தமிழர் பிரச்சினைக்குத் தீர்வு, தடுக்கும் வகையில் பேரினவாதிகள் - சித்தார்த்தன்

தமிழ் மக்களின் பிரச்சினைக்கு தீர்வு கிடைப்பதைத் தடுப்பதற்காகவே பேரினவாதிகள், தமிழ்த் தேசியக் கூட்டமைப்பின் வெளிநாட்டு விஜயத்திற்கு இனவாத சாயம் பூசுகின்றனர். இன்றைய ஜனாதிபதி மஹிந்த ராஜபக்ஸவும் கடந்த காலங்களில் வெளிநாடுகளுக்குச் சென்று முறைப்பாடு செய்துள்ளமை வரலாறாகும் என்று புளொட் அமைப்பின் தலைவர் தர்மலிங்கம் சித்தார்த்தன் தெரிவித்துள்ளார்.

இது தொடர்பில் அவர் மேலும் தெரிவிக்கையில், "வெளிநாடு சென்றுள்ள தமிழ்த் தேசியக் கூட்டமைப்பினர் எந்தவொரு இடத்திலும் தனித் தமிழீழம் தொடர்பாக கருத்துக்களை வெளியிட்டதில்லை. தமிழ் அரசியல் தலைவர்கள் வெளிநாட்டுக்குச் செல்வது இது முதற் தடவையல்ல. கடந்த காலங்களில் தமிழர் பிரச்சினைகளுக்குத் தீர்வு கிடைக்காதபோது பல தமிழ்த் தலைவர்கள் வெளிநாடுகளுக்குச் சென்று இது தொடர்பில் பலதரப்பட்ட பேச்சுவார்த்தைகளை முன்னெடுத்துள்ளனர்.

அது மட்டுமல்ல. இன்றைய ஜனாதிபதி கடந்தகால ஆட்சியாளர்கள் மனித உரிமைகளை மீறுவதாக ஐ.நா வில் முறையிட்டுள்ளார். தமிழ் அரசியல் தலைவர்கள் மட்டுமல்ல பல்வேறு கால கட்டங்களில் சிங்களத் தலைவர்களும் ஆட்சியாளர்களுக்கு எதிராக வெளிநாடுகளுக்குச் சென்று முறைப்பாடுகளைச் செய்துள்ளனர். பிரச்சினைகளுக்கு அரசாங்கம் தீர்வை வழங்காததன் காரணமாகவே தலைவர்கள் வெளிநாடுகளுக்குச் சென்றுள்ளனர்.

தீர்வுகள் கிடைக்குமானால் வெளிநாடு சென்று முறையிடும் தேவை ஏற்படாது. ஆனால் பேரினவாதிகள் இனவாதத்தைத் தூண்டுகின்றனர். தமிழர் பிரச்சினைகளுக்குத் தீர்வு கிடைப்பதனைத் தடுக்கின்றனர். இதனை இவர்கள் கைவிட வேண்டும். தமிழர் பிரச்சினைக்குத் தீர்வு வழங்குமாறு இவர்கள் அரசாங்கத்தை வலியுறுத்த வேண்டும்" எனக் குறிப்பிட்டுள்ளார்.

கனடாவில் நடைபெற்ற தமிழ் தேசியக கூட்டமைப்பின் கூட்டத்தில் பேசிய மூவரும் சற்று அவதானமாக பேசினாலும், மாவை சேனாதிராஜ தமிழ் இளைஞர் பேரவைக் காலத்தில் கையை கிழித்து இரத்தத் திலகம் இட்ட காலத்து பேச்சுகளைப் நிறையவே பேசினார் என்பதே உண்மை நிலை. இலங்கையில் உள்ள பேரினவாத சக்திகளுக்கு எந்த வகையிலும் சளைக்காமல் சம்மந்தர் பேசாவிட்டாலும் மாவை பேசினார் என்பதே அக் சூட்டத்தில் கலந்து கொண்டவர்கள் கேட்டறிந்த உண்மைகள். கூடவே உள்ளுரில் கிளிநொச்சி சிறீதரனும், அரியநேந்திரனும் பேசும் பேச்சுக்கள் பழம் பழுத்தால் வவ்வால் தானாக வரும் என்பது போல் இன்று வரை இருப்பது தமிழ் மக்களை மீண்டும் பிழையான திசை வழியல் கொண்டு செல்ல உதவும் உசுப்பேத்தும் பேச்சுக்கள். தமிழ் பேசும் மக்களுக்கு அரசியல் பிரச்னை இருக்கின்றது. இதனைத் தீர்ப்பதற்கான பலம் பாராளுமன்றத்திலும், பாராளுமன்றத்திற்கு வெளியிலும், மகிந்தாவிற்கு தனிப்பட்ட முறையிலும் இருந்தும் பௌத்த சிங்கள் பேரினவாத இரும்புத் திரையூடாக தமிழர் பிரச்னையை தொடர்ந்தும் பார்ப்பதினால் எவ்வளவு குறைவாக, எவ்வளவு காலம் தாழ்த்தி 'அரசியல் தீர்வு' வை ஏற்கடுத்தலாம் என்ற முனைப்பாடு இன்றைய இலங்கை அரசுக்கும் இருக்கின்றது என்பதை மறுப்பதற்pல்லை. சித்தார்தன் போன்றவர்கள் ஒரு பரந்துபட்ட ஜனநாயக முற்போக்கு முன்னணியை தமிழ் தேசியக் கூட்டமைப்பிற்கு பதிலாக கட்டியமைப்பதில் அதிக உழைப்பை செலுத்துவார்கள் ஆயின் அவரின் தந்தையர் செய்த தவறுகளை திருத்திக்கொள்ள வாய்ப்புகள் நிறையவே ஏற்படும். மாறாக குறும் தேசியவாதத்திற்குள் மூழ்கினால் சிறிது காலம் நாற்காலிக் களம் கண்டு சுகம் காணலாம். ஆனால் தமிழ் பேசும் மக்களின் சமாதான சக வாழ்வு உறுதிப்படுத்தப்ப மாட்டாது என்பதை அவரின் அரசியல் அனுபவம் அவருக்கு உணரர்த்தும் என நம்புகின்றோம் -சாகரன்