ஈழத் தமிழர் விடுதலைக்கான நெடுந்தூர நடைபயணத்தின்: 51,52வது நாள் நிகழ்வுகள்!

ஈழத் தமிழர் விடுதலைக்கான நெடுந்தூர நடைபயணத்தின் 51வது நாளான (07-03-2011, திங்கள்) நேற்று நடைபயண வீரர்கள் தேசிய நெடுஞ்சாலை – 26ல் பயணித்து பகல் 12:30 மணியளவில் “லலித்பூர்” என்ற நகரத்தை அடைந்தனர். “லலித்பூர் நகரத்தில் நடைபயண வீரர்களுக்கு பொதுமக்கள் நல்ல வரவேற்பைக் கொடுத்தனர். நடைபயண வீரர்கள் கொடுத்த, இலங்கை இராணுவத்தின் கொடுமைகள் அடங்கிய துண்டு பிரசுரத்தைப் பார்த்து அங்குள்ள மக்கள் ஈழத் தமிழர்கள் மீது நடத்தப்பட்ட கொடுமைகள் கண்டு மிகவும் வேதனைப்பட்டனர்.

மூதாட்டி ஒருவர் குழந்தையின் தலை சிதறிய படத்தைப் பார்த்ததும் அழுதுவிட்டார். என்ன கொடுமை இதற்கெல்லாம் இறைவன் ஒருநாள் தீர்ப்பு சொல்வார் என்று இந்தியில் தெரிவித்து கண்ணீர் வடித்தார். இந்திமொழி தெரிந்த நடைபயண வீரர்கள் பொதுமக்களுக்கு விளக்கங்களை தெரிவித்துக் கொண்டு வந்தனர்.

மேலும், மிகவும் பிரபலமான “சகாரா” தொலைக்காட்சி நிறுவனமும், “சகாரா இந்தியா” என்ற பத்திரிகையும் மேலும் இரு பத்திரிகைகளும் நடைபயண வீரர்களுடன் சந்திப்பு ஒன்றை நடத்தினர். பத்திரிகை நண்பர்களுக்கு திரு. பிரபா அவர்கள் மிகத் தெளிவாக இந்தியில் பேட்டிக் கொடுத்திருந்தார்.

“லலித்பூர்” நகரைக் கடந்தவுடன் மதிய உணவை எடுத்துக் கொண்டனர் நடைபயண வீரர்கள். மீண்டும் நடைபயணத்தைத் தொடர்ந்து “லலித்பூர்” நகரைத் தாண்டி 20வது கிலோ மீற்றர் தொலைவில் தேசிய நெடுஞ்சாலையின் அருகில் முகாம் அமைத்தனர். 51வது நாளான நேற்று (07-03-2011) 40 கிலோ மீற்றர் தூரத்தை நடைபயண வீரர்கள் கடந்தனர்.

52வது நாளான (08-03-2011, செவ்வாய்) இன்று காலை 05:30 மணியளவில் புறப்பட்ட நடைபயணம் மாலை 06:30 மணியளவில் “லலித்பூர்” நகரத்திலிருந்து 58வது கிலோ மீற்றர் தூரத்தில் முகாம் அமைத்தனர்.

நடைபயண வீரர்கள் 52வது நாளான இன்று 38கிலோ மீற்றர் தூரத்தைக் கடந்திருந்தனர். நடைபயண வீரர்கள் இன்னும் கடக்க வேண்டிய தூரம் 429 கிலோ மீற்றர் தூரம் மட்டுமே!

இதற்கிடையில், கடந்த ஞாயிற்றுக் கிழமை (06-03-2011) இரவு பிரான்சில் இருந்து ஒலிப்பரப்பாகும் மிகவும் பிரபலமான ரி.ஆர்.ரி. வானொலி சேவை நடைபயண வீரர்களின் நோக்கங்கள் சம்பந்தமாக ஈழ தேசிய ஜனநாயக விடுதலை முன்னணி (ஈ.என்.டி.எல்.எப்.)யின் தலைவர் ஞா.ஞானசேகரன் அவர்களின் கருத்துக்களையும் நேயர்களின் கேள்விக்கான பதிலையும் நேரடி ஒலிபரப்பாக நீண்ட நேரம் ஒலிபரப்பியது.

இந்த நேரடி ஒலிபரப்பை அவர்களது இணையதளத்திலும் இணைத்திருந்தார்கள். அதை இன்று நடைபயண வீரர்களுக்கு மடி கணணி மூலமாக தெரிவிக்கப்பட்டது. நடைபயண வீரர்கள் களைப்பு நீங்கி உற்சாகமடைந்தனர். ரி.ஆர்.ரி வானொலிக்கு மனதார நன்றியை தெரிவித்துக் கொண்டனர்.

ஈ.என்.டி.எல்.எப். தலைவர் அவர்களின் பேட்டி அடங்கிய ஒலிபரப்பை www.tamilolli.com என்ற இணையதளத்தின் ஊடாக கேட்கலாம். நெடும்பயண இணையதளமான www.liberationmarch.com இணையதளத்தில் விரைவில் கேட்கலாம்.

நன்றி!

இவ்வண்ணம்,

சி.தயாபரன்

நடைபயண தலைமைக்குழு