தமிழ் கட்சிகளின் அரங்கம் இன்று (03.10.2010) கிளிநொச்சியில் தமிழர் விடுதலைக் கூட்டணி காரியாலயத்தில் திரு.வீ.ஆனந்தசங்கரி அவர்களின் தலைமையில் நடைபெற்றது.

இக் கூட்டத்தில் அரசியல் தீர்வு பற்றிய விடயம் தனியாக விவாதிக்கப்பட வேண்டும். மக்களினதும், தமிழ் பிரதேசங்கள் தொடர்பிலானதுமான உடனடி பிரச்சினைகளுக்கு கூடுதல் முக்கியத்துவம் கொடுக்கப்பட வேண்டும் குறிப்பாக மீளக்குடியமரும் மக்கள் எதிர்நோக்கும் பிரச்சினைகள் குறித்து ஆராய்ந்து நடவடிக்கை மேற்கொள்ள வேண்டும் என பங்கு கொண்ட கட்சிப்பிரதிநிதிகள் கருத்துத் தெரிவித்ததைத் தொடர்ந்து உடனடி பிர்ச்சினைகள் தொடர்பாக ஆராயப்பட்டு முடிவுகளும் எடுக்கப்பட்டது.

கிளிநொச்சி மாவட்டத்தில் நிலங்கள் சட்ட ரீதியான நடைமுறைகளுக்கு அமைவாக கையாளப்படாமல் தலையீடுகளும், முறைகேடுகளும் இடம்பெறுவதாக கட்சிகளின் பிரதிநிதிகள் தெரிவித்த குற்றச்சாட்டுக்களை தொடர்ந்து இவை தொடர்பான தகவல்களைத் திரட்டி அவற்றை தொகுத்தெடுத்து இப்பிரச்சினைகள் குறித்து ஜனாதிபதியின் கவனத்திற்கு கொண்டுவந்து அவற்றை தடுப்பதற்கான நடவடிக்கைகளை மேற்கொள்ளல் வேண்டும். என தீர்மானிக்கப்பட்டது.

பருவமழை ஆரம்பமாகியுள்ளதால் மீளக் குடியமரும் மக்களின் இருப்பிடங்களை அமைத்துக் கொடுப்பதற்கும் அவர்களது அடிப்படை தேவைகள் மற்றும் பிரச்சினைகளுக்கு தீர்வுகாண்பதற்கும் துரித நடவடிக்கை அவசியம் என்பதை அரசுக்கு எடுத்துரைப்பதாகவும் முடிவுசெய்யப்பட்டது.

புலிகள் இயக்க உறுப்பினர்களுக்கு புனர்வாழ்வளிக்க முன்வந்திருக்கும் அரசாங்கம் யுத்தத்தாலும், புலிகளாலும் பாதிக்கப்பட்ட இதர இயக்கங்கள், கட்சிகளின் அங்கத்தவர்களும் இயல்பு வாழ்க்கைக்கு திரும்புவற்கான திட்டங்கள் குறித்தும் அக்கறை செலுத்த வேண்டும் என அரசாங்கத்தை கோருதல் வேண்டும். 

யுத்தத்தின் விளைவாக பிறப்பு, இறப்பு மற்றம் அத்தியாவசிய சான்றிதழ்கள் ஆவணங்களை பெறமுடியாதிருக்கம் அல்லது இழந்திருக்கம் பொருந்தொகையான மக்களின் பிரச்சினைகளுக்கு தீர்வு காணும் வகையில் அவற்றை இலகுவாக பெற்றுக்கொள்வதற்கான வழிவகையை அரசாங்கம் செய்து கொடுக்க வேண்டும்.

இதுவரை பொதுமக்களுக்கான வீடமைப்புத் திட்டங்களில் சொந்த காணி உள்ளவர்களுக்கே வீடு கட்டுவதற்கான உதவிகள் வழங்கப்பட்ட வருகின்றது. சொந்த காணி இல்லாத பொருளாதார ரீதியாக பின்தங்கிய நிலையில் உள்ள மக்களும் வீடமைப்பு திட்டங்களால் பயன் பெறக் கூடிய வகையிலான திட்டங்கள் நடைமுறைக்கு கொண்டுவரப்பட வேண்டும். இந்திய அரசாங்கம் வடக்கு கிழக்கில் கட்டிக்கொடுக்க திட்டமிட்டுள்ள 50 ஆயிரம் வீடுகள் கணியற்றவர்களுக்கும் கிடைக்கும் விதமாக காணியற்றவர்களுக்கு அரசகாணிகளை வழங்கி அல்லது பொருத்தமான மாற்று நடவடிக்கையினை மேற்கொள்ளல் வேண்டும் எனவும் தீர்மானங்கள் மேற்கொள்ளப்பட்டன.

இக்கூட்டத்தில் தமிழர் விடுதலைக்கூட்டணி தலைவர் வீ. ஆனந்தசங்கரி, பத்மநாபா ஈபிஆர்எல்எவ் சார்பில் வடக்கு கிழக்கு மாகாண முன்னாள் முதலமைச்சர் அ.வரதராஜப்பெருமாள், யாழ் பிராந்திய செயலாயர் க. சிவராஜா (மோகன்,) ஈபிடிபி செயலாளர் நாயகம் அமைச்சர் டக்ளஸ் தேவனந்தா, பாராளுமன்ற உறுப்பினர் மு.சந்திரகுமார் (அசோக்) புளொட் அமைப்பின் முக்கியஸ்தர்களான ஆர். ராகவன், சேனாதி தமிழ் மக்கள் விடுதலைப் புலிகள் கட்சியின் முக்கியஸ்தரும் கிழக்கு மாகாணசபை உறுப்பினருமான பிரசாந்தன் தமிழ் தேசிய விடுதலை கூட்டமைப்பின் தலைவர் எம்.கே.சிவாஜிலிங்கம், அக்கட்சியின் துணைச் செயலாளர் சித்திரா நித்தியானந்தன், ஸ்ரீரெலோ அமைப்பின் செயலாளர் ப.உதயராஜா, சுரேந்திரன், ஈழ எதிலியர் புனர்வாழ்வுக் கழகத்தின் முக்கியஸ்தர் சட்டத்தரணி பேரின்பநாயகம், மனித உரிமைகள் இல்லத்தை சேர்ந்த செரின் சேவியர், மேகலா சண்முகம் ஆகியோர் கலந்துகொண்டனர்.

 தமிழ் கட்சிகள் அரங்கத்தின் அடுத்த கூட்டம் எதிர்வரும் அக்டோபர் முதல் வாரத்தில் கொழும்பில் ஈபிடிபி அலுவலகத்தில் நடைபெறும் என முடிவுசெய்யப்பட்டுள்ளது.