ஈழத் தமிழர் விடுதலைக்கான நெடுந்தூர நடைபயணம் - 53,54வது நாள் நிகழ்வுகள்!

ஈழத் தமிழர் விடுதலைக்கான நெடுந்தூர நடைபயணத்தின் 53வது நாளான (09-03-2011, புதன்) நேற்று நடைபயண வீரர்கள் காலை 05:30 மணியளவில் தேசிய நெடுஞ்சாலையில் “ஜான்சி” என்ற மாநகரத்தை நோக்கிப் பயணித்தனர்.“ஜான்சி” நோக்கிப் பயணித்த நடைபயண வீரர்கள் 35 கிலோ மீற்றர் தூரம் பயணித்து “ஜான்சி” மாநகரத்திற்கு 5கிலோ மீற்றர் தூத்திற்கு முன்னாள் முகாம் அமைத்தனர்.

இதேவேளை, நடைபயண வீரர்களுக்கு வாழ்த்து தெரிவிக்க மேற்கு நாடுகளிலிருந்து தொலைபேசி அழைப்புகள் தொடர்ந்து  வந்துகொண்டிருந்தது. அதில் இலண்டன் ரி.பி.சி. வானொலி பணிப்பாளர் வீ.இராமராஜ் அவர்கள் தொடர்பு கொண்டு நடைபயண வீரர்கள் அனைவருக்கும் வாழ்த்துத் தெரிவித்தார். மேலும் நடைபயணத்திற்கு ஆதரவு தெரிவித்து இலண்டனில் புத்திஜீவிகளைக் கொண்டு ஆதரவுக் கூட்டம் நடத்துவதாவும், மதிப்புமிக்க 30பேர் உரையாற்றுகிறார்கள் என்றும் தெரிவித்தார். 13-03-2011 அன்று மாலை 03:00 மணிக்கு ஆதரவுக் கூட்டம் நடக்கிறது என்றும் தெரிவித்தார். நடைபயண வீரர்கள் மிகவும் உற்சாகமடைந்தனர். நடைபயண வீரர்களை ஊக்குவித்த வீ. இராம்ராஜ் அவர்களுக்கு சி.தயாபரன் அவர்கள் நன்றியை தெரிவித்தார்.

54வது நாளான (10-03-2011, வியாழன்) இன்று காலை 06:30 மணியளவில் நடைபயணத்தை தொடர்ந்தனர். காலை 09:00 மணியளவில் “ஜான்சி” மாநகரத்தை அடைந்தனர். அங்கு மக்கள் நல்ல வரவேற்பைக் கொடுத்தனர்.

எஸ்.ஆர். நியூஸ் (S.R.News) என்ற தொலைக்காட்சியும் மற்றும் சில பத்திரிகைகளும் வந்திருந்து நடைபயண வீரர்களுடன் சந்திப்பு ஒன்றை நடத்தினர். ஏற்கனவே, “சகாரா” என்ற தொலைக்காட்சி நடைபயண வீரர்களின் பயணத்தைப் பற்றியும், அவர்களின் நோக்கங்கள் பற்றியும், இலங்கையில் ஈழத் தமிழர்கள் பட்ட துண்பங்கள் பற்றியும் படத்துடன் விவரித்ததாக அங்கு வந்த பொதுமக்கள் தெரிவித்தனர்.

மேலும், ஜான்சி மாநகரத்திலும் இந்திய இராணுவத்தினர் சீருடையில் அதிகமாக நடமாடுவதைக் காணமுடிந்தது. அங்குதான் இந்திய இராணுவத்தின் “டாங்கர்” பிரிவின் தலைமையகம் இருப்பதாக தெரிவித்தார்கள்.

இராணுவத்தினர் அனைவரும் நடைபயணவீரர்களிடம் இந்தியிலான பிரசுரங்களை வாங்கி படித்துவிட்டு, நடைபயணம் வெற்றிபெற வாழ்த்துக்கள் தெரிவித்தனர். இந்திய அரசின் மீது நம்பிக்கை வைத்து இவ்வளவு காலம் காத்திருந்ததற்காக தாங்கள் பெருமைப்படுவதாகவும் தெரிவித்தனர். உங்கள் நம்பிக்கை வீண்போகாது, இந்தியா  நிச்சயம் ஈழத்தமிழர்களுக்கான பாதுகாப்பையும், உரிமைகளையும், பெற்றுக்கொடுக்கும் என்று தெரிவித்து, நடைபயண வீரர்களுக்கும் ஈழ தேசிய ஜனநாயக விடுதலை முன்னணியினருக்கும் நன்றியை தெரிவித்து விடைகொடுத்தனர்.

54வது நாளான இன்று நடைபயண வீரர்கள் “ஜான்சி” மாநகரத்தைக் கடந்து 20வது கிலோ மீற்றர் தூரத்தில் தேசிய நெடுஞ்சாலயில் முகாம் அமைத்தனர். இன்று நடைபயண வீரர்கள் 30 கிலோ மீற்றர் தூரத்தைக் கடந்தனர். இன்னும் நடைபயண வீரர்கள் கடக்க வேண்டிய தூரம் 364 கிலோ மீற்றர் தூரம் மட்டுமே!

இதேவேளை, ரி.ஆர்.ரி. வானொலியில் ஈழ தேசிய ஜனநாயக விடுதலை முன்னணியின் தலைவர் ஞா.ஞானசேகரன் அவர்கள் அளித்த செவ்வி இன்று இரவிற்குள் www.liberationmarch.com என்ற நடைபயணத்திற்கான இணையதளத்தில் பார்க்கலாம். அதற்கான வேலைகளில் திரு. சுபேசன் அவர்கள் ஈடுபட்டுக்கொண்டிருக்கிறார்கள்.

நன்றி!

இவ்வண்ணம்,

ஞா.ஞானராஜா

நடைபயண தலைமைக்குழு

10-03-2011