ஈழத் தமிழர் விடுதலைக்கான நெடுந்தூர நடையணத்தின் 65வது நாளான (21-03-2011, திங்கள்) நேற்று காலை 06:00 மணியளவில் புறப்பட்ட நெடும்பயணம் டெல்லி நோக்கி பயணித்தது.

எமது நடைபயண வீரர்களின் வெற்றியான நடைபயணத்தினால் அதிர்ந்து போன இலங்கை அரசாங்கம் இந்தியாவிற்கு விடுதலைப் புலிகளுக்கு ஆதரவான ஒரு கூட்டம் டெல்லி நோக்கி பயணம் மேற்கொண்டு வருகிறது, அதை அனுமதிக்க வேண்டாம் என்று உத்தியோகபூர்வமாக இந்திய அரசுக்கு அறிவித்திருந்தது.

ஆனால், ஈழ தேசிய ஜனநாயக விடுதலை முன்னணியை (ஈ.என்.டி.எல்.எப்.) இந்தியாவில் அனைவரும் அறிவர். ஈழ தேசிய ஜனநாயக விடுதலை முன்னணி கடந்த 22 வருடங்களாக ஈழத் தமிழர் விடுதலைக்காக இந்தியாவின் உதவியை எதிர்பார்த்துக் காத்திருக்கும் அமைப்பு என்பது இந்தியாவில் அனைவரும் அறிவர். டெல்லி காவல்துறையினர் இது நகைப்புக்குரிய விடயம் என்றும் தெரிவித்தனர்.

ஆதலால், எமது நடைபயண வீரர்களுக்கு இலங்கை அரசாங்கத்தால் ஆபத்து ஏற்படுமோ என்று நினைத்து டெல்லி காவல்துறையினர் 65வது நாள் புறப்பட்ட இடத்திலிருந்து முன்னும் பின்னும் வாகனத்திலும் மற்றும் மோட்டார் சைக்கிளிலும் நடைபயண வீரர்களுக்கு பாதுகாப்புக் கொடுத்து வந்தனர்.

இரண்டாவது முறையாக விபத்து ஏற்பட்டதால் ஒரு அவசர மருத்துவ ஊர்தியுடன் டெல்லி காவல்துறையினர் நடைபயண வீரர்களுக்குப் பாதுகாப்பு கொடுத்தனர்.

இதேவேளை நடைபயண வீரர்களை ஊக்குவிக்க, இலண்டனில் நடைபயணத்தை ஆதரித்துக் கூட்டம் நடத்தியவரும் மற்றும் ரி.பி.சி. வானொலியின் பணிப்பாளருமான திரு. வீ. இராம்ராஜ் அவர்களும், ஈழத் தமிழர் விடுதலைக்காக அயராது உழைத்துக் கொண்டிருக்கும் பிரான்சு நாட்டில் புலம்பெயர்ந்து வாழும் திருமதி. ஜென்னி அவர்களும் மற்றும் திரு. கண்ணன் அவர்களும் வந்து நடைபயண வீரர்களுடன் இணைந்து, அவர்களோடு நடந்து நடைபயண வீரர்களை ஊக்குவித்தனர்.

இந்த உற்சாகத்தில் நடைபயண வீரர்கள் நேற்று 42 கிலோ மீற்றர் தூரத்தைக் கடந்து, பரிதாபாத் நகரைக் கடந்து 5வது கிலோ மீற்றர் தூரத்தில் 'கோபால் கார்டன்" என்ற மண்டபத்தில் இரவு முகாம் அமைத்தனர். நடைபயண வீரர்களின் கோரிக்கைகளை தெரிந்தவுடன் 'கோபால் கார்டன்" நிர்வாகிகள் நடைபயண வீரர்கள் தங்குவதற்கு உடனே அனுமதி கொடுத்தார்கள். அவர்களுக்கு ஈழத் தமிழர் சார்பாக நன்றியை தெரிவித்துக்கொள்கிறோம்.

ஈழத் தமிழர் விடுதலைக்கான நெடுந்தூர நடைபயணத்தின் 66வது நாளான (22-03-2011,செவ்வாய்) இன்று காலை 06:00 மணியளவில் தேசிய நெடுஞ்சாலை - 2 இல் இருந்து புறப்பட்டனர். வழி நெடுகிலும் பொதுமக்கள் 'கோலி" பண்டிகை என்பதால் நடைபயண வீரர்களுக்கு கலர் தன்னீர் ஊற்றி, வாழ்த்துக் கூறி நடைபயணம் வெற்றிபெற வாழ்த்துக் கூறினர். நடைபயண வீரர்கள் கொடுத்த பிரசுரத்தைப் படித்து பெண்களுக்கு நடந்த கொடுமைகளைப் பார்த்து கடவுள் ராஜபக்சே என்ற நரகாசுரனை அழிப்பார் என்று நடைபயண வீரர்களுக்கு ஆறுதல் கூறினர்.

அரியானா மாநிலத்தைச் சேர்ந்த பொதுமக்கள் இந்த விடயத்தை 20 வருடங்களுக்கு முன்னால் நீங்கள் எங்களுக்கு தெரிவித்துவிருக்க வேண்டும். காலதாமதம் என்றாலும் நாங்கள் பெண்களுக்கு நடந்த கொடுமைகளுக்கு ஆதரவு கொடுப்போம் என்று அரியானா மாநில பெண்கள் தெரிவித்தனர். நடைபயணத்தின் 66வது நாளான இன்று நடைபயண வீரர்கள் 20 கிலோ மீற்றர் தூரம் நடந்து டெல்கி மாநகரை சென்றடைந்தனர்.

அனைத்து அரசியல் தலைவர்களின் சந்திப்பு 23-0302011, புதன் கிழமை என்பதால் நடைபயண வீரர்களுக்கு இன்று மதியம் முதல் ஓய்வு கொடுக்கப்பட்டது.

நடைபயண வீரர்கள் இந்திய அரசியல் தலைவர்களை சந்தித்துவிட்டு மீண்டும் சென்னை திரும்புவதற்காக, டெல்லியில் புலம்பெயர்ந்து வாழும் ஈழத் தமிழர் நெடுந்தீவைச் சேர்ந்த உயர்திரு. மெத்தோடீயஸ் குமாரசுவாமி அவர்களின் குடும்பத்தினர் இரயில்வே டிக்கேட் எடுத்துக் கொடுத்து ஈழத் தமிழர் விடுதலைக்காக எந்த உதவியையும் செய்வோம் என்று தெரிவித்து வாழ்த்துக் கூறினர்.

நடைபயண வீரர்கள் நாளை 23-03-2011, புதன்கிழமை இந்திய அரசியல் தலைவர்களைச் சந்தித்துவிட்டு, மாலை மற்றும் அடுத்தநாள் சென்னை திரும்புவார்கள் என்று தெரிவித்துகொள்கிறோம்.

நன்றி!

இவ்வண்ணம்,

திரு. மங்களராஜா

நடைபயண தலைமைக்குழு

22-03-2011