ஹரியானாவில்,  மஹாராஷ்டிராவில் ஆட்சியமைக்கிற அளவுக்கும் பாஜக வெற்றி பெற்றிருப்பது யாருக்கு சாதகமாக இருக்கும்?

“ஹரியானாவில் தானே ஆட்சியமைக்கிற அளவுக்கும், மஹாராஷ்டிராவில் ஒரு கூட்டாளியோடு சேர்ந்து ஆட்சியமைக்கிற அளவுக்கும் பாஜக வெற்றி பெற்றிருப்பது யாருக்கு சாதகமாக இருக்கும்? யாருக்கு பாதகமாக இருக்கும்?”

'கலைஞர் செய்திகள்' தொலைக்காட்சியின் 'எத்தனை கோணம் எத்தனை பார்வை' நிகழ்ச்சியில் (அக்,19 இரவு) ஒருங்கிணைப்பாளர் ஜெனிஃபர் கேட்ட கேள்வி.

இதற்கும், மற்ற கேள்விகளுக்குமாக நான் கூறிய பதில்களின் சுருக்கம்:

“மக்களுக்கு பாதகமாக இருக்கும். அப்படி ஆகவில்லை என்றால் மகிழ்ச்சிதான், ஆனால் ஆறு மாத மத்திய பாஜக ஆட்சியின் அனுபவங்கள் அந்த மகிழ்ச்சிக்கான நம்பிக்கையைத் தரவில்லை. அடிப்படையில் பாஜக-வின் இந்த வெற்றிக்குக் காரணம், ஹரியானா காங்கிரஸ் அரசும், மஹாராஷ்டிராவின் காங்கிரஸ்-என்சிபி அரசும் மக்களின் கடுமையான அதிருப்திக்கு உள்ளானதுதான். ஹரியானாவில் முன்னாள் முதலமைச்சர், அவரது குடும்பத்தினர், உறவினர்கள் மீது 4 முதல் 5 லட்சம் கோடி ரூபாய் வரையில் மக்கள் பணம் சூறையாடப்பட்டது தொடர்பான புகார்கள் இருக்கின்றன. வேண்டப்பட்ட முதலாளிகள் சிலருக்கு எல்லா வகையான சலுகைகளையும் அளித்ததாகவும் குற்றச்சாட்டுகள் உண்டு. அங்கே முக்கிய எதிர்க்கட்சியான ஐஎன்எல்டி மீதும் அழுத்தமான ஊழல் கறைகள் உண்டு, அதன் தலைவர் சவுதாலா சிறையிலிருந்து உடல் நலத்தைக் காரணம் கூறி ஜாமினில் வெளியே வந்து, தேர்தல் பிரச்சாரத்தில் இறங்கியதற்காக மறுபடியும் நீதிமன்ற உத்தரவுப்படி சிறையில் அடைக்கப்பட்டார்.

மஹாராஷ்டிராவிலும், காங்கிரஸ்-என்சிபி அரசு மீது ஆதர்ஷ் குடியிருப்பு ஊழல் முதல் பல்வேறு வகையான புகார்கள் இருக்கின்றன. அங்கே ஊழல் சாம்ராஜ்யம் நடந்ததாக ஏற்கெனவே செய்திகள் வந்திருக்கின்றன.

இந்தப் பின்னணியில், இவ்விரு மாநிலங்களிலுமே இடதுசாரி இயக்கங்களும் வலுவாக இல்லாத சூழலில், பெரிய கட்சியான பாஜக, இன்றைய பல வாய்ப்புகளின் பலத்தோடு இந்த வெற்றியைப் பெற்றிருக்கிறது.

மோடி அலை அல்லது அவரது செல்வாக்கு பாஜக-வுக்கு பலனளித்திருக்கிறது என்பதை மறுப்பதற்கில்லை. கட்சியின் கொள்கைகளைச் சொல்வதற்கு மாறாக, தனி மனித செல்வாக்கைச் சார்ந்திருப்பது நல்லதுதானா என்பதை அந்தக் கட்சியினர்தான் சிந்திக்க வேண்டும். மோடியே நேரடியாகப் பிரச்சாரம் செய்தார் என்பதோடு, மத்திய அமைச்சர்கள் தொகுதிகளின் பொறுப்பாளர்களாக அனுப்பட்டார்கள்.

