ஈபிடிபி மக்களின் அங்கீகாரம்  பெற்ற ஒரு அரசியல் கட்சி - டக்ளஸ் தேவானந்தா

நாம் தமிழ் பேசும் மக்களின் அங்கீகாரம் பெற்ற பொறுப்பு வாய்ந்த ஒரு அரசியல் கட்சியே தவிர வன்முறை நோய் கொண்டு அலையும் துணை இராணுவக்குழு அல்ல. இந்த உண்மையை அமெரிக்க இராஜாங்க அமைச்சின் உதவி செயலர் றொபேர்ட் ஓ பிளேக் உணர வேண்டும் என ஈழ மக்கள் ஜனநாயகக் கட்சி விடுத்திருக்கும் அறிக்கையில் தெரிவிக்கப்பட்டுள்ளது.

அண்மையில் இலங்கைக்கான உத்தியோகபூர்வ விஜயத்தை மேற்கொண்டிருந்த அமெரிக்க இராஜாங்க அமைச்சின் உதவி செயலர் றொபேர்ட் ஓ பிளேக் வழமை போல் திட்டமிட்ட உள்நோக்கத்தோடு எம்மீதான ஆதாரமற்ற சில குற்றச்சாட்டுகளை முன்வைத்துள்ளார். நாம் துணை இராணுவக்குழு என்றும், ஆயுதங்களோடு நடமாடுவதாகவும் தெரிவித்திருந்த அவர் நாம் வைத்திருப்பதாக அவர் கூறும் ஆயுதங்கள் களையப்பட வேண்டும் என்றும் தெரிவித்திருக்கிறார். இது தவிர யாழ். பல்கலைக்கழக மாணவர்களுக்கும் எமக்கும் இடையில் முரண்பாடுகளை திட்டமிட்டு தோற்றுவிக்கும் வகையில் பல்கலைக்கழக மாணவர்களை தான் சந்திக்கவிருந்ததாக பொய்யுரைத்து, தமது சந்திப்பை நாமே தடுத்து நிறுத்தியிருந்ததாகவும் கருத்து வெளியிட்டுள்ளார். இவைகள் உண்மைக்கு புறம்பானதும் ஆதாரமற்றதும் எம்மீது அவதூறு பரப்புவதுமான ஓர் திட்டமிட்ட உள்நோக்கம் கொண்ட செயலாகும் என்பதை நாம் வலியுறுத்த விரும்புகின்றோம்.

ஆரபங்களில் ஆயுதப் போராட்டத்தின் முன்னோடிகளில் ஒருவராக செயற்பட்டிருந்த அமைச்சர் டக்ளஸ் தேவானந்தா மற்றும் எமது கட்சியின் மூத்த உறுப்பினர்களும் இலங்கை இந்திய ஒப்பந்தத்தை அடுத்து ஜனநாயக வழிமுறைக்கு திரும்பியிருந்தவர்கள், ஆனாலும் இலங்கை இந்திய ஒப்பந்த நடைமுறைகளில் எமது தலைமை பங்கெடுத்திருக்கவில்லை என்பதும், அதன் சாதக பாதகங்களில் எமக்கு சம்பந்தம் இருந்திருக்கவில்லை என்பதும், சகலரும் அறிந்த விடயம். எமது மக்களின் அரசியலுரிமைக்காகவும், அபிவிருத்தி மற்றும் அன்றாட அவலங்களுக்கான தீர்வுக்காகவும் மரண அச்சுறுத்தல்களுக்கு மத்தியிலும் மக்கள் மத்தியில் நின்று உறுதியுடன் நாம் உழைத்து வந்திருக்கின்றோம். எமது சொந்த பாதுகாப்பிற்காக ஏனைய தமிழ் கட்சிகளைப் போலவே நாமும் வைத்திருந்த சிறு ஆயுதங்களையும் 2002 ஆம் ஆண்டு ரணில் விக்கிரமசிங்க அவர்களுக்கும் புலிகளுக்கும் இடையிலான புரிந்துணர்வு ஒப்பந்தத்தை அடுத்து முழுமையாக நாம் ஒப்படைத்திருந்தோம். அதன் பிறகு எமது கட்சியின் நூற்றுக்கணக்கான உறுப்பினர்கள் தெருத்தெருவாக சுட்டுக்கொல்லப்பட்ட வரலாறுகளை யாரும் மறந்திருக்க மாட்டார்கள். எமது கட்சி உறுப்பினர்கள் ஆயுதங்கள் இன்றி நிராயுத பாணியாக நின்றிருந்த காரணத்தனாலேயே தமது இன்னுயிர்களை இழக்க வேண்டிய துயரங்கள் இங்கு நிகழ்ந்தன என்பதை சகலரும் ஏற்றுக்கொள்வார்கள்.

ரணில் புலிகள் ஒப்பந்தம் முதல் இன்று வரை எமது கட்சி சார்பாக மக்களால் தேர்ந்தெடுக்கப்பட்ட மக்கள் பிரதிநிதிகளுக்கு அரச பொலிஸார் மட்டுமே சட்ட ரீதியிலான பாதுகாப்பை வழங்கி வருகின்றார்கள். இந்நிலையில் எமது கட்சி உறுப்பினர்கள் ஆயுதங்கள் வைத்திருப்பதாகவோ, ஆயுதங்களால் எவரையும் அச்சுறுத்தியதாகவோ எமது மக்களிடம் இருந்து எந்த வித புகார்களும் தெரிவிக்கப்பட்டிருக்கவில்லை. அவ்வாறு தெரிவிக்கப்பட்டிருந்தால் றொபேர்ட் ஓ பிளேக் அதை ஆதாரபூர்வமாக நிரூபித்தாக வேண்டும். சமாதானத்திற்காகவும், நடைமுறைச்சாத்தியமான வழிமுறையிலான கெளரவமான ஓர் அரசியல் தீர்விற்காகவும் எம்மை ஆதரித்து எமக்கு அரசியல் அங்கீகாரம் வழங்கியிருக்கும் தமிழ் மக்களின் விருப்பங்களை நிராகரிக்கும் றொபேர்ட் ஓ பிளேக்கின் அவதூறான கருத்துக்களை நாம் கண்டிக்கின்றோம்.

எமது மக்களின் நிரந்தர அமைதிக்காகவும், அரசியலுரிமைச் சுதந்திரத்திற்காகவும் நாம் இழந்தவைகள் ஏராளம். அழிவுகளில் இருந்து எழுந்து நிமிர விரும்பும் எமது மக்களுக்கான நிரந்தர மகிழ்ச்சிக்காக றொபேர்ட் ஓ பிளேக் எதையும் ஆற்ற விரும்பினால் அதை மகிழ்ச்சியுடன் வரவேற்போம் என்றும் மாறாக எமது மக்களின் பிரச்சினைக்கு தீர்வு காண விரும்பும் எம் மீது இது போன்ற பொய்யான அவதூறுகளை உள்ளோக்கத்தோடு திட்டமிட்டு பரப்புவது என்பது குழப்பங்களை விழைவிக்கும் கபட நோக்கங்களில் ஒன்றாகவே கருதப்படும் என்றும் தெரிவிக்கப்பட்டுள்ளது.