ஈழத் தமிழர் விடுதலைக்கான நெடுந்தூர நடைபயணம் - 45,46வதுநாள் நிகழ்வுகள்!

ஈழத் தமிழர் விடுதலைக்கான நெடுந்தூர நடைபயணத்தின் 45வது நாளான (01-03-2011, செவ்வாய்) நேற்று தேசிய நெடுஞ்சாலை – 26ல் நடைபயண வீரர்கள் பயணத்தைத் தொடர்ந்தனர். மதியம் 1:00 மணியளவில் நர்மதா ஆற்றங்கரையை அடைந்தனர். அங்கு நடைபயண வீரர்கள் நீராடியபின் மதிய உணவை எடுத்துக்கொண்டனர். மதிய உணவை முடித்து சிறிது நேர ஓய்வுக்குப் பின் பயணத்தைத் தொடர்ந்து மாலை 6 மணியளவில் “பிராஸ்” என்ற இடத்தில் முகாம் அமைத்தனர். மத்திய பிரதேச மாநிலத்தில் கடுங்குளிரான காலநிலை நடந்துகொண்டிருப்பதால் நடைபயண வீரர்கள் காலை 6மணி முதல் பகல் முழுவதும் நடைபயணத்தை மேற்கொண்டு மாலை 6மணியளவில் முகாம் அமைத்துவிடுகின்றனர். நடைபயண வீரர்கள் நேற்று மாலை 6மணி வரை 40கிலோ மீற்றர் தூரத்தைக் கடந்திருந்தனர்.

இதற்கிடையில் நடைபயணக் குழுவில் அகால மரணமடைந்த திரு. சுதர்சன் அவர்களின் நண்பர் திரு. குலரூபன் அவர்கள் தனது நண்பரின் இறுதிச் சடங்குகளை முடித்துவிட்டு தனது பெற்றோர், நண்பர்கள் மற்றும் முகாம் மக்களின் வாழ்த்துக்களுடனும் அனுமதியுடன் மீண்டும் நடைபயணத்தை மேற்கொள்ள இன்று புறப்பட்டுச் செல்கிறார்.

46வது நாளான (02-03-2011, புதன்) இன்று காலை 6மணிக்கு “பிராஸ்” என்ற இடத்திலிருந்து நடைபயணம் புறப்பட்டு, தேசிய நெடுஞ்சாலை-26ல் ‘சாகர்’ என்ற மாநகரத்தை நோக்கிப் பயணித்தது.

இன்று பகல் வேளை “கரையலி” என்ற நகரத்தை அடைந்தனர். அங்கு பொதுமக்கள் நல்ல வரவேற்பளித்தனர். நடைபயண வீரர்கள் கரையலி நகரத்தை அடைந்தவேளை, காலை அனைத்துத் தினசரி செய்தித் தாள்களிலும் படத்துடன் நடைபயணத்தின் நோக்கத்தை பிரசுரித்திருந்தார்கள். அதிலும் “பப்ளிக் சமாச்சார்” (மக்கள் செய்தி) என்ற பிரபலமான செய்தித்தாள் நிறுவனமும் மற்றும் சில பிரபலமான செய்தி நிறுவனங்களும் முன்பக்கத்தில் நடைபயணத்தைப் பற்றிய செய்திகளை பிரசுரித்திருந்தது.

அதன் மூலம் நடைபயணத்தைப் பற்றி தெரிந்து கொண்ட பொதுமக்கள் மற்றும் கட்சிகளைச் சேர்ந்தவர்கள் அனைவரும் நடைபயண வீரர்களை உற்சாகமாக வரவேற்று, நடைபயணம் வெற்றிபெற வாழ்த்துக் கூறினர். தொலைபேசி எண்களை நடைபயண வீரர்களிடம் கொடுத்து என்ன உதவிகள் வேண்டுமென்றாலும் நாங்கள் நிச்சயமாக செய்வோம் என்று அன்புடன் விடைகொடுத்தார்கள்.

நடைபயண விரர்கள் இன்று “சாகர்” என்ற மாநகரத்திற்கு 50 கிலோமீற்றர் தூரத்திற்கு முன்பு “கோல்மார்” என்ற இடத்தில் தேசிய நெடுஞ்சாலையில் முகாம் அமைத்தனர்.

நடைபயண வீரர்கள் இன்றும் 40 கிலோ மீற்றர் தூரத்தைக் கடந்தனர். நடைபயண வீரர்கள் இன்னும் கடக்க வேண்டிய தூரம் 642கிலோ மீற்றர் தூரம் மட்டுமே!

இதற்கிடையில் நேற்று காலை புதுக்கோட்டை அகதிகள் முகாமில் இருந்து புறப்பட்ட திரு. குலரூபன் அவர்கள் இன்று இரவு 10:00 மணியளவில் நடைபயணக் குழுவினருடன் இணைந்துகொள்வார் என எதிர்பார்கப்படுகிறது.

எந்தப் பிரச்சினைகளையும் பொருட்படுத்தாது, விடுதலை உணர்வோடு, ஈழத் தமிழர் விடுதலைக்கான நெடுந்தூர நடைபயணம் வெற்றிபெறுவதற்காக, திரு. குலரூபன் அவர்களை மீண்டும் நடைபயணத்தை மேற்கொள்வதற்காக வாழ்த்துக் கூறி அனுப்பிவைத்துள்ள அவரது பெற்றோருக்கும், உறவினர்களுக்கும், நணபர்களுக்கும் மற்றும் முகாம் மக்களுக்கும் நடைபயணக் குழுவினர் சார்பாகவும், ஈழ தேசிய ஜனநாயக விடுதலை முன்னணி சார்பாகவும் நன்றியை தெரிவித்துக்கொள்கிறோம்.

நன்றி!

இவ்வண்ணம்,

கிறேசியன்

நடைபயண தலை மைக் குழு