ஒற்றுமையை உறுதிப்படுத்தி மக்களின் நிரந்தரத் தீர்வுக்கு உழைக்க தயார் - வீ. ஆனந்தசங்கரி

ஒற்றுமையை உறுதிப்படுத்தி எத்தகைய தியாகத்தையும் செய்து மக்களின் நிரந்தரத் தீர்வுக்கு உழைக்கத் தயாராக இருப்பதாக தமிழர் விடுதலைக் கூட்டணியின் தலைவர் வீ. ஆனந்தசங்கரி தெரிவித்துள்ளார்.

தமிழ்த் தேசியக் கூட்டமைப்பினைப் பதிவு செய்வது தொடர்பில் கூட்டணிக் கட்சிகள் இணைந்து தமிழ்த் தேசியக் கூட்டமைப்பின் பாராளுமன்றக் குழுத் தலைவர் இரா. சம்பந்தனுக்கு கடிதமொன்றை அனுப்பியிருந்தனர். இது தொடர்பில் வீ. ஆனந்தசங்கரி அறிக்கையொன்றை விடுத்திருந்தார். இந்த அறிக்கையில் மேலும் குறிப்பிட்டுள்ளதாவது:

தமிழ் மக்கள் சார்பில் சமூக ஆர்வலர்கள், அறிஞர்கள் தமிழ்க் கூட்டமைப்பை நம்பகரமான தலைமைச் சக்தியாக வலுப்படுத்தமாறு விடுக்கப்பட்ட வேண்டுகோள் காலங்கடந்து விடப்படும் வேண்டுகோளாக இருந்தாலும் அவ்வேண்டுகோளை அமுல்படுத்த வேண்டிய கடப்பாடு சகல தமிழ் மக்களுக்கும் உண்டு.

கடந்த பாராளுமன்ற தேர்தலில் தீவிரமாக எடுத்திருக்க வேண்டிய முயற்சி வெற்றியளிக்காமல் போனமைக்கான காரணம் ஒரு சில சக்திகள் குறுகிய மனப்பான்மையோடு செயற்பட்டதே. தேர்தல் முடிந்ததன் பின் எத்தகைய நிலைப்பாட்டை கடைப்பிடிக்க வேண்டும் என்பதை வழிப்படுத்தத் தவறியமையே இன்றைய நிலைக்கு காரணமாகும். தேர்தல் முடிந்தவுடன் சகல கட்சிகளும் ஒன்றிணைய வேண்டும் என்று பகிரங்கமாக வேண்டுகோள் விடுத்தார் கூட்டமைப்புத் தலைவர் இரா. சம்பந்தன்.

என்னைப் பொறுத்தவரை அந்த வேண்டுகோள் நிராகரிக்கப்பட வேண்டுமென்ற நியாயப் படுத்தக் கூடிய போதிய காரணங்கள் இருந்தும் கூட எதுவித நிபந்தனையுமின்றி தொடர்ந்து வந்த உள்ளூராட்சி மன்றத் தேர்தல்களில் 3 தடவை தமிழர் விடுதலைக் கூட்டணியும் திரு.சித்தார்த்தன் தலைமையிலான புளொட்டும் தீவிரமாகப் பிரசாரம் செய்து செயற்பட்டு மக்களின் அபிலாஷைகளை நிறைவேற்ற உழைத்தோம். கூட்டமைப்பின் மானத்தைக் காப்பாற்ற 2 உள்ளூராட்சி மன்றத் தேர்தல்களில் நிராகரிக்கப்படவிருந்த வேட்புமனுக்களைத் தப்பவைத்து அவ்விரு சபைகளிலும் ஆட்சியை அமைத்தோம்.

 தீவிரப் போக்குக் கொண்ட ஒரு சிலரின் செயற்பாடுகள் எம்மை நோகடித்திருந்தும் மக்களுக்காக அத்தனையையும் தாங்கிக்கொண்டு ஒற்றுமையை வலியுறுத்தி வந்துள்ளோம்.

கூட்டமைப்பு கட்சிகளை பயன்படுத்தி பொது வேட்பாளர்களாக போட்டியிட்டு வென்றவர்கள் சிலரை குறிப்பிட்ட ஒரு கட்சி தனது அங்கத்தவராகச் சேர்த்தமை ஏனைய கட்சிகளின் தோளில் ஏறி சவாரி விடுவது போலாகிறது.

பெயரளவில்தான் தமிழ்த் தேசியக் கூட்டமைப்பு இயங்குகிறதே தவிர கடந்த 2 வருடங்களில் எச்சந்தர்ப்பத்திலும் எம்முடன் எதுவித கலந்தாலோச னையையும் நடத்தாமல் செயற்படுகி ன்றனர். ஆனால் பல சந்தர்ப்பங்களில் முற்று முழுதாக ஏற்க முடியாத கருத்துக்கள் வெளியிடப்பட்ட போதெல்லாம் மக்கள் நலன்கருதி மெளனம் சாதித்து ஏனையவர்களுக்குச் சேரவேண்டிய அவப்பெயரை நாம் ஏற்றுப் பங்குகொள்ள வேண்டியிருந்தது.

அவற்றில் சிலவற்றைக் கூறி 1972 இல் இருந்த நிலையிலும் பார்க்க பல மடங்கு மோசமாக தமிழர் நிலை மாறியுள்ள இன்றைய நிலையில் மேலும் எமது மக்களின் இன்னல்கள் அதிகரிக்கும் என்பதால் மிகச் சிரமப்பட்டு மெளனம் காக்கின்றோம். நாட்டின் நிலமையை அறியாத சிலர் சுயநல நோக்கோடு செயற்படும் வேளை நிலமைகளைத் தெளிவாக அறிந்த நாங்கள் ஒற்றுமையை உறுதிப்படுத்த எத்தகைய தியாகத்தையும் செய்து மக்களின் நிரந்தர தீர்வுக்கு உழைக்கத் தயாராக இருக்கின்றோம்.

இவ்வாறு தமிழர் விடுதலைக் கூட்டணியின் செயலாளர் நாயகம் வீ. ஆனந்த சங்கரி விடுத்துள்ள அறிக்கையில் தெரிவித்துள்ளார்.