ஈழத் தமிழர் விடுதலைக்கான நெடுந்தூர நடைபயணம் 67,68வது நாள் நிகழ்வுகள்!

(நடைபயணத்தின் முடிவில் ஈழ தேசிய ஜனநாயக விடுதலை முன்னணியின் தலைவர் ஞா.ஞானசேகரன் அவர்கள் 67வது மற்றும் 68வது நாள் நிகழ்வுகள் பற்றி இலடண்டன் ரி.பி.சி. வானொலிக்கு வழங்கிய நேரடி செவ்வியின் விவரம்)

ஈழத் தமிழர் விடுதலைக்கான நெடுந்தூர நடைபயணத்தின் 66வதுநாள் நடைபயண வீரர்கள் டெல்லி மாநகரை அடைந்து, “ராஜ்கோட்” என்று அழைக்கப்படும் இடத்தில் உள்ள அமரர் இராஜீவ்காந்தி நினைவிடத்தில் முகாம் அமைத்திருந்தனர். நடைபயணத்தின் 67வது நாளான (23-03-2011, புதன்) நேற்று நடைபயண வீரர்கள் “ராஜ்கோட்” முகாமில் இருந்து மகாத்மா நினைவிடத்திற்குப் புறப்பட்டனர்.

ஈழத் தமிழர் விடுதலைக்கான நெடுந்தூர நடைபயணத்தினை சென்னை, சிறிபெரும்புதூரிலிருந்து ஆரம்பித்து வைத்த அகில இந்திய காங்கிரஸ் கட்சியின் மூத்த தலைவரும், முன்னாள் காங்கிரஸ் எம்.பி.யுமான இரா. அன்பரசு அவர்கள் டெல்லியில் உள்ள அமரர் இராஜீவ்காந்தியின் நினைவிடத்தில் நடைபயணத்தை முடித்து வைப்பதற்காக சென்னையிலிருந்து வந்து, நடைபயண வீரர்களை வரவேற்று, நடைபயணத்தை வெற்றிகரமாக முடித்தற்காக நடைபயண வீரர்களுக்குக் கைகொடுத்து வாழ்த்துத் தெரிவித்தார்.

மேலும்  அவருடன் நடைபயண வீரர்கள் பயணத்தைத் தொடர்ந்து, முதலில், அகிம்சை வழிப் போராட்டத்தின் தலைவரும் இந்திய நாட்டின் பிதாவுமான அமரர். காந்திஜி அவர்களின் சமாதியில் மலர் வலையம் வைத்து அஞ்சலி செலுத்தினர்.

பின்னர் முன்னாள் பாரதப் பிரதமர். இந்திராகாந்தி அம்மையாரின் நினைவிடத்திற்குச் சென்று அவரது சமாதியில் மலர் வலையம் வைத்து, மலர்கள் தூவி அஞ்சலி செலுத்தினர். அதைத் தொடர்ந்து இரா. அன்பரசு அவர்களின் தலைமையிலேயே நடந்து அமரர். இராஜீவ்காந்தி அவர்களின் நினைவிடத்திற்குச் சென்று அவரது சமாதியிலும் இரா. அன்பரசு அவர்கள் மலர் வலையம் வைக்க, நடைபயண வீரர்கள் மலர்கள் தூவி அஞ்சலி செலுத்தினர்.

இந்தியத் தலைவர்களின் சந்திப்பிற்கான நேரம் 24ம் திகதிக்கு மாற்றப்பட்டதால், நடைபயண வீரர்கள் ராஜ்கோட் முகாமிலேயே தங்கினர்.

ஈழத் தமிழர் விடுதலைக்கான நெடுந்தூர நடைபயணத்தின் 68வது நாளான (24-03-2011, வியாழன்) இன்று நடைபயண வீரர்கள் ராஜ்கோட் முகாமிலிருந்து புறப்பட்டு, சுலோகங்களுடான வாகன அனிவகுப்புடன் மற்றும் ஆதரவாளர்களுடன் டெல்லி மாநகரினுள் 12 கிலோ மீற்றர் தூரம் நடந்து கனோட்பிளாஸ் வழியாக இந்தியா கேட்டை அடைந்தனர்.

இந்தியத் தலைவர்களிடம் நடைபயண வீரர்கள் கையளிக்க வேண்டிய மகஜரை இந்தியா கேட்டிலிருந்து நடைபயண வீரர்கள் பாராளுமன்ற வாசல்வரை சென்று நடைபயண குழுத் தலைவர் திரு. மங்களராஜா அவர்களிடம் கையளித்தனர். அங்கிருந்து திரு. மங்களராஜா அவர்களின் தலைமையில் ஈழ தேசிய ஜனநாயக விடுதலை முன்னணியின் முக்கிய தலைவர்கள் அடங்கிய குழு எமது மகஜரை இந்தியத் தலைவர்களின் அலுவலகத்தில் கையளித்தது.

பிரதமர். மன்மோகன்சிங்

இந்திய ஜனாதிபதி திருமதி பிரதீபா பாட்டீல்

அகில இந்திய காங்கிரஸ் கட்சியின் தலைவர். திருமதி சோனியாகாந்தி,

பிரதான எதிர்கட்சித் தலைவர், திருமதி சுஸ்மாசிவராஜ்,

பாரதீய ஜனதா கட்சியின் தலைவர். திரு.நிதின் கட்காரி

பாரதீய ஜனதா கட்சியின் மூத்த தலைவர். திரு.எல்,கே. அத்வானி

அகில இந்திய காங்கிரஸ் கட்சியின் பொதுச் செயலாளர்  ராகுல்காந்தி.

ஆகியவர்களின் அலுவலகங்களில் எமது குழு மகஜரை கையளித்தது. மீண்டும் நடைபயண வீரர்கள் ராஜகோட் முகாமிற்கு திரும்பினர்.

ராஜ்கோட் முகாமில் தங்கிய இருநாட்களிலும் நடைபயண வீரர்கள் டெல்லி மக்களுக்கும் மற்றும் சுற்றுலா பயணிகளுக்கும் ஏறக்குறைய 3 லட்சம் பிரசுரங்களை வினியோகித்து ஈழத் தமிழர்களுக்கு சிங்கள இராணுவத்தால் ஏற்பட்ட கொடுமைகளையும், அவர்களின் இன்றைய நிலைமைகளையும் எடுத்துக்கூறினார்கள்.

25-03-2011, வெள்ளிக்கிழமை டெல்லியில் நடக்கும் விழாவில் நடைபயணத்தில் கலந்துகொண்டவர்களுக்கு வாழ்த்துக்கள் மற்றும் பரிசுகள் வழங்குவதற்காக ஈழ தேசிய ஜனநாயக விடுதலை முன்னணியின் தலைவர் ஞா.ஞானசேகரன் அவர்களும் மற்றும் நடைபயண விசேட ஊக்குவிப்பாளர் திரு. கஜன் (கனடா) அவர்களும் கலந்து கலந்துகொள்ள உள்ளனர்.

26-03-2011 சனிக்கிழமை நடைபயண வீரர்கள் சென்னை திரும்புவார்கள்.

நன்றி!

இவ்வண்ணம்,

ஜெ. ஜென்னி (பிரான்ஸ்)

ஈழ தேசிய ஜனநாயக விடுதலை முன்னணி

(ஈ.என்.டி.எல்.எப்.)

25-03-2011