Forum for Srilankan Diaspora – Switzerland  FSDS

கண்ணீர் அஞ்சலி

 “அமரகத்து வன்கண்ணர் போலத் தமரகத்தும்
ஆற்றுவார் மேற்றே பொறை’’ - குறள் 1027

1990 களில் எம்மவர்களாலேயே எம்மவர்கள்மீது விடுதலை, தமிழ்தேசியம் என்ற பெயரில் மேற்கொள்ளப்பட்ட ஜனநாயக மறுப்பு, மனிதஉரிமை மீறல்கள், கருத்துச்சுதந்திர மறுப்பு, ஊடகங்கள் மீதான தடை, மாற்று அமைப்புக்கள் மீதான தடைகள், வன்முறைக் கலாச்சாரம் என்பன நிலத்தில் இருந்து புலத்திற்கு இறக்குமதி செய்யப்பட்டிருந்த காலம்.

இந்தக் காலத்தில் வை.சி.கிருபானந்தன் என்ற பெயர் புகலிடத்தில் ஒலிக்கத் தொடங்கியது. அரசியல் அநாகரிகங்களுக்கு எதிராக ஊடகங்களிலும், அரங்குகளிலும், ஆக்கங்களிலும் தன் பங்களிப்பைச் செய்து ஈழத்தமிழர்கள் நாகரீக அரசியலை நடாத்த வேண்டும் என்பதை வலியுறுத்தி வந்தவர் வை.சி.

போருக்குப் பின்னரான சூழலில் நிரந்தர சமாதானத்தையும் பாதிக்கப்பட்ட மக்களின் புனர்வாழ்வையும் முக்கிய விடயங்களாக அடையாளம் கண்டவர்களுள் கிருபானந்தனும் ஒருவர். வெறும் இனவாத, பிரதேசவாத, மதவாத குறுகிய அரசியல்தான் எமது மண்ணைச் சிதைத்தது என்பதால் சகல இனங்களுக்குமிடையிலான உறவு என்பது அவருக்கு முக்கியமானதாக இருந்தது. இனங்களுக்கிடையிலான புரிந்துணர்வு ஒன்றுதான் அரசியல் வியாபாரிகளை அகற்றி நிரந்தர சமாதானத்தைத் தரும் என்று நம்பியவர் தோழர் கிருபா.

அல்லலுறும் மக்களுக்கு புனர்வாழ்வளிக்க அமைப்புரீதியான செயற்பாடுகளின் தேவையை அவர் உணர்ந்திருந்தார். இதனால் புகலிட மக்கள் மத்தியில் இது விடயமாக இடம்பெற்ற கலந்துரையாடல்கள்; சந்திப்புக்களில் பங்குகொண்டு தமது கருத்துக்களை முன்வைக்க அவர் தயங்கவில்லை. அன்னாரின் இந்த உத்வேகம்தான் அவரை சுவிஸ் புலம்பெயர்ந்த இலங்கையர் சம்மேளனத்துடன் இணைந்து செயற்படத் தூண்டியது. எம்மையும் அவரோடு இணைத்தது.

வை.சி. என்று அன்பாக தனது அரசியல் கலை,இலக்கிய நண்பர்களால் அழைக்கப்பட்ட அந்த மனிதம் நிறைந்த மனிதனை நாம் இன்று இழந்து விட்டோம். ஆனாலும் அவரது போராட்ட உணர்வும், அன்னார் எமக்கு ஊட்டிய துணிவும், அவரது பணிகளும் எம் மனக்கண்முன் காட்சி தருகின்றன.

ஜனநாயகம், நிரந்தர சமாதானம், போரினால் சூறையாடப்பட்ட மக்களின் புனர்வாழ்வு இவையே வை.சியின் கனவாக இருந்தன. இவற்றை நனவாக்குவதே நாம் அன்னாருக்குச் செய்யும் அஞ்சலியாகவும், எமது எதிர்காலச் சந்ததியினருக்கு விட்டுச்செல்லும் அவர் கண்ட அறம் தவறா அரசியலாகவும் அமையும்.

வை.சி. கிருபானந்தன் அவர்களின் பிரிவுத்துயரால் வாடும் அவரது மனைவி, பிள்ளைகள்;, குடும்பத்தினர் மற்றும் அவரது அரசியல், கலை, இலக்கிய நண்பர்கள் அனைவருக்கும் எமது ஆழ்ந்த அனுதாபங்களைத் தெரிவித்துக் கொள்கின்றோம்.

Forum for Srilankan Diaspora – Switzerland  FSDS