஆரம்பகால அரசியல், சமூக செயற்பாடுகள், இணைந்த வடக்கு கிழக்கு மாகாண நிர்வாகத்தை தலைமையேற்று நடத்தியது பற்றியும் அதனை செயற்படவிடாமல் செய்த புலிகளின் ஜனநாயக விரோத போக்கு, ஏக பிரதிநிதித்துவ அரசியல் செயற்பாடுகள் பற்றியும் இதனை கண்டுகொள்ளாமல் இருந்த எமது சமூகம் பற்றியும், ஊடகங்கள் பற்றியும் குறிப்பிட்டார்.

பொதுச்செயலாளர் தி.ஸ்ரீதரன் உரையாற்றுகையில் ஈழ விடுதலை போராட்டத்தில் தன்னை அர்ப்பணித்த அனைவரும் மதிக்கப்பட வேண்டியவர்கள், கௌரவிக்கப்பட வேண்டியவர்களே. போராளிகள் எமது சமூகத்திலிருந்து உருவானவர்களே. அவர்களிடம் பல குறைபாடுகள் இருக்கலாம் ஆனால் அவர்கள் ஏனையோரின் விடுதலைக்காகவே தம் உயிரை அர்ப்பணித்துள்ளார்கள். ஆனால், சமூகத்தின் நலனுக்காக எந்த பங்களிப்பையும் வழங்காதவர்களே இன்று தமிழ் சமூகத்துக்கு தலைமை தாங்குபவர்களாய் உள்ளார்கள். அப்படியானவர்களையே எமது தமிழ் சமூகம் உருவாக்கிவிட்டுள்ளது. இதிலிருந்து என்ன தெரிகிறது. தமிழ் சமூகத்தில் பெரிய கோளாறு காணப்படுகிறது. தமிழ் சமூகம் அறிவு ரீதியாக யதார்த்தபூர்வமாக சிந்தித்துச் செயற்பட வேண்டியதும் அனைவரும் ஒன்றிணைந்து செயற்பட வேண்டியதும் அவசியமாகும்.

ஞானசக்தி உரையாற்றுகையில் போராட்டத்தில் பெண்களின் பங்களிப்பு பற்றியும் அவர்கள் தற்போது எதிர்நோக்கியுள்ள பிரச்சினைகள் பற்றியும் எடுத்துரைத்தார். இறுதி யுத்தத்தின் பின்னர் குடும்பத் தலைவர்களை இழந்த பெண்கள் மற்றும் அங்கவீனமுற்றோர்கள, குடும்பப் பொறுப்புக்களை ஏற்றுக்கொண்டுள்ளவர்களின் நிலைம பற்றியும் எடுத்துரைத்தார். புலிகளின் பாதிக்கப்பட்ட பெண்களைகூட இன்று எமது சமூகம் ஒதுக்கி வைத்துள்ளமை பற்றி விரித்துரைத்தார்.
தோழர் குமார் உரையாற்றுகையில் தோழர் பத்மநாபா மலையக மக்கள் பற்றிய விடயத்தில் மிக அக்கறையுடன் செயற்பட்டார். தொழிற்சங்க உறவுகளை கொண்டிருந்த அவர் தொழிலாளர்களின் அடிப்படை உரிமைகள் பற்றிய விடயத்திலும், வர்க்க விடுதலையையும் கொள்கையாக கொண்டிருந்தவர். அவரின் இழப்பு தொழிலாளர் வர்க்கத்துக்கு பேரிழப்பாகும். வன்னியில் இறுதி யுத்தத்தின் போது பெரும்பாலும் மலையகத் தமிழர்களே. புலிகள் அவர்களை பயன்படுத்தி இறுதியில் அவர்களை நடுத்தெருவில் விட்டுவிட்டார்கள்.

தோழர் யோகன் உரையாற்றுகையில் இலங்கையில் தியாகிகள் தினம் வரலாற்றில் முக்கிய தினமாகும். குறிப்பாக தோழர் பத்மநாபா அவர்களின் இழப்பு எமது சமூகத்துக்கு ஈடு செய்ய முடியாதது என்றார். ஐக்கியம், சமூக விடுதலை ஆகிய விடயங்களில் மிகவும் அக்கறை கொண்டவர்.

இரத்ததான நிகழ்வு

உயிர்நீத்த தோழர்களின் நினைவாக யாழ் போதனா வைத்தியசாலையில் தோழர்களால் இன்று இரத்ததான வழங்கும் நிகழ்வு இடம்பெற்றது