உத்தர பிரதேசத்தில் எப்படி மத உணர்வுகளைக் கிளறிவிட்டு அரசியல் செய்தார்களோ, அப்படி ஹரியானாவில் சாதிய உணர்வுகளைப் பயன்படுத்தினார்கள். முசாபர் நகர் மாவட்ட வன்முறைகளைத் தொடர்ந்து உத்தர பிரதேச இளைஞர்கள் மத அடிப்படையில் பிளவுபட்டிருக்கிறார்கள் என்று, அண்மையில் வந்த ஒரு ஆய்வறிக்கை தெரிவிக்கிறது. அது, மக்களின் நல்லிணக்கத்தையும் ஒருமைப்பாட்டையும் விரும்புகிற சக்திகளுக்கு நாட்டின் எதிர்காலம் பற்றிய கலக்கத்தைத் தருகிறது. ஐந்து தலித் இளைஞர்கள், செத்துப்போன ஒரு மாட்டின் தோலை உரித்தார்கள் என்பதற்காக அவர்களை உயிரோடு எரித்த சாதிய வன்மம் நிறைந்த மாநிலம் ஹரியானா. அந்த மாநிலத்தில் சாதி அரசியல் கையாளப்பட்டது என்பது நிச்சயமாகக் கவலைக்குரியது.

மக்களைப் பொறுத்தவரையில் விலைவாசி, வேலைவாய்ப்பு உள்ளிட்ட அடிப்படையான பிரச்சனைகளுக்குத் தீர்வு கிடைக்கும் என்ற எதிர்பார்ப்போடு தேர்தலில் பங்கேற்கிறார்கள். ஆனால், மன்மோகன் சிங் அரசு யாருக்கு சேவை செய்ததோ, அதே கார்ப்பரேட் சக்திகளுக்குத் தொண்டாற்றுகிற வேலையைத்தான் மோடி அரசு செய்கிறது.

வெளிநாட்டு முதலீடுகள் வருகின்றன என்று பெருமையடித்துக்கொள்கிறார்கள். ஆனால், எப்படி வருகின்றன? 15 ஆண்டுகளுக்கு வரி கிடையாது என்ற சலுகையால் வருகின்றன. 16வது ஆண்டில் அந்த நிறுவனங்கள் பெயரை மாற்றிக்கொள்கின்றன, அல்லது வெளியேறி விடுகின்றன. ஒரு நோக்கியா நிறுவனம் இப்படி இழுத்து மூடப்பட்டதைப் பார்க்கிறோமே... ஆயிரக்கணக்கான தொழிலாளர்கள் தெருவில் நிற்கிறார்களே... அதைத் தடுக்க வேண்டிய மத்திய - மாநில அரசுகள் அதை ஊக்குவிப்பது போல் அல்லவா நடந்துகொள்கின்றன?

பொருளாதார சீர்திருத்தங்களை வேகப்படுத்துங்கள் என்று ஐஎம்எப், உலகவங்கி போன்றவை நிர்ப்பந்திக்கின்றன. அதை ஏற்றுக்கொண்டுதான், பெட்ரோல் விலைக்கட்டுப்பாட்டை முன்பு மன்மோகன் சிங் அரசு கைவிட்டது. இப்போது டீசல் விலை கட்டுப்பாட்டை நரேந்திர மோடி அரசு கழற்றிவிட்டது.

வரிச்சலுகையை விட மோசமான இன்னொரு சலுகையும் வெளிநாட்டு நிறுவனங்களுக்குத் தரப்படுகிறது. “மேக் இன் இந்தியா” என்ற அழைப்பின் பின்னணியில், “எங்கள் நாட்டு தொழிலாளர் சட்டங்கள் உங்களைக் கட்டுப்படுத்தாது” என்ற உறுதிமொழி இருக்கிறது. இப்படி சொந்த நாட்டின் தொழிலாளர்களைக் காட்டிக்கொடுத்துதான் அந்நிய முதலீடுகளை ஈர்க்க வேண்டுமா?

இந்த உண்மைகளைத் தெரிந்துகொள்ளும் மக்கள் நாளை நிச்சயமாகக் கொந்தளிப்பார்கள். அப்போது அதை எப்படித் திசை திருப்புவது என்பதிலும் இவர்கள் வல்லுநர்கள். அதையும் மக்களிடம் தொடர்ந்து எடுத்துச் சொல்வோம்...

(விவாதத்தில் உடன் பங்கேற்றவர்கள் பாஜக கட்சியின் ஆதவன், காங்கிரஸ் கட்சியின் பொன் சத்தியமூர்த்தி)

(Kumaresan Asak)