பல தலைமுறை தலைவர்களுடன் அரசியல் பயணம் மேற்கொண்டவர் தோழர் சிவதாசன் -  பத்மநாபா ஈ.பி.ஆர்.எல்.எவ்.

அங்கிள் என எங்கள் எல்லோராலும் அன்போடும், மரியாதையோடும் அழைக்கப்பட்ட தோழர் சிவதாசன் தனது 77 வது வயதில் காலமாகிவிட்ட துயரச்சம்பவம் நேற்று (13.11.2011) நிகழ்ந்திருக்கிறது. இலங்கை கம்யூனிஸ இயக்க வரலாற்றில் தனக்கொன ஒரு தனியிடத்தை வகித்தவரும், தொழிற்சங்க போராட்டங்களில் முனநின்றவரும் வடபகுதியில் தொழிலாளர்கள், ஒடுக்கப்பட்ட மக்களின் போராட்டங்களில் பங்கேற்றவரும் வர்க்க விடுதலை மூலமே இலங்கையில் ஏற்றத் தாழ்வற்ற சமுதாயத்தை படைக்க முடியும், தமிழ் மக்கள் விடிவை எய்த முடியும் என்று கருதி செயற்பட்ட தோழர் சிவதாசன் தமிழ் மக்களின் தேசிய விடுதலைப் போராட்டம் முனைப்புப் பெற்று ஆயுதந் தாங்கிய போராட்டமாக மாறியபோது அதிலும் பங்கேற்ற ஒருவர். பாராளுமன்ற உறுப்பினராகவும், பனை அபிவிருத்தி சபை தலைவராகவும் பதவிவகித்தவர். அவர் இறக்கும் வரை தனது அரசியல் பயணத்தை இடைவிடாது தொடர்ந்தவர்.

தமிழ், ஆங்கிலம், சிங்களம் ஆகிய மூன்று மொழிகளிலும் தேர்ச்சி பெற்ற தோழர் சிவதாசன் சிங்களத் தலைவர்களுக்கும் தமிழ் மக்களுக்கிடையேயும், தமிழ் தலைவர்கள் சிங்கள மக்களிற்கிடையேயும்  ஒரு பாலமாக விளங்கினார். பீற்றர் கெனமன், எஸ்.ஏ விக்கிரமசிங்கா போன்ற தென்னிலங்கை கம்யூனிஸ்ட் தலைவர்களோடும், சிறந்த மாக்ஸிஸ்ட் என போற்றப்பட்டவரும் வட பிரதேசத்தில் அடக்கி ஒடுக்கப்பட்ட மக்களின் பல்வேறு போராட்டங்களுக்கு உந்து சக்தியாய் இருந்தவருமான சண்முகதாசன் தலைமையிலான கம்யூனிஸ்ட் கட்சியிலும், இளம் தமிழ் தலைவர்களான பத்மநாபா, டக்ளஸ் தேவானந்தா போன்ற பல்வேறு தலைமுறைகளை சேர்ந்த தமிழ் சிங்கள தலைவர்களுடனும் அரசியல் நடவடிக்கைகளில் ஈடுபட்டு பரந்த தளத்தில் செயற்பட்டவர். அவர், அமரர் தோழர் பத்மநாபா தலைமையிலான ஈழமக்கள் புரட்சிகர விடுதலை முன்னணியில், (ஈ.பி.ஆர்.எல்.எவ்) ஆயுதப் போராட்டத்தை முன்னெடுத்த காலகட்டத்திலும், பின்னர் 1987 இல் இந்திய இலங்கை உடன்படிக்கையை தொடர்ந்து உருவாக்கப்பட்ட வடக்கு கிழக்கு மாகாணசபையை நிறுவி பாதுகாப்பதிலும் தோளோடு தோள் நின்றவர். புலிகளின் ஜனநாயக மறுப்புக்கு எதிராகவும் துணிச்சலாக செயற்பட்டவர்.

1994 இல் ஈழமக்கள் ஜனநாயக கட்சி சார்பில் போட்டியிட்டு (ஈ.பி.டி.பி) முதல் தடவையாக பாராளுமன்ற உறுப்பினராக தெரிவு செய்யப்பட்டார். அன்றிலிருந்து அவர் ஈழமக்கள் ஜனநாயக கட்சியின் அத்தனை அரசியல் நடவடிக்கைகளிலும் காத்திரமான பங்களிப்பை நல்கி வந்துள்ளார்.

நோர்வே அரசின் அனுசரணையுடன் 2002 க்கு பின்னர் ஏற்படுத்தப்பட்ட சமாதான காலத்தில் 2006 இல் புலிகள் அவர் பயணம் செய்த வாகனத்தின் மீது நடாத்திய தாக்குதலில் காயங்களுடன் உயிர் பிழைத்திருந்தார்.

அவரோடு பழகவும், அவரோடு அரசியல் பணிகளில் ஈடுபடவும் அவரது அனுபவங்களை பகிர்ந்து கொள்ளவும் எமக்கு கிடைத்த சந்தர்ப்பம் பெறுமதி மிக்கதாகும். அவரது அனுபவங்களையும், ஆற்றல்களையும் எம்மிடமிருந்து பறித்துக்கொண்ட அவரது இழப்பு பேரிழப்பாகும். அவரது இழப்பால் துயரடைந்திருக்கும் அனைவரதும் துயரில் நாமும் பங்கு கொள்கிறோம். அவரது பணிகளுக்காக அவரை மரியாதைசெய்து எமது உளப்பூர்வமான அஞ்சலிகளையும் உரித்தாக்குகின்றோம்.